រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ស្ថានទូតអាមេរិក ដែលកោះសន្តិភាពទទួលបានកាលពីថ្ងