ADផ្ទាំងផ្សព្វផ្សាយពាណិជ្ជកម្ម

Picture

ការវា.យ.ប្រ.ហា.ររបស់ពួកហ៊ូធី បំ.ផ្លា.ញជាន់ជាច្រើននៃអគារ៨០ជាន់នៅរាជធានីអារ៉ាប៊ី សាអូឌីត

3 ម៉ោង មុន

យេ​ម៉ែ​ន​-​អា​រ៉ា​ប៊ី​សា​អូឌីត ៖ ទីក្រុង​រី​យ៉ា​ដ​ កាលពី​ថ្ងៃ​ទី​១៩​ វិច្ឆិកា​ រង​ការ​វាយប្រហារ​ជា​ថ្មី​ពី​សំណាក់​ពួក​ហ៊ូ​ធី​យេ​ម៉ែ​ន​ស្និទ្ធិអ៉ី​រ៉​ង់​។ ការ​វាយប្រហារ​នេះ​ សំដៅលើ​អគារ​ដែល​ខ្ពស់​ជាងគេ​បំផុត​ ស្ថិត​ក្នុង​សង្កាត់​ពាណិជ្ជកម្ម​នៃ​រាជធានី​ប្រទេស​នោះ​ ។

​

ផ្នែក​ការពារ​ស៊ី​វិល​អា​រ៉ា​ប៊ី​សា​អូឌីត ក្នុង​សារ​មួយ​តាម​បណ្ដាញ​សង្គម​X អម​ដោយ​បណ្ដា​រូបថត បង្ហាញ​ពី​ទំំ​ហំ​នៃ​ការ​ខូចខាត ​។ ជាន់​ជា​ច្រើន​នៃ​អគារ​ខ្ពស់​នោះ​ រង​ការ​ខូច​ព្រមទាំង​បណ្ដា​អគារ​ជិតខាង​។ ការ​វាយប្រហារ​នេះ​ បណ្ដាល​ឲ្យ​ជាន់​ជា​ច្រើន​នៃ​អគារ​៨០​ជាន់ កម្ពស់​៣៨៥​ម៉ែត្រ​នោះ​ រង​ការ​ខូចខាត​។ ចំណែក​អគារ​មួយ​ចំនួន​ដែល​នៅ​ក្បែរ​ក៏​រង​ការ​ខូចខាត​ដែរ​ ។


អាជ្ញាធរ​ក្រុង​រី​យ៉ា​ដ​គូសបញ្ជាក់​ថា ការ​វាយ​ប​ប្រហារ​នេះ​ មិន​បណ្ដាល​ឲ្យ​មាន​ជន​រង​គ្រោះ​ឡើយ​។ និយោជិត​បម្រើ​ការងារ​ក្នុង​អគារ​ ក៏​ដូច​ជា​បុគ្គលិក​នៃ​អគារ​ដទៃ​ៗ​ស្ថិត​នៅ​ក្នុង​សង្កាត់​ហិរញ្ញវត្ថុ​ដែរ ត្រូវ​ឲ្យ​ធ្វើការ​តាម​អន​ឡាញ ចាប់តាំងពី​ដំណាច់​ខែកញ្ញា​មក ដោយសារ​ការ​វាយប្រហារ​ផ្ទួន​ៗ​របស់​ពួក​ហ៊ូ​ធី ប្រឆាំង​អា​រ៉ា​ប៊ី​សា​អូឌីត ជា​អ្នក​ជួយ​ទ្រទ្រង់​ដល់​រដ្ឋាភិបាល​យេ​ម៉ែ​ន​ទទួល​ស្គាល់​ដោយ​អន្តរជាតិ ​។


អ្នកនាំពាក្យ​យោធា​របស់​ពួក​ហ៊ូ​ធី​ លោក​យ៉ា​ហ៍​យ៉ា​សា​រេ​អះអាង​តាម​តេ​ឡេ​ក្រាម​ពី​ការ​វាយប្រហារ​នោះ​ដោយ​ថា​ នោះ​ជា​ការ​សង​សឹក ចំពោះ​ការ​វាយប្រហារ​នៅ​យេ​ម៉ែ​ន សម្លាប់​បណ្ដាជន​ស៊ី​​វិល​ ។ អ្នកនាំពាក្យ​រូប​នោះ​ ក៏​អះអាង​ផង​ដែរ​ ពី​ការ​វាយប្រហារ ប្រឆាំង​ព្រ​លាន​យន្តហោះ​ក្រុង​រី​យ៉ា​ដ និង​មូលដ្ឋាន​អាកាសចរណ៍​KHAMIS MUSHAIT ភាគ​ខាងត្បូង​អា​រ៉ា​ប៊ី​សា​អូឌីត​។

នៅ​ក្រុង​រី​យ៉ា​ដ​ស្នូរ​ស៊ី​រ៉ែ​ន ប្រកាស​អាសន្ន​បាន​លាន់ឮ​មុន​មានការ​ផ្ទុះ​ខ្លាំង​ៗ​។ រាជធានី​អា​រ៉ា​ប៊ី​សា​អូឌីត​រយៈពេល​ប៉ុន្មាន​ស​ប្ដា​ហ៍​ចុង​ក្រោយ​នេះ ជា​គោលដៅ​វាយប្រហារ​បន្តបន្ទាប់​របស់​ពួក​ហ៊ូ​ធី ​។ កាលពីដើម​ខែវិច្ឆិកា​អគារ​ខ្ពស់​មួយ​របស់​ក្រុមហ៊ុន​ប្រេង​យក្ស​អា​រ៉ា​ប៊ី​សា​អូឌីត​ ARAMCO ក៏​រង​ការ​ខូចខាត​ដែរ ក្រោយ​ការ​វាយប្រហារ​របស់​ពួក​ហ៊ូ​ធី​៕