រាជធានីភ្នំពេញ ៖ សាលាឧទ្ធរណ៍ កាលពីព្រឹកថ្ងៃទី៧ មេសា ២០១៤ សម្រេចតម្កល់ការឃុំខ្លួននាងអូ រស្មី តារាចម្រៀងប្រចាំផលិតកម្មឆ្លងដែននិងរ៉ៃមាស តាមសាលាដំបូងរាជធានីភ្នំពេញដដែល ពោលគឺមិនអនុញ្ញាតឲ្យនាងបាននៅក្រៅឃុំនោះទេ ។
សាលាឧទ្ធរណ៍សម្រេចដូច្នេះមានន័យថា ដើម្បីទុកពេលឲ្យសាលាដំបូងបើកសវនាការលើអង្គសេចក្តី ហើយបើអនុញ្ញាតឲ្យនាងនៅក្រៅឃុំនោះ វាអាចប៉ះពាល់ដល់ការស៊ើបអង្កេតទៀតផង ។
គួរបញ្ជាក់ថា តារាចម្រៀងប្រចាំផលិតកម្មឆ្លងដែននិងរ៉ៃមាស នាង អូ រស្មី ត្រូវបានសមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជនរាជធានីភ្នំពេញចាប់ខ្លួន កាលពីថ្ងៃទី១៨ មករា ដោយជាប់ពាក់ព័ន្ធបទល្មើស(អូសទាញពេស្យាចារកុមារ) ជនរងគ្រោះជាអនីតិជនឲ្យទៅរួមភេទជាមួយភ្ញៀវ និងប្រព្រឹត្តអំពើសញ្ចារកម្មមានស្ថានទម្ងន់ទោសទាក់ទិននឹងជនរងគ្រោះ ។
តារាចម្រៀងរូបនេះឈ្មោះអូ រស្មី ភេទស្រី អាយុ៣៦ឆ្នាំ ស្នាក់នៅផ្ទះលេខ៨៦ ផ្លូវលេខ២ បុរីពិភពថ្មី សង្កាត់ចោមចៅ ខណ្ឌពោធិ៍សែនជយ័ រាជធានីភ្នំពេញ ។
ចែករំលែកព័តមាននេះ