រាជធានីភ្នំពេញ ៖ ការប្រកួតកីឡាហែលទឹកជ្រើសរើសជើងឯកថ្នាក់ជាតិប្រចាំឆ្នាំ២០១៤ ដែលរៀបចំឡើងដោយនាយកដ្ឋានអប់រំកាយ និងកីឡា នៃក្រសួងអប់រំ យុវជន និងកីឡា សហការជាមួយសហព័ន្ធកីឡាហែលទឹកកម្ពុជា តាំងពីល្ងាចថ្ងៃទី១ មេសា មកនោះបានបញ្ចប់ជាផ្លូវការហើយ ។ ពិធីបិទការប្រកួតត្រូវបានគេរៀបចំធ្វើកាលពីល្ងាចថ្ងៃទី៥ មេសា នៅអាងហែលទឹកនៃពហុកីឡដ្ឋានជាតិអូឡាំពិក ក្រោមអធិបតីភាពលោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា ដោយមានការចូលរួមពីមន្ត្រីពាក់ព័ន្ធ និងកីឡាករ-កីឡាការិនីជាច្រើននាក់ ។ ជាការកត់សម្គាល់ ឆ្នាំនេះកីឡាករ-កីឡាការិនីមកពីសមាគមកីឡាក្រសួងមហាផ្ទៃដណ្តើមបានមេដាយច្រើនជាងគេ ។
មានប្រសាសន៍នាឱកាសនោះ លោកប៊ូ ជុំសេរី ឱ្យដឹងថា ឆ្លងតាមរបាយការណ៍នៃការប្រកួតនេះបានបញ្ជាក់ឱ្យឃើញពីការខិតខំប្រឹងប្រែងរបស់កីឡាករ-កីឡាការិនី និងគណៈកម្មការដែលបានរៀបចំការប្រកួតបានរលូនតាំងពីដើមរហូតដល់ចប់ ។ លោកបន្តថា ទោះជាយ៉ាងណា សមត្ថភាពបច្ចេកទេសរបស់កីឡាករ-កីឡាការិនីយើងនៅមានកម្រិតនៅឡើយ ដូច្នេះសូមឱ្យក្មួយៗបង្កើនការយកចិត្តទុកដាក់ហ្វឹកហាត់បន្ថែមទៀតដើម្បីឱ្យក្លាយជាជើងឯកដែលពូកែទាំងគុណភាព និងបច្ចេកទេស ជាពិសេសដើម្បីដើរឆ្ពោះទៅកាន់ការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះនាឆ្នាំ២០២៣ ខាងមុខ ។
សម្រាប់លទ្ធផលចំណាត់ថ្នាក់ផ្នែកក្របខ័ណ្ឌក១ ចំណាត់ថ្នាក់ជាក្រុមបានទៅសមាគមកីឡាក្រសួងមហាផ្ទៃ, លេខ២ បានទៅវិទ្យាល័យជម្ពូវ័ន និងលេខ៣ បានទៅមជ្ឈមណ្ឌលជាតិហ្វឹកហ្វឺនកីឡា ។
វិញ្ញាហែល១០០ម៉ែត្រសេរីផ្នែកបុរស លេខ១ បានទៅកីឡាករហែម ថុនពន្លឺ មកពីសមាគមកីឡាក្រសួងមហាផ្ទៃ ។ វិញ្ញាសាហែល១០០ម៉ែត្ររបៀបផ្ងារផ្នែកនារី លេខ១ បានទៅកីឡាការិនី ហែម ថុនវិទិនី មកពីសមាគមកីឡាក្រសួងមហាផ្ទៃ ។ វិញ្ញាសាហែល១០០ម៉ែត្ររបៀបមេអំបៅ លេខ១ បានទៅកីឡាករសុខ បញ្ញា មក ពីវិទ្យាល័យជម្ពូវ័ន និងផ្នែកនារីលេខ១ បានទៅកីឡាការិនីហែម ថុនវិទិនី មកពីសមាគមកីឡាក្រសួងមហាផ្ទៃ ។
វិញ្ញាសាហែល៤០០ម៉ែត្រ៤របៀប លេខ១ បានទៅលើកីឡាករហែម ថុនពន្លឺ មកពីសមាគមកីឡាក្រសួងមហាផ្ទៃ ។ វិញ្ញាសាហែលរបៀបកង្កែប២០០ម៉ែត្រ លេខ១ បានទៅកីឡាករហែម ថុនពន្លឺ មកពីសមាគមកីឡាក្រសួងមហាផ្ទៃ ។ ចំណែកក្របខ័ណ្ឌក២ វិញ ចំណាត់ថ្នាក់ជាក្រុមលើវិញ្ញាសាហែល៤របៀប ១០០ម៉ែត្រ៤ដង ចំណាត់ថ្នាក់លេខ១ បានទៅវិទ្យាល័យជម្ពូវ័ន, លេខ២ បានទៅក្លិបខេត្តកំពង់ចាម និងលេខ៣ បានទៅសមាគមកីឡាក្រសួងមហាផ្ទៃ។
វិញ្ញាសាហែល២០០ម៉ែត្រ៤របៀបផ្នែកនារី លេខ១ បានទៅកីឡាការិនី ប៊ុន រក្សា មកពីមជ្ឈមណ្ឌលជាតិហ្វឹកហ្វឺនកីឡា ។ វិញ្ញាសាហែល១០០ម៉ែត្រផ្ងារ បុរសលេខ១ បានទៅកីឡាករពេជ្រ ស៊ីថៃ មកពីក្លិបខេត្តកំពង់ចាម ។ វិញ្ញាសាហែល១០០ម៉ែត្រកង្កែប លេខ១ បានទៅកីឡាករអ៊ុង សារី មកពីក្លិបខេត្តកំពង់ចាម ។វិញ្ញាសាហែលសេរី៥០ម៉ែត្រ នារីលេខ១ បានទៅកីឡាការិនីសួង ជែសស៊ី មកពីសាលាអាយខេន ។
សូមបញ្ជាក់ថា ការប្រកួតឆ្នាំនេះមានសមាគម និងក្លិបចូលរួមចំនួន១៣ រួមមាន អនុវិទ្យាល័យទួលស្លែង, មជ្ឈមណ្ឌលជាតិហ្វឹកហ្វឺនកីឡា, ក្លិបគមនាគមន៍, ក្លិបយុវជនភូមិឫស្សី, វិទ្យាល័យជម្ពូវ័ន, អង្គការភាពញញឹមនៃកុមារ, មន្ទីរអប់រំយុវជន និងកីឡាខេត្តកណ្តាល, សាលាអាយខេន, សាលា ALIS, អនុវិទ្យាល័យទឹកល្អក់, អង្គការមិត្តសម្លាញ់, មន្ទីរអប់រំ យុវជន និងកីឡាខេត្តកំពង់ចាម និងសមាគមកីឡាក្រសួងមហាផ្ទៃ ។ សរុបកីឡាករ-កីឡាការិនីចូលរួមមានចំនួន៣០៩នាក់ ក្នុងនោះកីឡាការិនី៧៤នាក់ ៕
ចែករំលែកព័តមាននេះ