រាជធានីភ្នំពេញ ៖ ហាងកាហ្វេជនជាតិវៀតណាមមួយកន្លែង យីហោ ញៀម ធ្វី ស្ថិតនៅផ្ទះល្វែងលេខ១B ផ្លូវលេខ៣៥៥ ខាងជើងអង់តែនទូរទស្សន៍ជាតិ ក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ ត្រូវបានភ្លើងឆេះសម្ភារនៅក្នុងផ្ទះជាន់ទី១ អស់ទាំងស្រុង ។ ហេតុការណ៍នេះ កើតឡើងកាលពីវេលាម៉ោង៨ និង៣០នាទីព្រឹក ថ្ងៃទី៤ មេសា ហើយរថយន្តពន្លត់អគ្គិភ័យចំនួន៦គ្រឿង បានទៅអន្តរាគមន៍បាញ់ទឹកពន្លត់ អស់ប្រមាណ១ម៉ោង ទើបរលត់ ។
ទោះបីជាយ៉ាងណា ឧប្បត្តិហេតុនេះ ពុំបណ្តាលឱ្យមានមនុស្សស្លាប់ ឬរងរបួសធ្ងន់ឡើយ គឺមានតែបុរសជាម្ចាស់ហាង រងរបួសស្រាល ហើយត្រូវនគរបាលនាំទៅសាកសួរទាំង២នាក់ ប្តីប្រពន្ធផងដែរ ។ ហាងកាហ្វេដែលត្រូវភ្លើងឆេះនេះ មានម្ចាស់ឈ្មោះ ជា ពៅ អាយុ៣៣ឆ្នាំ និងប្រពន្ធឈ្មោះ លី វ៉ាន់យីម អាយុ៣២ឆ្នាំ ដែលបានជួលផ្ទះខាងលើ បើកហាងកាហ្វេ ក្នុង១ខែ តម្លៃ៥០០ដុល្លារ។ ប្រភពព័ត៌មានពីមន្ត្រីនគរបាលមូលដ្ឋាន ឱ្យដឹងថា មូលហេតុដែលកើតមានអគ្គិភ័យនេះ បណ្តាលមកពីទុស្សេចរន្តភ្លើងចេញពីបារ៉ែតភ្លើងជាន់ទី១ ខាងមុខ ហើយកម្ទេចភ្លើងបានធ្លាក់ទៅលើពូក និងខោអាវ និងឆេះរាលដាលទៅដល់របស់របរក្នុងផ្ទះយ៉ាងពេញបន្ទុក ។
តាមស្ត្រីជាម្ចាស់ហាង និយាយថា មុនពេលកើតមានអគ្គិភ័យ គាត់កំពុងលក់ដូរនៅខាងក្រោម ស្រាប់តែភ្លើងឆេះនៅជាន់ទី១ ផ្សែងហុយទ្រោម ចេញមកខាងក្រៅ បង្កឱ្យមានការភ្ញាក់ផ្អើល ហើយប្រជាពលរដ្ឋបាននាំគ្នាយកបំពង់ពន្លត់អគ្គិភ័យ ជួយបាញ់ពន្លត់ ប៉ុន្តែមិនអាចទប់ស្កាត់បាន ព្រោះភ្លើងបានឆេះរាលដាលយ៉ាងឆាប់រហ័ស ។ បន្ទាប់មក រថយន្តពន្លត់អគ្គិភ័យចំនួន៦គ្រឿង បានមកអន្តរាគមន៍ ជួយបាញ់ទឹកពន្លត់ ។ ទោះបីជាយ៉ាងណា របស់របរក្នុងផ្ទះជាន់ទី១ ត្រូវភ្លើងឆេះអស់គ្មានសល់ ៕
ចែករំលែកព័តមាននេះ