ADផ្ទាំងផ្សព្វផ្សាយពាណិជ្ជកម្ម

Picture

យុវជន​ម្នាក់​បាត់​ខ្លួន ក្រុម​គ្រួសារ​តាម​រក​កន្លះ​ខែ​ហើយ មិនឃើញ​សោះ

13 ម៉ោង មុន

រាជធានី​ភ្នំពេញ​ ៖ យុវជន​ម្នាក់ ​ក្រោយ​ពេល​ត្រលប់​មក​ពី​ធ្វើ​ពលករ​នៅ​ប្រទេស​ថៃ​វិញ បាន​ធ្វើ​ដំណើរ​មក​រក​ការងារ​ធ្វើ​នៅ​រាជធានី​ភ្នំពេញ ហើយ​ក៏​ស្រាប់តែ​បាត់​ខ្លួន​សូន្យឈឹង ដោយ​ពុំ​ដឹង​ថា ​ទៅ​ណា និង​មានរឿង​អ្វី​នោះ​ទេ។ ចំណែក​ក្រុម​គ្រួសារ​ មានការ​ព្រួយបារម្ភ​ខ្លាំង​ណាស់ ក៏​បាន​នាំ​គ្នា​តាម​រក​គ្រប់​ទីកន្លែង ប៉ុន្តែ​រក​រយៈពេល​កន្លះ​ខែ​មក​ហើយ​ នៅ​តែ​រក​មិនឃើញ​សោះ ពុំ​ដឹង​ថា​យុវជន​នេះ​មាន​សុខទុក្ខ​យ៉ាងណា​ឡើយ ។

ដោយឡែក​នៅ​វេលា​ម៉ោង​៣​រសៀល​ថ្ងៃ​ទី​២០ ខែវិច្ឆិកា ឆ្នាំ​២០២៦ ស្ត្រី​ម្នាក់​ ដែល​ជា​បងស្រី​ថ្លៃ​ជីដូនមួយ​របស់​យុវជន​នោះ ​បាន​កាន់​រូបថត ​និង​លិខិតឆ្លងដែន​យុវជន​ខាងលើ​ ធ្វើ​ដំណើរ​ទៅ​កាន់​សាលាសង្កាត់​ចោម​ចៅ​ទី​៣ ខណ្ឌ​ពោធិ៍​សែន​ជ័យ រាជធានី​ភ្នំពេញ ដើម្បី​សុំ​ឲ្យ​អាជ្ញាធរ​សង្កាត់ ​និង​នគរបាល​ប៉ុស្តិ៍​ខាងលើ​ជួយ​ស្វែងរក​យុវជន​នោះ ។

យុវជន​ដែល​បាត់​ខ្លួន​ខាងលើ​នោះ​ឈ្មោះ​ រឿង ណៃ អាយុ​២២​ឆ្នាំ មាន​ទីលំនៅ​ភូមិ​វាល ឃុំ​ប្រាសាទ ស្រុក​វ៉ា​រិ​ន ខេត្តសៀមរាប ។

ស្ត្រី​ដែល​ជា​បងថ្លៃ​ជីដូនមួយ​បាន​និយាយ​ថា យុវជន​រឿង ណៃ បាន​ទៅ​ធ្វើ​ពលករ​នៅ​ប្រទេស​ថៃ ​រយៈពេល​២​ឆ្នាំ​កន្លង​មក​ហើយ និង​បាន​ត្រលប់​ពី​ប្រទេស​ថៃ​វិញ កាលពី​ថ្ងៃ​ទី​០៥ ខែវិច្ឆិកា ឆ្នាំ​២០២៦ កន្លង​មកនេះ។ បន្ទាប់​មក​បាន​ធ្វើ​ដំណើរ​មក​រក​ការងារ​ធ្វើ​នៅ​រាជធានី​ភ្នំពេញ ជាមួយ​អ្នក​រស់នៅ​ក្នុងភូមិ​ជាមួយ​គ្នា ប៉ុន្តែ​ក្រោយមក​ឃើញ​តែ​អ្នក​ភូមិ​ត្រលប់​ទៅ​ផ្ទះ​វិញ អត់​ឃើញ​យុវជន​ រឿ​ន ណៃ នេះ​ត្រលប់​ទៅ​ផ្ទះ​ជាមួយ​អ្នក​ភូមិ​ឡើយ ។

បងថ្លៃ​ស្រី​រូប​នោះ​បាន​និយាយ​បន្ត​ទៀត​ថា ខណៈនោះ​ក្រុម​គ្រួសារ​ក៏​បាន​សួរ​អ្នក​ភូមិ​រក​យុវជន​នេះ ហើយ​អ្នក​ភូមិ​បាន​ប្រាប់​ថា យុវជន ​រឿ​ន ណៃ បាន​ធ្វើការ​នៅ​ម្ដុំ​រង្វង់​មូល​កួរស្រូវ ស្ថិត​នៅ​ក្នុង​ខណ្ឌដង្កោ រាជធានី​ភ្នំពេញ។ បន្ទាប់​មក​ក្រុម​គ្រួសារ ​បាន​តាម​រក​ដល់​រង្វង់​មូល​កួរស្រូវ តែ​មិនឃើញ និង​តាម​រក​ដល់ទី​កន្លែង​ ដែ​មាន​តម្រុយ​ថា​យុវជន​នោះ​កំពុង​ស្នាក់​នៅ​ធ្វើការ ក៏​នៅ​តែ​មិនឃើញ​ទៀត។ អ្វី​ដែល​ពិបាក​តាម​រក​បំផុត​នោះ​ គឺ​ព្រោះតែ​យុវជន​នេះ​ ពុំ​មាន​ទូរសព្ទ​ប្រើ​ផង​ ដើម្បី​ទាក់ទង​បាន ហើយ​ក៏​មិន​បានដឹង​ថា ពី​ទីកន្លែង​ ដែល​យុវជន​នេះ​កំពុង​ស្នាក់​នៅ​ធ្វើការ ពិតប្រាកដ​ទៀត​ផង ។

ស្ត្រី​ខាងលើ​ បាន​និយាយ​ប្រាប់​បន្ថែម​ទៀត​ថា ទោះបីជា​ការ​ស្វែងរក​កន្លះ​ខែ​មក​ហើយ ​មិនឃើញ​ក៏​ដោយ ក៏​ក្រុម​គ្រួសារ​មិន​បោះបង់​ការ​តាម​រក​នោះ​ឡើយ គឺ​នៅ​តែ​បន្ត​តាម​រក​គ្រប់​ទីកន្លែង ដែល​គេ​ប្រាប់​ថា​បាន​ប្រទះ​ឃើញ​យុវជន​នេះ។ រហូត​ដល់​វេលា​ម៉ោង​៣​រសៀល​ថ្ងៃ​ទី​២០ ខែវិច្ឆិកា ឆ្នាំ​២០២៦ គាត់​ក៏​បាន​សម្រេចចិត្ត​ធ្វើ​ដំណើរ​ទៅ​កាន់​សាលាសង្កាត់​ចោម​ចៅ​ទី​៣ ដើម្បី​សុំ​ឲ្យ​អាជ្ញាធរ​សង្កាត់​ និង​នគរបាល​ប៉ុស្តិ៍​ខាងលើ​ ជួយ​ស្វែងរក​យុវជន​នោះ​ផង ៕