ខេត្តបាត់ដំបង ៖ លំនៅឋានស្ថិតនៅក្បែរគ្នាចំនួន០២ខ្នង ត្រូវបានព្រះអគ្គីលេបយកអស់គ្មានសល់ នៅវេលាម៉ោង៦ព្រលប់ថ្ងៃទី១៩ វិច្ឆិកា ស្ថិតនៅចំណុចភូមិផ្កាស្លា សង្កាត់ចំការសំរោង ក្រុងបាត់ដំបង ដែលគេពុំទាន់ដឹងពីមូលហេតុ ប៉ុន្តែមន្ត្រីជំនាញបាននិងកំពុងបន្តនីតិវិធីសួរនាំម្ចាស់ផ្ទះ ដើម្បីរកមូលហេតុដែលនាំឲ្យមានអគ្គិភ័យដ៏មហន្តរាយនេះកើតឡើង ។

យោងតាមរបាយការណ៍បឋមរបស់សមត្ថកិច្ចបានឲ្យដឹងថា លំនៅឋានទាំង០២ខ្នងដែលរងការបំផ្លិចបំផ្លាញដោយអគ្គិភ័យខាងលើនេះ មានម្ចាស់១-ឈ្មោះ អោម សារ៉េត ភេទស្រីអាយុ៦៥ឆ្នាំផ្ទះរបស់គាត់មានទំហំ៥ម៉ែត្រx៨ម៉ែត្រធ្វើអំពីថ្មប្រក់ស័ង្កសីខូចខាតទាំងស្រុង។២-ឈ្មោះ ជា វាសនា ភេទប្រុស អាយុ៣៣ឆ្នាំ មុខរបរលក់ដូរ ផ្ទះរបស់គាត់មានទំហំ៤ម៉ែត្រx៥ម៉ែត្រ ធ្វើអំពីថ្មប្រក់ស័ង្កសី ខូចខាតស្ទើរទាំងស្រុងដែរ ។

របាយការណ៍ដដែលមិនបាននិយាយពីមូលហេតុ ដែលនាំឲ្យមានអគ្គិភ័យនេះកើតឡើងទេ ប៉ុន្តែបានបង្ហាញថា អគ្គិភ័យទំនងផ្ដើមចេញពីផ្ទរបស់ឈ្មោះ អោម សារ៉េត ហើយឆ្លងរាលដាលដល់ផ្ទះរបស់ឈ្មោះ ជា វាសនា ។ អធិការក្រុងបាត់ដំបង លោក ពេជ្រ សារ៉ែន បានផ្ដល់ព័ត៌មានបឋមដែរថា លំនៅឋានទាំង០២ខ្នងរងការខូចខាតដូចគ្នា ប៉ុន្តែយើងមិនទាន់ដឹងពីទំហំការខាតបង់គិតជាទឹកប្រាក់នៅឡើយទេ ។

ប៉ុន្តែយ៉ាងណា នៅព្រឹកថ្ងៃទី២០ វិច្ឆិកា នេះ មន្ត្រីជំនាញ រួមទាំងអាជ្ញាធរផងនឹងចុះត្រូតពិនិត្យសួរនាំម្ចាស់ផ្ទះជាថ្មីទៀត ដើម្បីស្វែងរកមូលហេតុជាក់លាក់ ដែលបណ្ដាលឲ្យមានអគ្គិភ័យនេះកើតឡើង ។ ដោយឡែក បើនិយាយពីរថយន្តពន្លត់អគ្គិភ័យរបស់សមត្ថកិច្ចវិញ ហាក់ជួបការលំបាកច្រើនក្នុងការចូលជួយសង្គ្រោះ ដោយសារតែច្រកចូលទៅកាន់ទីតាំងកើតហេតុ តូចចង្អៀតរថយន្តមិនអាចចូលទៅកៀកនឹងកន្លែងកើតហេតុបាន បើទោះជាក្រុមរថយន្តពន្លត់អគ្គិភ័យបានរួសរាន់ទៅទាន់ពេលវេលាក្ដី ។

មន្ត្រីពន្លត់អគ្គិភ័យបានប្រាប់ថា មន្ត្រីជំនាញបានចំណាយពេលអូសទុយោបាញ់ទឹកចូលទៅកាន់ទីតាំងកើតហេតុតាមច្រកតូចចង្អៀត ខណៈព្រះអគ្គីកំពុងប្រឹងលេបលំនៅឋានពេញកម្លាំងធ្វើឲ្យលំនៅឋានប្រជាពលរដ្ឋចំនួន០២ខ្នងរងការខូចខាត ។ ប៉ុន្តែយ៉ាងណា មន្ត្រីជំនាញបានជួយបាញ់ទឹកពន្លត់ ជាពិសេសបានបាញ់ទឹកជួយទប់ស្កាត់ការឆេះឆ្លងរាលដាលទៅកាន់ផ្ទះនៅក្បែរនោះ បើមិនដូច្នេះទេ លំនោឋានប្រជាពលរដ្ឋរាប់សិបខ្នងនៅក្បែរៗនោះ អាចប្រឈមនឹងគ្រោះមហន្តរាយដោយអគ្គិភ័យនេះជាមិនខាន ៕


ចែករំលែកព័តមាននេះ