រាជធានីភ្នំពេញ ៖ ការប្រកួតកីឡាការ៉ាតេ-ដូ សូតូកង់ ពានរង្វាន់លោកបណ្ឌិត សុក ស៊ីផាន់ណា លើកទី១ ដែលបានចាប់ផ្តើមធ្វើនៅថ្ងៃទី៥ មេសា នោះបានបញ្ចប់ជាស្ថាពរកាលពីព្រឹកថ្ងៃទី៦ ខែមេសា ។
រាជធានីភ្នំពេញ ៖ ការប្រកួតកីឡាការ៉ាតេ-ដូ សូតូកង់ ពានរង្វាន់លោកបណ្ឌិត សុក ស៊ីផាន់ណា លើកទី១ ដែលបានចាប់ផ្តើមធ្វើនៅថ្ងៃទី៥ មេសា នោះបានបញ្ចប់ជាស្ថាពរកាលពីព្រឹកថ្ងៃទី៦ ខែមេសា ។
ពិធីបិទការប្រកួតត្រូវបានគេរៀបចំធ្វើនៅពហុកីឡដ្ឋានជាតិដោយមានការអញ្ជើញចូលរួមពីលោកបណ្ឌិត សុក ស៊ីផាន់ណា ទីប្រឹក្សារាជរដ្ឋាភិបាល និងជានាយកសាលាការ៉ាតេ-ដូ សូតូកង់កម្ពុជា, លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការអូឡាំពិកកម្ពុជា, លោកខៀវ កាញារីទ្ធ រដ្ឋមន្ត្រីក្រសួងព័ត៌មាន, លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, លោកហង់ ជួនណារុ៉ន រដ្ឋមន្ត្រីក្រសួងអប់រំ យុវជន និងកីឡា និងលោកលឹម គានហោ រដ្ឋមន្ត្រីក្រសួងធនធានទឹក និងឧតុនិយម ថ្នាក់ដឹកកីឡា និងកីឡាករ-កីឡាការិនីជាច្រើននាក់ទៀត ។
ជាលទ្ធផលសម្រាប់ការប្រកួតរយៈពេល២ថ្ងៃជាប់គ្នានោះមានដូចខាងក្រោម ៖
វិញ្ញាសាប្រកួតកាតាឯកត្តជនកុមារា អាយុ១០ឆ្នាំ ពូលA លេខ១ កីឡាករសំណាង រតនៈពិទូ មកពីសមាគមកីឡាក្រសួងការពារជាតិ និងពូលB លេខ១ កីឡាករឯក ជុតិមន្ត មកពីក្លិបមុនីឋាបនា ។ វិញ្ញាសាប្រកួតកាតាឯកត្តជនកុមារា អាយុ១៥ឆ្នាំ ពូលA លេខ១ កីឡាករមាន ឆានី មកពីសមាគមកីឡាក្រសួងការពារជាតិ និងពូលB លេខ១ កីឡាករមុនី ឧត្តម មកពីក្លិបរស្មីព្រះអាទិត្យ ។ វិញ្ញាសាប្រកួតកាតាឯកត្តជនបុរស អាយុ១៦ឆ្នាំ លេខ១ កីឡាករប៊ិន រ៉ាយ៉ា មកពីសមាគមកីឡាក្រសួងការពារជាតិ ។ វិញ្ញាសាប្រកួតកាតាឯកត្តជនកុមារី អាយុ១០ឆ្នាំ ពូលA លេខ១ កីឡាការិនីលី ស៊ូអុីង មកពីក្លិបឫស្សីកែវ និងពូលB លេខ១ កីឡាការិនីជូ ស៊ូមេថា មកពីសមាគមកីឡាអន្តរទ្វីប ។
វិញ្ញាសាប្រកួតកាតាឯកត្តជនកុមារី អាយុ១៥ឆ្នាំ ពូលA លេខ១ កីឡាការិនីស៊ុត ស្រីណែត មកពីក្លិបមូលនិធិកុមារកម្ពុជាទី២ និងពូលB លេខ១ កីឡាការិនីឆន ស្រីភា មកពីក្លិប Axiza’s Place និងវិញ្ញាសាប្រកួតកាតាឯកត្តជននារីអាយុ១៦ឆ្នាំ លេខ១ កីឡាការិនីនាង ស៊ីណា មកពីក្លិប Chibadia ។
