ទំហំពាណិជ្ជកម្មរបស់កម្ពុជាកើនឡើងគួរឱ្យកត់សម្គាល់ក្នុងរយៈពេល៩ខែ
- ភ្នំពេញ
របាយការណ៍របស់ក្រសួងពាណិជ្ជកម្ម ដែលបានចេញផ្សាយកាលពីថ្ងៃព្រហស្បតិ៍បានបង្ហាញថា ទំហំពាណិជ្ជកម្មនាំចេញ-នាំចូលរបស់កម្ពុជាបានកើនឡើងដល់៥៨,៤៩ ពាន់លានដុល្លារ ក្នុងរយៈពេល៩ខែ នៃឆ្នាំ២០២៦ ដែលកើនឡើង២២,១ភាគរយធៀបនឹងរយៈពេលដូចគ្នាកាលពីឆ្នាំមុន ។
ចាប់ពីខែមករា ដល់ខែកញ្ញា កម្ពុជាបាននាំចេញទំនិញដែលមានតម្លៃ២៧,៤៧ពាន់លានដុល្លារ ទៅកាន់ទីផ្សារអន្តរជាតិ ដែលកើនឡើង១៨ភាគរយ ធៀបនឹងឆ្នាំមុន ខណៈដែលការនាំចូលបានកើនឡើង២៦ភាគរយ ដល់៣១,០១ពាន់លានដុល្លារ។
តួលេខទាំងនេះបង្ហាញថា កម្ពុជាមានឱនភាពពាណិជ្ជកម្មប្រហែល៣,៥៤ពាន់លានដុល្លារក្នុងអំឡុងពេលខែមករា ដល់ខែកញ្ញានោះ ។
កំណើនដ៏រឹងមាំនៃពាណិជ្ជកម្មនេះ ឆ្លុះបញ្ចាំងពីការពង្រីកជាបន្តបន្ទាប់នៃសកម្មភាពនាំចេញ និងនាំចូលរបស់កម្ពុជា ដែលទទួលបានការគាំទ្រពីការបង្កើនលទ្ធភាពចូលទៅកាន់ទីផ្សារ និងការចូលរួមរបស់កម្ពុជាក្នុងកិច្ចព្រមព្រៀងពាណិជ្ជកម្មថ្នាក់តំបន់ និងទ្វេភាគី ។
ផលិតផលនាំចេញសំខាន់ៗរបស់កម្ពុជារួមមាន សម្លៀកបំពាក់ ស្បែកជើង និងសម្ភារធ្វើដំណើរ គ្រឿងម៉ាស៊ីន និងឧបករណ៍អគ្គិសនី ផលិតផលកសិកម្ម កង់ សំបកកង់យានយន្ត គ្រឿងសង្ហារិម និងទំនិញផលិតផ្សេងៗទៀត ។ ការនាំចូលសំខាន់ៗរួមមាន វត្ថុធាតុដើមសម្រាប់ផលិតកម្ម ផលិតផលប្រេងឥន្ធនៈ យានយន្ត គ្រឿងអេឡិចត្រូនិក ទំនិញប្រើប្រាស់ និងទំនិញសម្រាប់ផលិតកម្មផ្សេងៗទៀត ។
ចែករំលែកព័តមាននេះ