ខេត្តពោធិ៍សាត់៖ ថ្ងៃទី12ខែកញ្ញាឆ្នាំ2025 មន្ទីរព័ត៌មានខេត្តពោធិ៍សាត់ សហការជាមួយរដ្ឋបាលខេត្ត បានរៀបចំក្បួនយុទ្ធនាការផ្សព្វផ្សាយ និងនិយាយថាទេចំពោះព័ត៌មានក្លែងក្លាយ ដែលបានប្រារព្ធធ្វើនៅវេទិកាអុំទូកស្ថិតក្នុងភូមិសំពៅមាស សង្កាត់ផ្ទះព្រៃ ក្រុងពោធិ៍សាត់ ក្រោមអធិបតីភាពលោក…
ខេត្តពោធិ៍សាត់៖ ថ្ងៃទី12ខែកញ្ញាឆ្នាំ2025 មន្ទីរព័ត៌មានខេត្តពោធិ៍សាត់ សហការជាមួយរដ្ឋបាលខេត្ត បានរៀបចំក្បួនយុទ្ធនាការផ្សព្វផ្សាយ និងនិយាយថាទេចំពោះព័ត៌មានក្លែងក្លាយ ដែលបានប្រារព្ធធ្វើនៅវេទិកាអុំទូកស្ថិតក្នុងភូមិសំពៅមាស សង្កាត់ផ្ទះព្រៃ ក្រុងពោធិ៍សាត់ ក្រោមអធិបតីភាពលោក ខូយ រីដា អភិបាលនៃគណៈអភិបាលខេត្ត ព្រមទាំងមានការចូលរួមពីមន្ត្រីរាជការ និងក្រុមយុវជនសរុបជាង៤០០នាក់ ។
លោក លាង ទិតដ្ឋាន ប្រធានមន្ទីរព័ត៌មានខេត្តពោធិ៍សាត់ បានជម្រាបជូនថា យុទ្ធនាការប្រឆាំងព័ត៌មានក្លែងក្លាយនៅខេត្តពោធិ៍សាត់នាពេលនេះស្ថិតក្រោម ប្រធានបទ«និយាយថាទេចំពោះព័ត៌មានក្លែងក្លាយ» បានចាប់ផ្តើមបើកជាផ្លូវការនៅថ្ងៃទី១ខែមេសាឆ្នាំ២០២៥ ក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន ដោយមានអ្នកចូលរួមប្រមាណ១ពាន់នាក់ជាអ្នកដឹកនាំ អ្នកនាំពាក្យ អ្នកសារព័ត៌មាន បណ្តាញសង្គម និងមន្ត្រីទទួលបន្ទុកព័ត៌មានទាំង២៥រាជធានីខេត្ត។
យុទ្ធនាការនេះអនុវត្តទូទាំងប្រទេសក្នុង រយៈពេល១២ខែចាប់ពីខែមេសាឆ្នាំ២០២៥ ដល់ខែមីនាឆ្នាំ២០២៦ ក្នុងគោលបំណងលើកកម្ពស់ការយល់ដឹងជាសាធារណៈអំពីគ្រោះថ្នាក់និងផលវិបាកនៃព័ត៌មានក្លែងក្លាយដោយចាប់អនុវត្តដំបូងនៅខេត្តស្វាយរៀង ជាការបញ្ជ្រាបការយល់ដឹងឱ្យទៅដល់ពលរដ្ឋក្នុងសហគមន៍ និងពង្រីកអក្ខរកម្មព័ត៌មាននិងប្រព័ន្ធផ្សព្វផ្សាយ ដើម្បីផ្លាស់ប្តូរឥរិយាបទរបស់ពលរដ្ឋឱ្យមកចូលរួមទប់ស្កាត់ការរីករាលដាលនូវព័ត៌មានក្លែងក្លាយ។
លោកប្រធានមន្ទីរព័ត៌មានខេត្តបានឱ្យដឹងទៀតថា ក្នុងឆ្នាំ២០២៤ ក្រុមការងារនៃគណៈកម្មាធិការប្រឆាំងព័ត៌មានក្លែងក្លាយរបស់ក្រសួងព័ត៌មាន បានកត់ត្រារកឃើញព័ត៌មានក្លែងក្លាយចំនួន៣៦៥១ករណី បើប្រៀបធៀបឆ្នាំ២០២៣មានចំនួន៣២០៨ករណី។គោលដៅរបស់យុទ្ធនាការ គឺកាត់បន្ថយព័ត៌មានក្លែងក្លាយឱ្យមកនៅកម្រិតអប្បបរិមា សំដៅធានាសន្តិសុខព័ត៌មាន គឺទទួលព័ត៌មានប្រកបដោយ គុណភាពនិងសុវត្ថិភាពរបស់ប្រជាពលរដ្ឋ។
ថ្លែងក្នុងឱកាសបើកយុទ្ធនាការ លោក ខូយ រីដា បានថ្លែងថា ព័ត៌មានក្លែងក្លាយគឺជាព័ត៌មានមិនពិត ដោយចេតនា ឬអចេតនា ផ្សព្វផ្សាយតាមបណ្តាញសង្គម និងបង្កើតឡើងឬចែកចាយដោយមានបំណងបំភាន់មតិសាធារណៈ។ដូច្នេះរាល់ពេលប្រើប្រាស់បណ្តាញសង្គម ត្រូវគិតដល់គ្រោះថ្នាក់ដែលអាចនឹងកើតឡើងគ្រប់ពេលជាពិសេសលើបណ្តាញសង្គម ឬគណនីដែលគ្មានប្រភពច្បាស់លាស់ ដែលតម្រូវឱ្យយើងចេះត្រិះរិះពិចារណា រកហេតុផល ស្វែងរកប្រភពជាក់លាក់ ទើបយើងអាចជៀសផុតពីការជឿខុសនិងខូចប្រយោជន៍ ទាំងខ្លួនឯងផ្ទាល់និងសង្គមជាតិ។
ព័ត៌មានក្លែងក្លាយមានច្រើនទម្រង់ ដូចជាដំណឹង ការបំភ្លៃ ការភាន់ច្រឡំក្នុងការផលិត ការចែកចាយ ការបំពុលប៉ះពាល់ដល់សិទ្ធិបុគ្គល ត្រូវទទួលខុសត្រូវចំពោះមុខច្បាប់។ លោកសង្ឃឹមថា យុទ្ធនាការផ្សព្វផ្សាយនិយាយថាទេចំពោះព័ត៌មានក្លែងក្លាយនៅក្នុងខេត្តពោធិ៍សាត់ នឹងបញ្ជ្រាបដល់ប្រជាពលរដ្ឋឱ្យមានការយល់ដឹងកាន់តែច្បាស់ ដើម្បីរួមចំណែកមិនផ្សព្វផ្សាយឬចែករំលែកព័ត៌មានក្លែងក្លាយបន្តទៀត៕
ចែករំលែកព័តមាននេះ