ខេត្តបន្ទាយមានជ័យ ៖ យុវជនម្នាក់ជាពលករឆ្លងដែនទៅធ្វើការនៅថៃខុសច្បាប់ត្រូវថៃចាប់បញ្ជូនមកទឹកដីខ្មែរវិញតាមច្រកទ្វារអន្តរជាតិប៉ោយប៉ែត តែដោយគ្មានប្រាក់ធ្វើដំណើរបន្តទៅស្រុកវិញបានដេកតាមដងផ្លូវ និងធ្វើដំណើរដោយថ្មើរជើងពីច្រកទ្វារអន្តរជាតិប៉ោយប៉ែតទៅស្រុកកំណើត។
ខេត្តបន្ទាយមានជ័យ ៖ យុវជនម្នាក់ជាពលករឆ្លងដែនទៅធ្វើការនៅថៃខុសច្បាប់ត្រូវថៃចាប់បញ្ជូនមកទឹកដីខ្មែរវិញតាមច្រកទ្វារអន្តរជាតិប៉ោយប៉ែត តែដោយគ្មានប្រាក់ធ្វើដំណើរបន្តទៅស្រុកវិញបានដេកតាមដងផ្លូវ និងធ្វើដំណើរដោយថ្មើរជើងពីច្រកទ្វារអន្តរជាតិប៉ោយប៉ែតទៅស្រុកកំណើត។
យុវជនខាងលើឈ្មោះឡេវ ខឿត អាយុ១៧ឆ្នាំ ជាក្មេងកំព្រា រស់នៅជាមួយជីដូនតាំងពីតូចក្នុងភូមិថ្នល់ដាច់ ឃុំបន្ទាយឆ្មារ ស្រុកថ្មពួក។ ខណៈយុវជនកំសត់រូបនេះកំពុងដើរតែម្នាក់ឯងនៅតាមដងផ្លូវ ហើយយកផ្លែស្វាយធ្វើជាអាហារ ភ្នាក់ងារកោះសន្តិភាពបានសួរនាំ និងដឹកយុវជនរូបនេះតាមម៉ូតូរហូតដល់ចំណុចភូមិជោគជ័យ ឃុំអូរបីជាន់ ហើយបានទិញនំ និងទឹក ព្រមទាំងជួយជាថវិកាសម្រាប់ចាយវាយដល់រូបគេបន្តិចបន្តួចទៀតផង។
យុវជនរូបនេះបានរៀបរាប់ថា គេទើបត្រូវសមត្ថកិច្ចថៃបញ្ជូនមកឱ្យសមត្ថកិច្ចកម្ពុជាតាមច្រកទ្វារអន្តរជាតិប៉ោយប៉ែតកាលពីព្រលប់ថ្ងៃទី៣ មេសា ២០១៤។ យុវជនរូបនេះបន្តទៀតថា មុនពេលសមត្ថកិច្ចថៃចាប់ រូបគេមានលុយ១.១០០បាត ប៉ុន្តែក្រោយពេលសមត្ថកិច្ចថៃចាប់ បានយកប្រាក់ពីរូបគេរហូត៣កន្លែង ហើយពេលមកដល់សមត្ថកិច្ចខ្មែរគេយក២០០បាតទៀតទើបអស់ប្រាក់ក៏បង្ខំចិត្តដើរតាមដងផ្លូវនៅបន្ទាត់ព្រំដែនពីច្រកទ្វារអន្តរជាតិប៉ោយប៉ែតរហូតដល់យប់ជ្រៅពេកមិនហ៊ានបន្តដំណើរក៏ចូលទៅដេកអត់បាយមួយយប់នៅភូមិព្រៃគប់ក្បែររបងវត្ត ដោយមិនហ៊ានសុំអ្នកស្រុកស្នាក់ឡើយ លុះព្រឹកឡើងទើបបន្តរហូតជួបជាមួយអ្នកយកព័ត៌មានតែម្តង។
យុវជនរូបនេះបន្តថា រូបគេបានចាញ់បោកមេខ្យល់អស់ប្រាក់ជិត៣ពាន់បាតដោយគេនាំទៅខេត្តឈុនបុរី ប្រទេសថៃធ្វើជាកម្មករសំណង់អស់រយៈពេល២ខែ ប៉ុន្តែមិនបានប្រាក់កម្លាំងពលកម្មទេ ព្រោះមេការជាខ្មែរកុហករូបគេថាថ្ងៃនេះ ថ្ងៃនោះ រូបគេទទួលបានត្រឹមតែប្រាក់ឱ្យខ្ចីមួយថ្ងៃបន្តិចបន្តួចសម្រាប់ទិញបាយហូបតែប៉ុណ្ណោះ។ ដោយមិនអាចទ្រាំរស់នៅបានក៏សម្រេចចិត្តរត់ត្រឡប់មកស្រុកវិញ ប៉ុន្តែពេលធ្វើដំណើរមកតាមផ្លូវក៏ត្រូវសមត្ថកិច្ចថៃឆែកឆេរគ្មានឯកសារឆ្លងដែនក៏ចាប់បញ្ជូនតាមរថយន្តទ្រុងមកកម្ពុជាវិញ។
ជុំវិញការលើកឡើងពីការយកប្រាក់ពលករបញ្ជូនតាមរថយន្តទ្រុងនេះ អ្នកយកព័ត៌មានមិនអាចទាក់ទងសុំការបំភ្លឺបានទេ ទាំងសមត្ថកិច្ចខ្មែរ និងថៃ៕
ចែករំលែកព័តមាននេះ