វិញ្ញាសាប្រកួតជាក្រុមកុមារី អាយុ១០ឆ្នាំ លេខ១ បានទៅក្រុម Chibadia និង អាយុ១៥ឆ្នាំ លេខ១ បានទៅក្រុមមូលនិធិកុមារកម្ពុជាទី២។ វិញ្ញាសាប្រកួតជាក្រុមបុរស អាយុ១៦ឆ្នាំ លេខ១ បានទៅក្រុមក្រសួងការពារជាតិ ។ វិញ្ញាសាប្រយុទ្ធឯកត្តជននារីទម្ងន់៤៥គីឡូក្រាម លេខ១ កីឡាការិនីទឹម សារ៉ាន មកពីក្លិបមូលនិធិកុមារកម្ពុជាទី១, ទម្ងន់៥០គីឡូក្រាម លេខ១ កីឡាការិនីផេង ធី មកពីក្លិបសន្តិភាព និងទម្ងន់៥៥គីឡូក្រាម លេខ១ កីឡាការិនីខៀវ កោសត្យា មកពីក្លិបបញ្ញាសាស្ត្រ ។
វិញ្ញាសាប្រយុទ្ធឯកត្តជនបុរសទម្ងន់៧០គីឡូក្រាម លេខ១ កីឡាករលឹម បូរិន មកពីក្លិបបញ្ញាសាស្ត្រ និងវិញ្ញាសាប្រកួតទម្ងន់សេរី លេខ១ កីឡាករចាន់ រដ្ឋា មកពីក្លិបខេត្តសៀមរាប ។ លោកថោង ខុន មានប្រសាសន៍ថា បច្ចុប្បន្ននេះកីឡាការ៉ាតេដូ គឺជាប្រភេទកីឡាដែលពេញនិយមក្នុងសង្គមខ្មែរ ដូច្នេះយើងទាំងអស់គ្នាត្រូវលើកកម្ពស់ការគ្រប់គ្រងកែលម្អរបៀបរបបការងារ និងឧបត្ថម្ភគាំទ្រដល់ខេមរៈសហព័ន្ធកីឡាការ៉ាតេដូឱ្យមានភាពរឹងមាំកាន់តែខ្លាំងឡើងថែមទៀត ។ ជាពិសេសរៀបចំផែនការកសាងអភិវឌ្ឍន៍កីឡាករ-កីឡាការិនីក្មេងៗដើម្បីត្រៀមលក្ខណៈដណ្តើមជ័យលាភីក្នុងការប្រកួតកីឡា SEA Games ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។ ដូច្នេះការបង្កើតឱ្យមានព្រឹត្តិការណ៍នេះឡើងគឺជារឿងល្អណាស់សម្រាប់សង្គមជាតិយើង ព្រោះថាយើងអាចផ្តល់ឱកាសឱ្យក្មេងៗជំនាន់ក្រោយបានចូលរួមបញ្ចេញសមត្ថភាព ព្រមទាំងទទួលបានចំណេះដឹងថ្មីពីរាមច្បងជើងចាស់ទៀតផង ។
លោកសុក ស៊ីផាន់ណា ថ្លែងក្នុងឱកាសនោះថា គោលបំណងដែលយើងរៀបចំព្រឹត្តិការណ៍នេះឡើង គឺដើម្បីប្រមូលផ្តុំកីឡាករជើងចាស់ និងយុវជនជំនាន់ក្រោយទាំងអស់មកចូលរួមប្រកួតផ្លាស់ប្តូរបទពិសោធន៍គ្នាទៅវិញទៅមកដើម្បីពង្រីកសមត្ថភាពឱ្យបានកាន់តែល្អប្រសើរបន្ថែមទៀតក្នុងការត្រៀមដណ្តើមមេដាយឱ្យបានច្រើននៅពេលប្រទេសយើងធ្វើជាម្ចាស់ផ្ទះក្នុងការរៀបចំការប្រកួតកីឡា SEA Games នៅឆ្នាំ២០២៣ ក៏ដូចជាការចូលរួមប្រកួតព្រឹត្តិការណ៍អន្តរជាតិផ្សេងៗដើម្បីលើកកម្ពស់មុខមាត់ប្រទេសជាតិតាមរយៈកីឡានេះផងដែរ ៕
ចែករំលែកព័តមាននេះ