រាជធានីភ្នំពេញ ៖ ចំណូលសំខាន់ៗចម្បងសម្រាប់ប្រទេសកម្ពុជាសម្រាប់ការចំណាយផ្សេងៗរបស់រាជរដ្ឋាភិបាលគឺមានប្រភពមកពីស្ថាប័នចំនួនពីរដែលមានអគ្គនាយកដ្ឋានគយនិងរដ្ឋករ និងអគ្គនាយកដ្ឋានពន្ធដារ។ ជាក់ស្តែងតាមការប្រកាសឲ្យដឹងពីថ្នាក់ដឹកនាំកំពូលរបស់ប្រទេសគឺស្ថាប័នទាំងពីរ បានប្រមូលពន្ធកើនឡើងលើសពីផែនការគ្រោងទុកសម្រាប់ឆ្នាំ ២០១៩នេះទៅហើយ ត្រឹមតែរយៈពេល៩ខែប៉ុណ្ណោះ ។
ជាងនេះទៅទៀតកម្ពុជា ក៏មានប្រាក់បំរុងអន្តរជាតិ ប្រមាណ១៥ពាន់លានដុល្លារអាមេរិកនិងមាសប្រមាណ៣០តោនទុកនៅធនាគារប្រទេសស្វីស ១៥តោន នៅធនាគារប្រទេសអង់គ្លេស និង៣តោន នៅធនាគារជាតិនៃកម្ពុជា ។ នេះបើយោងតាមប្រសាសន៍សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងនៅក្នុងពិធីប្រគល់វិញ្ញាបនបត្រជូននិស្សិតសាកលវិទ្យាល័យ ប៊ែលធី កាលពីព្រឹកថ្ងៃទី០២ ខែតុលា ម្សិលមិញនេះ។
សម្តេចតេជោក៏បានដឹងថាត្រឹមតែរយៈពេល៩ខែ ដើមឆ្នាំ២០១៩នេះ អគ្គនាយកដ្ឋានគយ និងរដ្ឋករ ប្រមូលពន្ធបានប្រមាណ២.៣៨៤លានដុល្លារអាមេរិក ស្មើនឹងប្រមាណ១០៥ភាគរយ នៃផែនការគ្រោងទុកសម្រាប់ឆ្នាំ ២០១៩នេះ ខណៈអគ្គនាយកដ្ឋានពន្ធដារ ដែលជាស្ថាប័នប្រមូលពន្ធក្នុងស្រុក ក៏ប្រមូលបានប្រមាណ៩៥ភាគរយនៃផែនការសម្រាប់ឆ្នាំ ២០១៩នេះទៅហើយដែរ ដូច្នេះ ក្នុងឆ្នាំ ២០១៩ដែលនៅសល់ រយៈពេល៣ខែទៀត យើងជឿថាចំណូលពន្ធគយ និងពន្ធដារ អាចនឹងកើនឡើងខ្ពស់ សម្រាប់អោយកម្ពុជាយកមកប្រើប្រាស់ជាទុនបង្វិល។
សម្ដេចតេជោបានមានប្រសាសន៍បញ្ជាក់ថា «ចំណូលពន្ធគយក្នុងឆ្នាំ ២០១៩នេះអាចលើសផែនការ រហូតដល់៨០០លានដុល្លារអាមេរិក ដោយក្នុងមួយខែគយអាចប្រមូលបាន២៥០លានទៅ៣០០លានដុល្លារអាមេរិក »។ ជាមធ្យមក្នុងមួយខែ កម្ពុជាអាចរកចំណូលបានប្រមាណ៥០០លានដុល្លារអាមេរិក ក្នុងនោះចាយអស់៣០០លានដុល្លារ និងសន្សំបាន២០០លានដុល្លារអាមេរិក ដែលប្រាក់ដែលកម្ពុជាសន្សំនេះគឺសម្រាប់ទុកវិនិយោគជាសាធារណៈដោយខ្លួនឯង និងមិនរង់ចាំប្រាក់ជំនួយបរទេសនោះឡើយ ដូច្នេះកម្ពុជាមិនបាច់យកប្រាក់ដែលនឹងទទួលបានពីប្រេង យកមកចំណាយចរន្តនោះទេ ។ នេះបើយោងតាមសម្តេចនាយករដ្ឋមន្ត្រី។
