ជនសង្ស័យឆក់ទូរស័ព្ទនារីម្នាក់ ត្រូវបានឃាត់ខ្លួន
- ភ្នំពេញ
រាជធានីភ្នំពេញ ៖ អធិការដ្ឋាននគរបាលខណ្ឌ៧មករា សហការជាមួយនគរបាលព្រហ្មទណ្ឌកហរសួង ឃាត់ខ្លួនជនសង្ស័យម្នាក់ ក្រោយធ្វើសកម្មភាពឆក់ទូរស័ព្ទដៃ iPhone 17 pro max ពីនារីម្នាក់ បានសម្រេច ។
ហេតុការណ៍នេះឃាត់ខ្លួនជនសង្ស័យខាងលើបានធ្វើឡើង កាលពីវេលាម៉ោង ៥ល្ងាច ថ្ងៃទី១៩ ខែវិច្ឆិកា ឆ្នាំ២០២៦ នៅចំណុចក្នុងសាលាបឋមសិក្សាសំពៅមាស ផ្លូវលេខ២១៤ ភូមិ៦ សង្កាត់បឹងព្រលឹត ខណ្ឌ៧មករា រាជធានីភ្នំពេញ ។
តាមការបញ្ជាក់ពីនគរបាលបានអោយដឹងថា ជនសង្ស័យបានធ្វើសកម្មភាពឆក់ទូរស័ព្ទដៃពីជនរងគ្រោះ កាលពីវេលាម៉ោង ០៤ និង២០នាទីទាបភ្លឺឈានចូលថ្ងៃទី ១៩ ខែវិច្ឆិកា ឆ្នាំ២០២៦ នៅចំណុចមុខផ្ទះលេខ៣៤ ផ្លូវលេខ១១១ ភូមិ១ សង្កាត់បឹងព្រលឹត ខណ្ឌ៧មករា ។ ភ្លាមៗ នគរបាលជំនាញព្រហ្មទណ្ឌខណ្ឌ៧មករា សហការជាមួយកម្លាំងនាយកដ្ឋានព្រហ្មទណ្ឌ នៃក្រសួងមហាផ្ទៃ បើកការស្រាវរហូតឈានដល់ការឃាត់ខ្លួនជនសង្ស័យម្នាក់ នៅចំណុចខាងក្នុងសាលាបឋម សំពៅមាស បញ្ជូនមកអធិការ បន្តការសាកសួរ ។
ក្នុងប្រតិបត្តិការនេះ សមត្ថកិច្ចចាប់យកសម្ភារៈ និងវត្ថុតាងរួមមាន ៖ ១. ទូរស័ព្ទដៃ ០១គ្រឿង ម៉ាក iPhone 17 Pro Max ពណ៌ស(ជារបស់ជនរងគ្រោះ)។ ២. ម៉ូតូ ០១គ្រឿង ម៉ាក Honda Scoopy ពណ៌ខ្មៅ ស៊េរីឆ្នាំ២០២៣ ពាក់ស្លាកលេខ ភ្នំពេញ 1LT-5098។ ៣. អត្តសញ្ញាណប័ណ្ណសញ្ជាតិខ្មែរ ០១សន្លឹក (ជារបស់ជនសង្ស័យ) ។ ចំពោះសម្ភារៈបាត់បង់ ទូរស័ព្ទរបស់ជនរងគ្រោះត្រូវបានសមត្ថកិច្ចប្រគល់ជូនវិញ ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌ៧មករា ដើម្បីកសាងសំណុំរឿងចាត់ការបន្តតាមនីតិវិធីច្បាប់ ៕





ចែករំលែកព័តមាននេះ