ទីក្រុងម៉ូស្គូ៖ ជាថ្មីម្ដងទៀត ប្រទេសរុស្ស៊ីប្រកាសបដិសេធផែនការរបស់ក្រុមបស្ចិមប្រទេសដែលចង់បង្កើតប្រព័ន្ធសន្តិសុខសម្រាប់អ៊ុយក្រែនដោយយកម៉ូដែលរបៀបអង្គការណាតូ។ អនុរដ្ឋមន្ត្រីការបរទេសរុស្ស៊ី លោកសឺហ្គេ រីយ៉ាបកោហ្វ (Sergei Ryabkov) ច្រានចោលគំនិតនេះ។ លោកថារុស្ស៊ីមិនទទួលយកជាដាច់ខាតនូវផែនការណាដែលចង់ឱ្យអ៊ុយក្រែនមានចំណែកសូម្បីតែកម្រិតតូចប៉ុណ្ណាក្ដីនៅក្នុងសម្ព័ន្ធភាពយោធាជាមួយក្រុមបស្ចិមប្រទេស។ គួរកត់សម្គាល់ថាការថ្លែងដូច្នេះធ្វើឡើងមួយថ្ងៃបន្ទាប់ពីប្រធានាធិបតីបារាំង លោកអេម៉ានុយអែល ម៉ាក្រុង មានប្រសាសន៍ក្រោយកិច្ចប្រជុំកំពូលរៀបចំនៅទីក្រុងប៊ែឡាំង ប្រទេសអាល្លឺម៉ង់។ លោកម៉ាក្រុងថាបស្ចិមប្រទេសគួរណាស់ទុកចំហចោល កុំទាន់សម្រេចបែបណា នៅក្នុងសំណូមពរដែលអ៊ុយក្រែនចង់ចូលជាសមាជិកអង្គការណាតូ។

លោកឃូសស្នឺដែលជាអ្នកចរចាសន្តិភាពតំណាងឱ្យភាគីអាមេរិកក៏ថ្លែងនៅក្នុងជំនួបកំពូលនោះផងដែរថាថាលោក និងសហការីរបស់លោកម្នាក់ទៀតគឺលោកស្ទីវវីតខូស (Steve Witkoff) ធ្វើឱ្យរុស្ស៊ីមានអារម្មណ៍កក់ក្ដៅដោយការបំផុសគំនិតថា «ការធានាសន្តិសុខសម្រាប់អ៊ុយក្រែនត្រូវតែយកមាត្រា៥នៃអង្គការណាតូធ្វើជាគោល»។ មាត្រានោះចែងថា «ប្រសិនបើរដ្ឋជាសមាជិកអង្គការណាតូណាមួយរងការវាយប្រហារពីរដ្ឋដទៃទៀត មានន័យថាជាការវាយប្រហារទៅលើស្ថាប័នណាតូទាំងមូល។ ដូចនេះតម្រូវឱ្យរដ្ឋជាសមាជិកទាំងអស់ត្រូវតែជួយការពារសមាជិករបស់ខ្លួន។

ដើម្បីជាការឆ្លើយតបចំពោះប្រសាសន៍របស់លោកម៉ាក្រុង លោករីយ៉ាបកូថ្លែងថាសូម្បីតែសញ្ញាណជាទម្រង់ស្រដៀងនឹងអង្គការណាតូ ក៏លោកមិនយល់ស្របដែរសម្រាប់អ៊ុយក្រែន។ ហើយការព្យាយាមប្រើភាសារបៀបដាក់នៅក្នុងរង្វង់ក្រចក ដូចជា «ដំណោះស្រាយប្រកបដោយភាពច្នៃប្រឌិត» ជាដើមក៏ជាអ្វីដែលរុស្ស៊ីមិនទទួលយកដែរ។ យើងត្រូវពិគ្រោះគ្នាអំពីបញ្ហាសន្តិសុខជាមុនសិន។ នេះជាលក្ខខណ្ឌដំបូង និងសំខាន់បំផុតដើម្បីធានាសន្តិសុខរបស់ប្រទេសយើង (រុស្ស៊ី)។ លោកថ្លែងដូច្នេះនៅពេលអ្នកសារព័ត៌មានសួរថា «បើទៅថ្ងៃមុខ មានលក្ខខណ្ឌធានាសន្តិសុខសម្រាប់អ៊ុយក្រែនដោយយកម៉ូដែលតាមមាត្រា៥នៃលក្ខន្តិកៈរបស់អង្គការណាតូ តើរុស្ស៊ីទទួលយកដែរឬទេ?»

អនុរដ្ឋមន្ត្រីរូបនេះថ្លែងបន្តទៀតថាអ្វីដែលអ៊ុយក្រែនត្រូវដឹងគឺថាពួកគេត្រូវតែទទួលយកការទាមទាររបស់យើង ហើយមិនត្រូវចូលជាសមាជិកអង្គការណាតូជាដាច់ខាត។ បន្ទាប់ពីអ៊ុយក្រែនទទួលស្គាល់ត្រង់ចំណុចនេះរួចហើយ ទើបយើងចាប់ផ្ដើមពិភាក្សាគ្នាអំពីការធានាសន្តិសុខ។ លោកក៏បានបញ្ជាក់ផងដែរថាអាចនឹងមានដំណើរទស្សនកិច្ចរបស់ក្រុមអ្នកតំណាងអង់គ្លេស អាល្លឺម៉ង់ និងបារាំងទៅកាន់ទីក្រុងម៉ូស្គូ។ ក្រុមការងារទាំងសងខាងកំពុងគិតគូរអំពីបញ្ហានេះជាបណ្ដើរៗហើយ។ លោកពូទីនថ្លែងកាលពីម្សិលមិញថារុស្ស៊ីបានស្នើសុំឱ្យបេសកជនរបស់អឺរ៉ុបធ្វើដំណើរទៅរុស្ស៊ីដើម្បីបញ្ជាក់អំពីគោលជំហររបស់ពួកគេនៅក្នុងបញ្ហាអ៊ុយក្រែន។ បន្ទាប់មកទើបឈានដល់ការចរចាគ្នាស៊ីជម្រៅបន្ថែមទៀត៕ ប្រភព៖ Reuters

ចែករំលែកព័តមាននេះ