ទីក្រុងអាប៊ូដាប៊ី៖ ប្រទេសអារ៉ាប់រួមបានកោះហៅឯកអគ្គរដ្ឋទូតអ៊ីស្រាអែលទៅឆ្លើយបំភ្លឺ និងបង្ហាញការកើតទុក្ខមិនសុខចិត្តក្រោយព្រឹត្តិការណ៍បាញ់ប្រហារពីសំណាក់យោធាអ៊ីស្រាអែលទៅលើអគារមួយកន្លែងនៅប្រទេសកាតាដើម្បីប៉ុនប៉ងសម្លាប់មេដឹកនាំរបស់ក្រុមហាម៉ាស់។ ថ្វីដ្បិតការវាយប្រហារនោះមិនបានសម្រេច ប៉ុន្តែបានសម្លាប់មនុស្សយ៉ាងតិច៦នាក់។ អារ៉ាប់រួមប្រាប់ទូតអ៊ីស្រាអែលថាខ្លួនសូមថ្កោលទោសទង្វើនេះជាទម្ងន់។ មានន័យថាអ៊ីស្រាអែលទទួលរងសម្ពាធកាន់តែខ្លាំងបន្ទាប់ពីប្រទេសជាច្រើននៅលើពិភពលោករួមទាំងអាមេរិក អឺរ៉ុប អារ៉ាប់ និងបណ្ដាប្រទេសខ្លះនៅទ្វីបអាស៊ីប្រកាសថ្កោលជាបន្តបន្ទាប់។
នៅក្នុងកិច្ចជំនួបថ្ងៃនេះ អារ៉ាប់រួមចាត់ទុកការវាយប្រហារនោះមានចរិតគម្រក់ និងកំសាកបំផុត។ នេះជាការបង្កហេតុដោយគ្មានការទទួលខុសត្រូវទាល់តែសោះ ហើយនឹងគំរាមកំហែងទៅលើសន្តិភាព និងសន្តិសុខនៅក្នុងតំបន់ និងពិភពលោក។ អារ៉ាប់រួមយល់ថាការប្រព្រឹត្តអំពើអរិភាពជាបន្តបន្ទាប់ និងការប្រើប្រាស់វោហារសាស្ត្របែបបង្កហេតុនឹងធ្វើឱ្យប៉ះពាល់ខ្លាំងចំពោះស្ថិរភាព ហើយនឹងរុញច្រានតំបន់មជ្ឈិមបូព៌ាឱ្យដើរទៅរកមាត់ជ្រោះមរណៈ។
សារព័ត៌មានអ៊ីស្រាអែលក៏បានផ្សព្វផ្សាយអំពីកិច្ចជំនួបរវាងអារ៉ាប់រួម និងទូតអ៊ីស្រាអែលនៅថ្ងៃនេះផងដែរ។ ប៉ុន្តែមិនទាន់ឃើញរដ្ឋាភិបាលអ៊ីស្រាអែលចេញសេចក្ដីថ្លែងការណ៍អ្វីមួយនៅឡើយទេ។ ចាប់តាំងពីអ៊ីស្រាអែល និងអារ៉ាប់រួមដាក់ទំនាក់ទំនងការទូតជាមួយគ្នារយៈពេល៥ឆ្នាំចុងក្រោយនេះ គេអាចចាត់ទុកថាជាលើកទី១ដែលអារ៉ាប់រួមបញ្ចេញប្រតិកម្មខ្លាំងដល់ថ្នាក់នេះ។
ការកោះហៅទូតអ៊ីស្រាអែលទៅឆ្លើយបំភ្លឺលើកនេះធ្វើឡើងត្រឹមតែប៉ុន្មានថ្ងៃប៉ុណ្ណោះមុនពេលមានកិច្ចប្រជុំបន្ទាន់មួយនៃក្រុមប្រទេសអារ៉ាប់ និងក្រុមប្រទេសឥស្លាមនៅប្រទេសកាតានាសប្ដាហ៍ក្រោយ។ ប្រធានបទដែលត្រូវពិភាក្សាគ្នាគឺពាក់ព័ន្ធនឹងការវាយប្រហាររបស់អ៊ីស្រាអែលទៅលើប្រទេសកាតា។
បន្ទាប់ពីឡើងថ្លែងសុន្ទរកថានៅក្នុងក្រុមប្រឹក្សាសន្តិសុខអង្គការសហប្រជាជាតិរួច នាយករដ្ឋមន្ត្រីកាតានឹងបង្ហួសដំណើរទៅវ៉ាស៊ីនតោនដើម្បីជួបរដ្ឋមន្ត្រីការបរទេសអាមេរិក។ រដ្ឋមន្ត្រីការបរទេសកាតា ព្រះអង្គម្ចាស់មហាមេត ប៊ីន អាប់ឌុលរ៉ាម៉ាន់ អាល់ថានី (Mohammed bin Abdulrahman Al Thani) មានបន្ទូលថាអ៊ីស្រាអែលកំពុងព្យាយាមកែប្រែស្ថានការណ៍នៅក្នុងតំបន់ដោយកម្លាំង។ ខាងលើនេះជាការដកស្រង់ប្រភពពីអេភី (AP) និងប្រភពដទៃទៀត៕
ចែករំលែកព័តមាននេះ