រាជធានីភ្នំពេញ ៖ ក្នុងកិច្ចពិភាក្សាការងារជាមួយលោករដ្ឋមន្ត្រីក្រសួងការងារ និងបណ្តុះ បណ្តាលវិជ្ជាជីវៈ កាលពីពេលថ្មីៗនេះនៅទីស្តីការក្រសួង លោកAndré POULLES ប្រធានទីភ្នាក់ងារបារាំងសម្រាប់ការភិវឌ្ឍ(AFD) ប្រចាំនៅកម្ពុជា និងឡាវ ចង់ដឹងពីគម្រោងអនុវត្តប្រាក់សោធននិវត្តន៍នៅឆ្នាំ២០១៥ របស់កម្ពុជាថាតើពាក់ព័ន្ធនឹងអ្វីខ្លះ ហើយតើត្រូវអនុវត្តជាជំហានៗដោយរបៀបណា?
ជាការឆ្លើយតប លោករដ្ឋមន្រ្តី អិុត សំហេង មានប្រសាសន៍ថា ចំពោះរបបធានារ៉ាប់រងសុខភាពការងារនេះ កម្ពុជានឹងចាប់ផ្តើមអនុវត្តនៅឆ្នាំ២០១៤ នេះប៉ុន្តែពេលនេះក្រសួងកំពុងរង់ចាំការរៀបចំបច្ចេកទេសព័ត៌មានវិទ្យាដែលមានរយៈពេល៥ខែទៀត ។ របបនេះ ត្រូវតែអនុវត្តចំពោះសមាជិក និងគ្រួសាររបស់គេ ប៉ុន្តែត្រូវអនុវត្តជាជំហានៗ។ ជំហានទី១ ត្រូវចាប់ផ្តើមពីសមាជិកសិន ហើយគោលដៅរបស់យើងគឺចង់ឱ្យវិភាគទានដល់សមាជិកគ្រួសាររបស់គេទៀត ។
លោករដ្ឋមន្ត្រី បានស្នើឱ្យកម្មវិធីជំនួយខាងផ្នែកសុខភាព(P4H)ដែលបានបង្កើតឡើងនៅកម្ពុជារបស់រដ្ឋាភិបាលបារំាង និងអាល្លឺម៉ង់ បន្តជួយទាក់ទងនឹងប្រព័ន្ធបច្ចេកទេសព័ត៌មានវិទ្យានេះដើម្បីកុំឱ្យមានការភ័ន្តច្រឡំព្រោះថាបើសិនជាគ្រប់គ្រងមិនបានច្បាស់លាស់ទេ នឹងអាចមានបញ្ហាកើតឡើងជាក់ជាមិនខាន ។ ក្រសួងការងារតែងតែសហការគ្នាជាមួយក្រសួងពាក់ព័ន្ធ ដើម្បីជំរុញឱ្យមានការអភិវឌ្ឍ ។ ទាក់ទងនឹងការស្នើឱ្យមានជំនួបរវាងP4H និងក្រសួងការងារ គឺត្រូវជួបគ្នារៀងរាល់៦ខែម្តងដើម្បីសិក្សាពីការអនុវត្តការងារទាក់ទងនឹងវិស័យរបបសន្តិសុខសង្គម ព្រមទាំងស្នើឱ្យP4Hបន្តជួយក្រសួងថែមទៀត ។
ចំពោះការអនុវត្តប្រាក់សោធននិវត្តន៍ នៅឆ្នាំ២០១៥ លោក អិុត សំហេង បានលើកឡើងថា នេះជាបញ្ហាដ៏ធំមួយដែលក្រសួងត្រូវតែគិតគូរឱ្យបានច្បាស់លាស់ ហើយចំណុចធំដំបូងបំផុតរបស់ក្រសួង គឺសិក្សាផ្នែកបច្ចេកទេសជាចាំបាច់ ។ ទាក់ទងនឹងបច្ចេកទេសនេះ គឺការរៀបចំវិភាគទានពេលនេះរហូតដល់សមាជិកបេឡាជាតិរបបសន្តិសង្គម(ប.ស.ស)ចូលនិវត្តន៍ថាតើធ្វើបែបណាដើម្បីឱ្យមាននិរន្តរភាព ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