នគរបាលសេដ្ឋកិច្ចខេត្តនិងកំលាំងអធិការនគរបាលស្រុកឱរ៉ាល់ សហការស្រាវជ្រាវបង្ក្រាបទីតាំងកែច្នៃឈើគ្មានច្បាប់ តែដោយឡែកម្ចាស់គេចខ្លួនបាត់
- កំពង់ស្ពឺ
ខេត្តកំពង់ស្ពឺ ៖ ទីតាំងកែច្នៃឈើគ្មានច្បាប់អនុញ្ញាតមួយកន្លែង ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺ សហការជាមួយកម្លាំងនគរបាលស្រុកឱរ៉ាល់ ធ្វើការបង្ក្រាប ខណៈដែលម្ចាស់ទីតាំងប្រព្រឹត្តបទល្មើសជាយូរឆ្នាំណាស់មកហើយ គ្មានច្បាប់អនុញ្ញាត។
ការឆ្មក់បង្ក្រាបទីតាំងកែច្នៃឈើគ្មានច្បាប់ខាងលើនេះ ធ្វើឡើងកាលពីថ្ងៃទី៦ ខែតុលា ឆ្នាំ២០២៦ ស្ថិតនៅក្នុងភូមិរស្មីសាមគ្គី ឃុំរស្មីសាមគ្គី ស្រុកឱរ៉ាល់ ខេត្ដកំពង់ស្ពឺ។
មន្ត្រីនគរបាលខេត្តកំពង់ស្ពឺបាននិយាយឱ្យដឹងថា នៅមុនពេលបង្ក្រាបទីតាំងកែច្នៃឈើខុសច្បាប់ គឺដោយបានការបញ្ជាដឹកនាំដ៏ខ្ពង់ខ្ពស់លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងការណែនាំពីលោកឧត្ដមសេនីយ៍ត្រី ប៊ុត ចាន់តារា ស្នងការរង នៅថ្ងៃទី៦ ខែតុលា ឆ្នាំ២០២៦ កំលាំងនគរបាលការិយាល័យប្រឆាំងបទល្មើសសេដ្ឋកិច្ចដឹកនាំដោយលោកវរសេនីយ៍ឯក ហេង សំរេច នាយការិយាល័យសហការស្រាវជ្រាវរកឃើញកន្លែងកែច្នៃឈើ (ទីតាំងសន្និធិឈើគ្មានច្បាប់អនុញ្ញាត) មួយកន្លែង នៅចំណុចដីឡូត៍ឈ្មោះ ហឹម គន្ធី ភេទប្រុស អាយុ៤៩ឆ្នាំ និងមានប្រពន្ធឈ្មោះ ហ៊ុន ឈូករ័ត្ន អាយុ៤០ឆ្នាំ (គេចខ្លួនពេលសមត្ថកិច្ចចូលដល់គោលដៅ) ភូមិរស្មីសាមគ្គី ឃុំរស្មីសាមគ្គី ស្រុកឱរ៉ាល់ ខេត្ដកំពង់ស្ពឺ ។
មន្ត្រីនគរបាលខេត្តកំពង់ស្ពឺបានបន្តឲ្យដឹងទៀតថា ក្រោយធ្វើការស្រាវជ្រាវ កម្លាំងបានសហការជាមួយរដ្ឋបាលព្រៃឈល ចុះធ្វើការប្រតិបត្ដិការបង្ក្រាប ជាក់ស្ដែងកំលាំងនគរបាលបានរកឃើញកំណាត់ដុំឈើ ប្រភេទឈើសុក្រំ ចចំនួន៤៥ដុំ ស្មើនឹង២,៩៦៨ ម៉ែត្រត្រីគុណ និងមានកម្ទេចអាចម៌រណារដែលកាត់អារដោយម៉ាស៊ីន ។
បច្ចុប្បន្នវត្ថុតាង និងទីតាំងកែច្នៃសន្និធិឈើខុសច្បាប់ បានប្រគល់ជូនសមត្ថកិច្ចជំនាញមន្ដ្រីរដ្ឋបាលព្រៃឈើតាសាល ដើម្បីកសាងសំណុំរឿងចាត់ការបន្តតាមនីតិវិធីរបស់រដ្ឋបាលព្រៃឈើ៕
ចែករំលែកព័តមាននេះ