ខេត្តបាត់ដំបង ៖ ផ្លូវលេខ១៥៧១A ប្រវែង១១.៦០០ម៉ែត្រ ទទឹង៥ម៉ែត្រ ស្ថិតនៅក្នុងឃុំបាយដំរាំ ស្រុកបាណន់ និងឃុំវត្តតាមឹម ស្រុកសង្កែ ខេត្តបាត់ដំបង បានកាត់ខ្សែបូរសម្ភោធឲ្យប្រើប្រាស់ជាផ្លូវការ កាលពីវេលារសៀល ម៉ោង១ថ្ងៃទី០៦ ខែមេសា ឆ្នាំ២០១៤ ក្រោមអធិបតីភាពលោកស ខេងឧបនាយករដ្ឋមន្រ្តីនិងជារដ្ឋមន្រ្តីក្រសួងមហាផ្ទៃនិងលោកចន្ទ សុផលអភិបាលខេត្តបាត់ដំបង ព្រមទាំងមន្ត្រីរាជការ ប្រជាពលរដ្ឋប្រមាណ៣០០នាក់បានមកចូលរួម។
លោកខាន់ ម៉ាណេរប្រធានមន្ទីរសាធារណះការនិងដឹកជញ្ជូនខេត្តបាត់ដំបងបានថ្លែងសុន្ទរកថាស្វាគមន៍និងអានរបាយការណ៍សាងសង់ក្នុងគំរោងអភិវឌ្ឍន៍ របស់រាជរដ្ឋាភិបាល ដែលមានសម្តេចតេជោ ហ៊ុន សែនជានាយករដ្ឋមន្ត្រី នៃព្រះរាជាណាចក្រកម្ពុជា បានជំរុញការកសាងប្រទេសកម្ពុជាគ្រប់វិស័យសំខាន់ផ្តោតលើហេដ្ឋារចនាសម្ព័ន្ឋ ដឹកជញ្ជូនដែលជាក្បាលរថភ្លើង នៃកំណើនសេដ្ឋកិច្ចនិងជាសរសៃឈាមតភ្ជាប់ ទៅគ្រប់ច្រកល្ហកក្នុងព្រះរាជាណាចក្រកម្ពុជា។
លោកបានបញ្ជាក់ផ្លូវនេះ មានសារះសំខាន់តភ្ជាប់ពីស្រុកសង្កែមកស្រុកបាណន់ដែលជាផ្លូវសំខាន់សំរាប់ការដោះដូរទំនិញភោគផលរបស់ប្រជាពលរដ្ឋទៅវិញទៅមកជាមួយគ្នានិងភ្ជាប់ចូលមកក្រុងបាត់ដំបង ដោយមានការអូសទាញវិស័យទេសចរណ៍បានយ៉ាងខ្លាំងផងដែរ ហើយត្រូវចំណាយថវិកាក្នុងឆ្នាំ២០១៣អស់ចំនួន៤៥៨៧លានរៀលទើបតែរួចរាល់នាពេលនេះ។ លោកបន្តទៀតថាគំរោងក្នុងឆ្នាំ២០១៤នេះគឺ មានចំនួន៤គំរោងបន្តទៀត គឺ១/ជួសជុលផ្លូវជាតិលេខ៥ពីស្ពានអូរតាគីដល់ប៉ោយសំរោង ដែលខូចខាតដោយសារទឹកជំនន់កន្លងមក។ ២/បន្តជួសជុលផ្លូវខេត្តលេខ១៥៧១Aពីឃុំបាយដំរាំទៅដល់ទំនប់ទឹកកង្ហតដោយក្រាលក្រួសក្រហមប្រវែង១៨៨០០ម៉ែត្រ។ ៣/ជួសជុលផ្លូវខេត្តលេខ១៥៦ពីផ្សារ ប្រហុកដល់សាលាតាអនក្រាលកៅស៊ូប្រវែង២២៥០០ម៉ែត្រ។ ៤/ការងារថែទាំ ផ្លូវជាតិ៣ខ្សែក្រាលកៅស៊ូប្រភេទDBSTប្រវែងសរុប២៧២,៤៨គីឡូម៉ែត្រ។ ថែទាំផ្លូវខេត្ត-ក្រុង ៣៤ខ្សែសរុបប្រវែង២៧៣,៩៣គីឡូម៉ែត្រ។បន្ទាប់មកលោកស ខេងឧបនាយករដ្ឋមន្ត្រីបានបញ្ជាក់ផងដែរថា ក្នុងខេត្តបាត់ដំបងនឹងទទួលបានប្រព័ន្ឋផ្លូវធំៗច្រើនខ្សែទៀតដែលត្រូវអនុវត្តន៍ក្នុងចុងឆ្នាំ២០១៤និងដើមឆ្នាំ២០១៥នេះមានដូចជា ១/ផ្លូវខេត្តលេខ១៥៧៧ ពីភូមិភ្ជាវស្រុករតនះមណ្ឌលទៅដល់ច្រកបួនរយព្រំដែនថៃស្រុកសំឡូតមានប្រវែង៥៥.២៩៩ម៉ែត្រ២/ផ្លូវវាងក្រុងបាត់ដំបងប្រវែង១៤គីឡូម៉ែត្រកាត់តាមភូមិសាស្រ្តឃុំបាដំរាំនិងពង្រីកផ្លូវជាតិលេខ៥ពីបាត់ដំបងទៅខេត្តបន្ទាយមានជ័យ។ ៣/ ផ្លូវពីខេត្តបាត់ដំបងទៅខេត្តសៀមរាបដោយកាត់តាមរនាមទន្លេសាបប្រវែង៧២គីឡូម៉ែត្រ(ដែលសព្វថ្ងៃទៅសៀមរាបកាត់តាមខេត្តបន្ទាយមានជ័យមានប្រវែង១៧២គីឡូម៉ែត្រ)។ ៤/ផ្លូវភ្ជាប់ពីកំពីងពួយទៅអូរដូនពៅដល់ពង្រមានប្រវែង១៧គីឡូម៉ែត្រ៥/គំរោងពង្រីកផ្លូវជាតិលេខ៥ពីបាត់ដំបងរហូតដល់ស្ពានព្រែកក្តាមឲ្យទៅជាផ្លូវអាស៊ានហាយវ៉េយ៍។
ក្រៅពីនោះរាជរដ្ឋាភិបាលមានគំរោងធំៗជាច្រើនទៀតដូចជាការភ្ជាប់ផ្លូវស្ពានពីខេត្តកំពង់ឆ្នាំងទៅខេត្តកំពង់ធំដោយឆ្លងកាត់បឹងទន្លេសាប ផ្លូវពីខេត្តពោធិសាត់ទៅខេត្តកោះកុងនិងផ្លូវខ្សែក្រវ៉ាត់ព្រំដែនទាំងអស់។
ចែករំលែកព័តមាននេះ