រាជធានីភ្នំពេញ ៖ នៅក្នុងកិច្ចប្រជុំកំពូលអាស៊ាន-ជប៉ុន លើកទី ២៨ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់អំពីសារៈសំខាន់នៃការដំឡើងកម្រិតភាពជាដៃគូសេដ្ឋកិច្ចគ្រប់ជ្រុងជ្រោយឤស៊ាន-ជប៉ុន…
រាជធានីភ្នំពេញ ៖ នៅក្នុងកិច្ចប្រជុំកំពូលអាស៊ាន-ជប៉ុន លើកទី ២៨ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់អំពីសារៈសំខាន់នៃការដំឡើងកម្រិតភាពជាដៃគូសេដ្ឋកិច្ចគ្រប់ជ្រុងជ្រោយឤស៊ាន-ជប៉ុន (AJCEP) និងការអនុវត្តប្រកបដោយប្រសិទ្ធភាព នៃភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ។
កិច្ចប្រជុំកំពូលអាស៊ាន-ជប៉ុនលើកទី ២៨ កាលពីថ្ងៃទី ២៦ ខែតុលា ឆ្នាំ ២០២៥ នៅទីក្រុងគូឡាឡាំពួ ប្រទេសម៉ាឡេស៊ី ថ្នាក់ដឹកនាំ បានគូសបញ្ជាក់ពីសារៈសំខាន់នៃចក្ខុវិស័យរួមសម្រាប់និម្មាបនកម្មតំបន់ដែលបើកចំហ មានតម្លាភាព ប្រកបដោយបរិយាបន្ន និងផ្អែកលើច្បាប់ ហើយបានអនុម័តសេចក្តីប្រកាសរួមនៃកិច្ចប្រជុំកំពូលអាស៊ាន-ជប៉ុនលើកទី ២៨ ស្តីពីការជំរុញបន្ថែម និងការអនុវត្តទស្សនវិស័យ អាស៊ានស្តីពីឥណ្ឌូ-ប៉ាស៊ីហ្វិក ។ ថ្នាក់ដឹកនាំបានអះអាងជាថ្មីអំពីការប្តេជ្ញាចិត្តក្នុងការពង្រឹងភាពជាដៃគូ គ្រប់ជ្រុងជ្រោយអាស៊ាន-ជប៉ុន ក្នុងនាមជាដៃគូដែលជឿជាក់គ្នា ចំពោះកិច្ចសហប្រតិបត្តិការក្រោមសសរស្តម្ភទាំងបី រួមមាន ដៃគូចិត្ត និងចិត្តគ្រប់ជំនាន់, ដៃគូសម្រាប់សហបង្កើតសេដ្ឋកិច្ច និងសង្គមនៃអនាគត និងដៃគូសម្រាប់សន្តិភាព និងស្ថិរភាព ដើម្បីអនាគតកាន់តែមានសុវត្ថិភាព ចីរភាព និងវិបុលភាព សម្រាប់ប្រជាជនទាំងសងខាង ។
សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់អំពីសារៈសំខាន់នៃការដំឡើងកម្រិតភាពជាដៃគូសេដ្ឋកិច្ចគ្រប់ជ្រុងជ្រោយឤស៊ាន-ជប៉ុន (AJCEP) និងការអនុវត្តប្រកបដោយប្រសិទ្ធភាព នៃភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ។ សម្ដេចបវរធិបតី ក៏បានគូសបញ្ជាក់បន្ថែមអំពី កិច្ចសហប្រតិបត្តិការក្នុងការជំរុញបរិវត្តកម្មឌីជីថល តាមរយៈផែនការការងារឌីជីថលអាស៊ាន-ជប៉ុនឆ្នាំ ២០២៥ និងមជ្ឈមណ្ឌលអាស៊ាន-ជប៉ុនសម្រាប់ការកសាងសមត្ថភាពសន្តិសុខសាយប័រ ព្រមទាំងតួនាទីដ៏សំខាន់របស់ជប៉ុនក្នុងការគាំទ្របរិវត្តកម្មថាមពលប្រកបដោយចីរភាព ។ ភាគីទាំងពីរទន្ទឹងរង់ចាំដល់ការពង្រឹងកិច្ចសហប្រតិបត្តិការលើវិស័យឌីជីថលបៃតង និងកំណើនប្រកបដោយបរិយាបន្ត ដើម្បីកសាងអនាគតរួមគ្នាមួយដែលកាន់តែមានសុវត្ថិភាព ស្ថិរភាព និងវិបុលភាព ៕
ចែករំលែកព័តមាននេះ