សិស្សប្រឡងជាប់និទ្ទេស A, B និង C ទទួលបានរង្វាន់លើកទឹកចិត្តពីអភិបាលខេត្តប៉ៃលិន
- ប៉ៃលិន
ខេត្តប៉ៃលិន ៖ នាព្រឹកថ្ងៃទី០៩ ខែតុលា ឆ្នាំ២០២៦នេះ លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន បានអញ្ជើញជួបសំណេះ សំណាកសួរសុខទុក្ខ និងផ្តល់រង្វាន់លើកទឹកចិត្ត ជូនដល់សិស្សានុសិស្សប្រឡងជាប់សញ្ញាបត្រមធ្យមសិក្សាទុតិយភូមិទទួលបាននិទ្ទេស A,B និងC ទូទាំងខេត្តប៉ៃលិន នាសម័យប្រឡងឆ្នាំ២០២៦ ដោយមានការចូលរួមពីសំណាក់ ប្រធានមន្ទីរអប់រំយុវជននិងកីឡាខេត្ត លោកគ្រូ អ្នកគ្រូ និងអាណាព្យាបាលផងដែរ។
លោកជំទាវបណ្ឌិត បាន ស្រីមុំ ក្នុងកម្មវិធីសំណេះសំណាល និងផ្តល់រង្វាន់ដល់សិស្សប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៦នេះ ដោយលោកជំទាវបានមានប្រសាសន៍ផ្តាំផ្ញើ និងជម្រុញលើកទឹកចិត្តសំខាន់ៗ គឺការកោតសរសើរដល់មន្ទីរអប់រំ យុវជន និងកីឡាខេត្ត គណៈគ្រប់គ្រងសាលា លោកគ្រូ អ្នកគ្រូ និងអាណាព្យាបាល ដែលបានខិតខំបង្ហាត់បង្ហាញ និងជំរុញការសិក្សារបស់កូនចៅរហូតទទួលបានលទ្ធផលល្អ។ ប្រភពដដែលបានបន្តទៀតថា ៖ លោកជំទាវជំរុញឱ្យសិស្សានុសិស្សដែលប្រឡងជាប់ទាំងអស់ ត្រូវតែបន្តខិតខំប្រឹងប្រែងរៀនសូត្រនៅកម្រិតឧត្តមសិក្សា (មហាវិទ្យាល័យ) ដើម្បីយកចំណេះដឹងនិងជំនាញមកកសាងអនាគតខ្លួនឯង និងចូលរួមអភិវឌ្ឍន៍សង្គមជាតិ។
ម្យ៉ាងវិញទៀតលោកជំទាវក៏បានក្រើន រំលឹកឱ្យកូនៗរក្សាខ្ជាប់នូវសីលធម៌ល្អ វិន័យ និងស្មារតីតស៊ូជាបន្តទៀត ទោះបីជាទទួលបានជោគជ័យក្នុងកម្រិតចំណេះទូទៅក៏ដោយ ហើយចុងក៍៏បានប្រគល់រង្វាន់ជូនដល់សិស្សដែលប្រឡងជាប់បាក់ឌុបចាប់ពីនិទ្ទេស A,B និងCផងដែរ ។
សូមបញ្ជាក់ថា សិស្សនិទ្ទេស A ចំនួន ១ នាក់ ទទួលបានម៉ូតូម៉ាក Wave ចំនួន ១ គ្រឿង គិតជាទឹកប្រាក់ស្មើនឹង ៦.០០០.០០០ រៀល
សិស្សនិទ្ទេស B ចំនួន ១៩ នាក់ ក្នុងម្នាក់ទទួលបាន ២០០.០០០ រៀល គិតជាទឹកប្រាក់ស្មើនឹង ៣.៨០០.០០០ រៀល
សិស្សនិទ្ទេស C ចំនួន ៩៩ នាក់ ក្នុងម្នាក់ទទួលបាន ១០០.០០០ រៀល គិតជាទឹកប្រាក់ស្មើនឹង ៩.៩០០.០០០ រៀល ៕
ចែករំលែកព័តមាននេះ