ទីក្រុងកៀវ៖ គ្រាប់បែកដែលមានប្រព័ន្ធនាំផ្លូវពីចម្ងាយរបស់រុស្ស៊ីបានផ្ទុះក្បែររថយន្តបឺសមួយគ្រឿងដែលដឹកមនុស្សពេញប្រៀបនៅភាគខាងកើតបណ្ដាលឱ្យស្លាប់មនុស្ស៣០នាក់។ នេះជាផ្នែកមួយនៃរលកវាយប្រហារដែលធ្វើឱ្យមានបញ្ហាដាច់ភ្លើងអគ្គិសនីនៅទូទាំងរដ្ឋធានីកៀវ។ ការវាយប្រហារនៅពេលព្រឹកព្រលឹមនោះកើតមានឡើងនៅចំណតរថយន្តបឺសមួយកន្លែងនៃទីក្រុងក្រាម៉ាតស់ (Kramatorsk) ស្ថិតនៅតំបន់ដូញែត។ ក្រោយការវាយប្រហារនេះ សេវាដឹកជញ្ជូនសាធារណៈនៅក្នុងតំបន់នោះត្រូវផ្អាកដំណើរការ។
មេបញ្ជាការយោធាប្រចាំទីក្រុងក្រាម៉ាតស់ថ្លែងថាគ្មានសង្ស័យឡើយថារុស្ស៊ីវាយប្រហារលើកនេះមានចេតនាទៅលើជនស៊ីវិល។ សកម្មភាពជួយសង្គ្រោះត្រូវប្រឈមនឹងបញ្ហាពិបាកដោយសាររុស្ស៊ីវាយប្រហារជាបន្តបន្ទាប់ទៀតទៅលើទីតាំងដដែលដោយប្រើប្រាស់ដ្រូន។ រុស្ស៊ី និងអ៊ុយក្រែនកំពុងប្រឡូកនៅក្នុងសង្គ្រាមវាយប្រហារគ្នាពីចម្ងាយតាមអាកាស។ ចំណែកសង្គ្រាមទ័ពជើងគោកស្ថិតនៅក្នុងដំណាក់កាលទ្រឹងមួយកន្លែងព្រោះភាគីទាំង២មិនសូវសម្រុកទៅមុខទេ។ ប៉ុន្មានសប្ដាហ៍ចុងក្រោយនេះ រុស្ស៊ីសម្រុកវាយប្រហារកាន់តែខ្លាំងដើម្បីដាក់សម្ពាធអ៊ុយក្រែនដែលត្រៀមខ្លួនសម្រាប់រដូវរងា។
រុស្ស៊ីវាយប្រហារហេដ្ឋារចនាសម្ព័ន្ធដែលជួយទ្រទ្រង់សេដ្ឋកិច្ចដែលរង្គោះរង្គើដោយសារសង្គ្រាម។ គោលដៅចុងក្រោយនេះគឺប្រព័ន្ធផលិតថាមពល ឧស្សាហកម្មសំខាន់ៗ ស្ថានីយរថភ្លើង ប៉ុស្តិ៍ប្រៃសណីយ៍ ផ្សារលក់ទំនិញ បណ្ដាញទូរគមនាគមន៍ ស្ថានីយប្រេងឥន្ធនៈ និងទីតាំងនាំចេញគ្រាប់ធញ្ញជាតិ។ ការវាយប្រហារកាលពីថ្ងៃព្រហស្បតិ៍នោះកើតឡើងបន្ទាប់ពីរុស្ស៊ីវាយប្រហារដោយមីស៊ីលសម្លាប់មនុស្ស២២នាក់នៅទីក្រុងព្រីលូគី (Pryluky)។
ក្រុមអ្នកជួយសង្គ្រោះបន្តរើកកាយគំនរបាក់បែកដើម្បីស្វែងរកអ្នកដែលអាចនៅរស់រានមានជីវិត។ មនុស្សយ៉ាងតិច៥៤នាក់រងរបួស។ អ្នកដែលរួចផុតពីសេចក្ដីស្លាប់ត្រូវតែបន្តស្នាក់នៅក្នុងអគារបាក់បែកព្រោះពួកគេគ្មានកន្លែងរស់នៅទេ។ លោកហ្សេឡិនស្គីបានធ្វើដំណើរទៅទីក្រុងព្រីលូគីជាមួយរដ្ឋមន្ត្រីការបរទេសអង់គ្លេសដែលអំពាវនាវឱ្យមានការដាក់ទណ្ឌកម្មរុស្ស៊ីបន្ថែមទៀត។ លោកហ្សេឡិនស្គីថ្លែងថារុស្ស៊ីនឹងបង្កើនការវាយប្រហារកាន់តែខ្លាំងឡើងៗដោយមីស៊ីល និងដ្រូននៅពេលរដូវរងាកាន់ខិតចូលមកដល់។ ហេតុនេះ លោកស្នើសុំយ៉ាងទទូចទៅបណ្ដាប្រទេសសមាជិកអង្គការណាតូសូមផ្ដល់ប្រព័ន្ធការពារដែនអាកាសបន្ថែមទៀត៕ ប្រភព៖ AP
ចែករំលែកព័តមាននេះ