ប្រមុខដឹកនាំរាជរដ្ឋាភិបាលកម្ពុជាក៏បានបន្ថែមថា រហូតមកដល់ពេលនេះកម្ពុជា ក៏មានប្រាក់បំរុងអន្តរជាតិ ប្រមាណ១៥ពាន់លានដុល្លារអាមេរិកនិងមាសប្រមាណ៣០តោនទៀតដែរ ដោយក្នុងចំណោមមាស៣០តោននោះ គឺ១២តោននៅធនាគារប្រទេសស្វីស ១៥តោន នៅធនាគារប្រទេសអង់គ្លេស និង៣តោន នៅធនាគារជាតិនៃកម្ពុជា ក្នុងប្រទេសកម្ពុជា ។ នេះជាវឌ្ឍនភាពមួយរបស់កម្ពុជា ចាប់តាំងពីកម្ពុជាបានចាប់ផ្ដើមកសាងប្រទេសពីបាតដៃទទេគ្មានអ្វីសោះ ដល់មានប្រាក់បំរុងអន្តរជាតិជាង១៥ពាន់លានដុល្លារអាមេរិក ។ ក្រៅពីនោះដែរ កម្ពុជាក៏មានប្រាក់សុទ្ធប្រមាណ៤ពាន់លានដុល្លារអាមេរិកសម្រាប់ប្រើប្រាស់សព្វថ្ងៃ នៅពេលមានវិបត្តិណាមួយ ជាក់ស្ដែង នៅពេលដែលកម្ពុជា មានវិបត្តិអគ្គិសនី កម្ពុជាក៏បានបញ្ចេញប្រាក់៤០០លានដុល្លារដើម្បីដោះស្រាយ និងមិនអោយកើតឡើងវិញ ម្ដងទៀតនៅពេលក្រោយ ហើយប្រាក់នេះ ជាកម្ចីរបស់រដ្ឋាភិបាល ទៅអគ្គិសនី កម្ពុជា ដែលអគ្គិសនី កម្ពុជា ត្រូវសងត្រលប់មកវិញនៅថ្ងៃក្រោយ ។ លើសពីនេះ រដ្ឋាភិបាលក៏បានបញ្ចេញ១០០លានដុល្លារអាមេរិក សម្រាប់កសាងហេដ្ឋារចនាសម្ព័ន្ធ ក្នុងខេត្តព្រះសីហនុផងដែរ ។ សម្ដេចតេជោបានបញ្ជា្កក់បន្ថែមថា «បើសិនជាកម្ពុជាមិនមានប្រាក់ទុនបំរុងនោះទេ ម្ល៉េះកម្ពុជាមិនអាចកសាងប្រទេសបាននោះឡើយ » ។
សូមរំលឹកថា អគ្គនាយកដ្ឋានពន្ធដារ បានកំណត់ផែនការប្រមូលពន្ធអោយបាន២.២៨៧លានដុល្លារ ក្នុងឆ្នាំ២០១៩នេះ តែរយៈពេល៩ខែនេះស្ថាប័ននេះ ប្រមូលពន្ធបានប្រមាណជាង២,១៧ពាន់លានដុល្លារអាមេរិកហើយ ដែលស្មើនឹងប្រមាណ៩៥ភាគរយ នៃផែនការប្រចាំឆ្នាំ ២០១៩ ដែលរំពឹងថានឹងលើសផែនការសម្រាប់ឆ្នាំ ២០១៩ ។
យោងតាមការព្យាករណ៍របស់ធានគារអភិវឌ្ឍន៍អាស៊ី ហៅកាត់ថា ADB បានអោយដឹងថា ក្នុងឆ្នាំ ២០១៩នេះ កំណើនសេដ្ឋកិច្ចកម្ពុជា នឹងនៅតែមានភាពរឹងមាំដោយនឹងសម្រេចបាន ៧ភាគរយ ហើយឆ្នាំ ២០២០ ធនាគារអភិវឌ្ឍន៍ព្យាករណ៍ថានឹងមានកំណើន ៦,៨ភាគរយ ប៉ុន្តែកម្ពុជាត្រូវធ្វើពិពិធកម្មសេដ្ឋកិច្ចមួយចំនួនផងដែរ ដើម្បីរក្សាកំណើនដ៏រឹងមាំរបស់ខ្លួន ៕ កែសម្រួលដោយ ៖ សុឃាក់
ចែករំលែកព័តមាននេះ