ខេត្តកំពង់ធំ ៖ ពិតជាឈាមស្រែកស្បែកហៅ ទីបំផុត ព្រលឹងជនរងគ្រោះជាមន្ត្រីនគរបាល បានអន្ទងសមត្ថកិច្ចឲ្យតាមចាប់ខ្លួនមេខ្លោងជនជួញដូរគ្រឿងញៀន និងបក្ខពួក ពាក់ព័ន្ធករណីបាញ់ប្រហារទៅនាយរងការិយាល័យប្រឆាំងគ្រឿងញៀនម្នាក់ បណ្តាលឱ្យពលី និងនាយរងផ្នែកម្នាក់របួស…
ខេត្តកំពង់ធំ ៖ ពិតជាឈាមស្រែកស្បែកហៅ ទីបំផុត ព្រលឹងជនរងគ្រោះជាមន្ត្រីនគរបាល បានអន្ទងសមត្ថកិច្ចឲ្យតាមចាប់ខ្លួនមេខ្លោងជនជួញដូរគ្រឿងញៀន និងបក្ខពួក ពាក់ព័ន្ធករណីបាញ់ប្រហារទៅនាយរងការិយាល័យប្រឆាំងគ្រឿងញៀនម្នាក់ បណ្តាលឱ្យពលី និងនាយរងផ្នែកម្នាក់របួស ដែលបានចុះបេសកកម្មបង្ក្រាបមុខសញ្ញាជួញដូរគ្រឿងញៀន នៅចំណុចភូមិបែកចាន ឃុំអណ្ដូងពោធិ៍ ស្រុកតាំងគោក ខេត្តកំពង់ធំ កាលពីថ្ងៃ២៣ តុលា ២០២៥ ។
ការចាប់ខ្លួនមេខ្លោងឧក្រិដ្ឋនជនជួញដូរគ្រឿងញៀននេះ បានធ្វើឡើងនៅយប់ថ្ងៃទី២៧ ខែតុលា ឆ្នាំ២០២៥ ដោយកម្លាំងសមត្ថកិច្ចនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិក្រសួងមហាផ្ទៃ សហការជាមួយកម្លាំងជំនាញនៃស្នងការដ្ឋាននគរបាលខេត្តកំពង់ធំ និងខេត្តបន្ទាយមានជ័យ ដែលជនសង្ស័យបានរត់គេចខ្លួនទៅស្នាក់នៅភូមិទួលពង្រ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។ ក្រោយការចាប់ខ្លួនមេខ្លោងជួញដូរគ្រឿង និងបក្ខពួក ត្រូវបានប្រគល់ឲ្យសមត្ថកិច្ចនគរបាលខេត្តកំពង់ធំជាម្ចាស់ករណី ដើម្បីបន្តនីតិវិធីតាមផ្លូវច្បាប់ ។
សូមជម្រាបថា កាលពីវេលាម៉ោងជាង៣រសៀលថ្ងៃទី២៣ ខែតុលា ឆ្នាំ២០២៥ សមត្ថកិច្ចការិយាល័យនគរបាលប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តកំពង់ធំ សហការជាមួយនគរបាលស្រុកតាំងគោក ក្រោមការសម្របសម្រួលពីស្ថាប័នអយ្យការអមសាលាដំបូងខេត្ត បានចុះប្រតិបត្តិការបង្ក្រាបករណីជូញដូរដោយខុសច្បាប់នូវសារធាតុញៀនមួយករណី នៅចំណុចភូមិបែកចាន ឃុំអណ្ដូងពោធិ៍ ស្រុកតាំងគោក ខេត្តកំពង់ធំ ។
ប៉ុន្តែអ្វីដែលត្រូវសោកស្តាយនោះ គឺការបាត់បង់អាយុជីវិតនាយរងការិយាល័យប្រឆាំងបទល្មើសគ្រឿងញៀនម្នាក់ និងនាយរងផ្នែកម្នាក់របួសធ្ងន់ក្នុងបេសកកម្ម ដោយសារមេខ្លោងឧក្រិដ្ឋជនគ្រឿងញៀនបាញ់ប្រហារ ។ សេចក្តីរាយការណ៍បន្តថា ជនរងគ្រោះដែលបានពលីជីវិត គឺលោកវរសេនីយ៍ទោ ហួន សាវ័យ មានតួនាទីជានាយរងការិយាល័យប្រឆាំងគ្រឿងញៀនខេត្តកំពង់ធំ និងលោកអនុសេនីយ៍ឯក ទឹម ចាន់នី(ជាកូនចៅ)រងរបួសធ្ងន់ ។ ប្រតិបត្តិការនេះ អនុវត្តតាមបទបញ្ជាពីលោកឧត្តមសេនីយ៍ទោ ស្នងការនគរបាលខេត្តកំពង់ធំ ដោយដឹកនាំកម្លាំងជំនាញចុះផ្ទាល់ គឺលោកវរសេនីយ៍ទោ ហួន សាវ័យ នាយរងការិយាល័យប្រឆាំងគ្រឿងញៀន ។
ជាដំបូង កម្លាំងសមត្ថកិច្ចបានចុះទៅធ្វើការស្រាវជ្រាវ និងឃាត់ខ្លួនជនសង្ស័យម្នាក់ជាមុខសញ្ញាចែកចាយថ្នាំញៀន និងចាប់ដកហូតវត្ថុតាងគ្រឿងញឿនមួយចំនួនផងដែរ ។ បន្ទាប់ពីឃាត់ខ្លួនជនសង្ស័យម្នាក់នោះបានសារភាពថា ថ្នាំញៀនដែលគេយកមកចែកចាយ និងលក់កន្លងមកនេះ គឺទិញពីឈ្មោះ ថន ឌីណា ភេទប្រុស អាយុ៣៤ឆ្នាំ ជាមេខ្លោងជួញដូរថ្នាំញៀនយ៉ាងសកម្ម ។
ក្រោយពេលស្តាប់ចម្លើយជនសង្ស័យរួចមក លោកវរសេនីយ៍ទោ ហួន សាវ័យ ក្នុងនាមជានាយរងការិយល័យបង្ក្រាបបទល្មើសគ្រឿងញៀន បានដឹកនាំកម្លាំងចុះទៅឡោមព័ទ្ធផ្ទះរបស់មេខ្លោងជួញដូរគ្រឿងញៀន ស្ថិតនៅស្រុកតាំងគោក ខេត្តកំពង់ធំ ដើម្បីឆែកឆេររកឈ្មោះ ថន ឌីណា ។
ខណៈសមត្ថកិច្ចបានចុះទៅដល់ទីតាំងនោះ ស្រាប់តែមានការរារាំងពីសំណាក់ឪពុក និងក្រុមគ្រួសាររបស់ជនសង្ស័យ ទើបធ្វើឲ្យជនសង្ស័យឈ្មោះ ថន ឌីណា មានឱកាសទាញយកកាំភ្លើងអាកា៤៧ បាញ់រះទៅលើសមត្ថកិច្ច បណ្ដាលឲ្យត្រូវលោកវរសេនីយ៍ទោ ហួន សាវ័យ ចំនួន២គ្រាប់ រហូតពលីជីវិតនៅកន្លែងកើតហេតុ និងលោកអនុសេនីយ៍ឯក ទឹម ចាន់នី រងរបួសជាទម្ងន់ ត្រូវដឹកទៅសង្គ្រោះបន្ទាន់ ។
ពេលនោះមេខ្លោងគ្រឿងញៀន ថន ឌីណា បានស្ទុះទៅយកកាំភ្លើងម៉ាកកា៥៩ មួយដើមពីសមត្ថកិច្ច ហើយរត់គេចខ្លួនដោយសុវត្តិភាព ទោះជាមេខ្លោងគ្រឿងញៀនរូបនោះរត់ទៅចូលក្រហែងណាក្តី សង្ឃឹមថា មិនយូមិនឆាប់ គង់តែជាប់អន្ទាក់របស់សមត្ថកិច្ច ។ ជាមួយនេះផងដែរ នៅថ្ងៃទី២៤ ខែតុលា ឆ្នាំ២០២៥ នាយឧត្តមសេនីយ៍ មាស វិរិទ្ធ អគ្គ លេ ខា ធិ ការ នៃ អាជ្ញា ធរជាតិប្រយុទ្ធប្រឆាំងគ្រឿងញៀន បានចេញសារលិខិតរំលែកទុក្ខផ្ញើជូន លោកស្រី យឹម ឆេងលី និងក្រុមគ្រួសារនាយនគរបាលរងគ្រោះ ៕
ចែករំលែកព័តមាននេះ