រថយន្តតាក់ស៊ីបើកវ៉ាជែងរថយន្តធំ ជ្រុលទៅបុ.ករថយន្តសង្គ្រោះបន្ទាន់ នៅស្រុកអូររាំង ស្លា.ប់ ៣នាក់ និងរបួ.សធ្ងន់ ៣នាក់
- មណ្ឌលគិរី
ខេត្តមណ្ឌលគិរី ៖ ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្តតាក់ស៊ី និងរថយន្តសង្គ្រោះបន្ទាន់ (សាម៉ុយ) បុកគ្នាពេញទំហឹងក្នុងទិសដៅបញ្ច្រាសទិសគ្នា បណ្តាលឱ្យមនុស្ស ៣នាក់បាត់បង់ជីវិត និង ៣នាក់ទៀតរងរបួសធ្ងន់។
ហេតុការណ៍នេះបានកើតឡើងនៅវេលាម៉ោង ១៣ និង៤០នាទីរសៀល ថ្ងៃទី១៨ ខែវិច្ឆិកា ឆ្នាំ២០២៦ នៅលើកំណាត់ផ្លូវជាតិលេខ៧៦ ចន្លោះគីឡូម៉ែត្រលេខ ៩៨-៩៩ ស្ថិតក្នុងភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី។
តាមរបាយការណ៍របស់អធិការដ្ឋាននគរបាលស្រុកអូររាំង បានឱ្យដឹងថា មូលហេតុនៃគ្រោះថ្នាក់នេះ បណ្តាលមកពីរថយន្តតាក់ស៊ីម៉ាក Toyota Hiace ពណ៌ទឹកមាស ពាក់ស្លាកលេខ ភ្នំពេញ 2CK-8425 បានបើកបរក្នុងល្បឿនលឿន ហើយព្យាយាមវ៉ាជែងរថយន្តធុនធំម៉ាក វ៉េអង (V1) ក្នុងស្ថានភាពគ្រោះថ្នាក់ ទើបជ្រុលចង្កូតទៅបុករថយន្តសង្គ្រោះបន្ទាន់ម៉ាក Toyota Hiace ពណ៌ស ពាក់ស្លាកលេខ រដ្ឋ 12 2-1488 ដែលកំពុងដឹកអ្នកជំងឺក្នុងទិសដៅបញ្ច្រាសគ្នាយ៉ាងពេញទំហឹង។
របាយការណ៍ដដែលបន្តថា ភាគីរថយន្តតាក់ស៊ី (គ្មានអ្នករួមដំណើរ)អ្នកបើកបរឈ្មោះ រុន តុងនាង ភេទប្រុស អាយុ ២៣ឆ្នាំ ជនជាតិខ្មែរ មុខរបរអ្នកបើកបរ (បានស្លាប់បាត់បង់ជីវិតពេលបញ្ជូនទៅដល់មន្ទីរពេទ្យ)។ចំណែកភាគីរថយន្តសង្គ្រោះបន្ទាន់ (សរុប ៥នាក់) ១-អ្នកបើកបរឈ្មោះ ហេង វណ្ណារ៉ា ភេទប្រុស អាយុ ៤០ឆ្នាំ ជនជាតិខ្មែរ (រងរបួសធ្ងន់ បាក់ជើងខាងឆ្វេង)។២-អ្នករួមដំណើរឈ្មោះ ឃុន រដ្ឋា ភេទប្រុស អាយុ ៣៤ឆ្នាំ មុខរបរបុគ្គលិកពេទ្យ (រងរបួសធ្ងន់ បាក់ជើងទាំងពីរ)។៣-អ្នករួមដំណើរឈ្មោះ ព្រិល ឡាយចាន់លៀង ភេទប្រុស អាយុ ៣៥ឆ្នាំ មុខរបរកងរាជអាវុធហត្ថ (រងរបួសធ្ងន់ បាក់ជើងខាងឆ្វេង)។៤-អ្នករួមដំណើរឈ្មោះ ម៉ម មករា ភេទប្រុស អាយុ ៣៩ឆ្នាំ មុខរបរកងរាជអាវុធហត្ថ (ស្លាប់បាត់បង់ជីវិត)។៥-អ្នករួមដំណើរឈ្មោះ ហេង សុវណ្ណរាជ ភេទប្រុស អាយុ ១៣ឆ្នាំ (ស្លាប់បាត់បង់ជីវិត)។
ក្រោយកើតហេតុ កម្លាំងសមត្ថកិច្ចជំនាញនៃអធិការដ្ឋាននគរបាលស្រុកអូររាំង បានចុះទៅដល់ទីតាំងកើតហេតុភ្លាមៗ ដើម្បីជួយអន្តរាគមន៍បញ្ជូនជនរងគ្រោះទៅសង្គ្រោះនៅមន្ទីរពេទ្យ និងធ្វើការវាស់វែងកំណត់ហេតុ។ បច្ចុប្បន្ន រថយន្តទាំងពីរគ្រឿងដែលរងការខូចខាតយ៉ាងដំណំ ត្រូវបានសមត្ថកិច្ចយកទៅរក្សាទុកជាបណ្តោះអាសន្ននៅអធិការដ្ឋាននគរបាលស្រុកអូររាំង ដើម្បីរង់ចាំដោះស្រាយតាមនីតិវិធីច្បាប់៕


ចែករំលែកព័តមាននេះ