ទូក.ងជិត ៨០ទូក នឹងតាំងពិពណ៌ រយៈពេល៥ថ្ងៃ ពេលបុណ្យចេញព្រះវស្សា
- កំពង់ចាម
ខេត្តកំពង់ចាម ៖ ក្នុងឱកាសបុណ្យចេញព្រះវស្សានៅថ្ងៃទី២៦ តុលា ខាងមុខនេះ និងមានកម្មវិធីប្រណាំងទូក.ង ដែលចូលរួមមកពីខេត្តតាកែវ ត្បូងឃ្មុំ ក្រចេះ ដែលមានទូករហូតដល់ជិត៨០ រួមជាមួយការតាំងពិព័រណ៌រយៈពេល៥ថ្ងៃ។ នេះជាការលើកឡើងរបស់ឯកឧត្តមអ៊ុន ចាន់ដា អភិបាលខេត្តក្នុងឱកាសជួបសំណេះសំណាលជាមួយមន្ត្រីរាជការធ្វើឡើងនៅសាលសន្និសីទសាលាខេត្តនាព្រឹកថ្ងៃទី៩ ខែតុលា ឆ្នាំ២០២៦។
ឯកឧត្តមអភិបាលខេត្តមានប្រសាសន៍លើកឡើងថា ជាធម្មតានៅក្នុងមួយឆ្នាំគឺមានការជួបសំណេះសំណាលជាមួយមន្ត្រីរាជការចំនួនបីដង ក្នុងនោះមានចូលឆ្នាំប្រពៃណីជាតិខ្មែរ បិណ្ឌភ្ជុំបិណ្ឌ និងចូលឆ្នាំសកល ដែលត្រូវបានធ្វើឡើងជាហូរហែតាំងពីជំនាន់សម្ដេចទេពញាណ ហ៊ុន ណេង ត្រូវបានរក្សាបន្តរហូតមកដល់សព្វថ្ងៃ។ ជាមួយនោះតាមរយៈការបំពេញឲ្យគ្នាទៅវិញទៅមកធ្វើឲ្យការងាររដ្ឋបាលខេត្តទទួលបានការរីកចម្រើនតាំងពីដើមឆ្នាំ២០២៦ រហូតមកដល់ពេលនេះគួរឱ្យកត់សម្គាល់។
ឯកឧត្តមអ៊ុន ចាន់ដា អភិបាលខេត្តមានប្រសាសន៍រំលឹកថា ដោយសារតែមានការឈ្លានពានពីសំណាក់កងទ័ពសៀមមកលើបូរណភាពទឹកដីកម្ពុជាមានជាបន្តបន្ទាប់ចំនួនពីរលើក ក្នុងនោះបណ្ដាលឲ្យមន្ត្រីអាវុធហត្ថពីររូបនិងទាហានបួននាក់ ដែលជាអ្នកខេត្តកំពង់ចាមបានទទួលមរណភាព។ ដោយគេចពីគ្រាប់ផ្លោងបងប្អូនភៀសសឹកក្មេងចាស់ប្រុសស្រីប្រមាណជិតបីម៉ឺននាក់ត្រូវបានជម្លៀសមករស់នៅកន្លែងសុវត្ថិភាពក្នុងខេត្តកំពង់ចាម ដោយទទួលបានការយកចិត្តទុកដាក់ពីសំណាក់អាជ្ញាធរមូលដ្ឋានបានជួយទំនុកបម្រុងស្បៀងអាហារព្រមទាំងថ្នាំសង្កូវជួយដល់ពួកគាត់ ជាពិសេសស្ត្រីមានផ្ទៃពោះជាភរិយារបស់កងវីរៈកងទ័ពជួរមុខដែលបានសម្រាលកូននៅតាមមន្ទីរពេទ្យបង្អែកស្រុកនិងមន្ទីរពេទ្យខេត្តកំពង់ចាម គឺទទួលបានការយកចិត្តទុកដាក់ ព្រមទាំងបានផ្ដល់ថវិកាជូនដើម្បីបង្ហាញនៅក្តីស្រឡាញ់ ដោយមិនបានចំណាយថវិកាគឺរដ្ឋបាលខេត្តជាអ្នកទទួលរាប់រងទាំងស្រុង។
ហើយថ្មីៗកន្លងទៅរដ្ឋបាលខេត្តបានស្រីអង្គាសបានថវិកាព្រមទាំងរឿងឧបភោគបរិភោគមួយចំនួនធំបានយកទៅចែកជូនទាហាន នគរបាលជួរមុខដែលបានឈរជើងការពារទឹកដីនៅក្នុងខេត្តព្រះវិហារនិងឧត្តរមានជ័យ។
អភិបាលខេត្តបានសង្កត់ធ្ងន់ថា នៅសល់រយៈពេល២ថ្ងៃទៀតប៉ុណ្ណោះនិងដល់ភ្ជុំបិណ្ឌធំមកដល់ ដូច្នេះមន្ត្រីរាជការដែលមានស្រុកកំណើតនៅឆ្ងាយអាចទៅលេងឪពុកម្ដាយសួរសុខទុក្ខបងប្អូនសូមឲ្យការធ្វើដំណើរត្រឡប់ទៅវិញទៅមកធានាបាននៅសុវត្ថិភាព៕
ចែករំលែកព័តមាននេះ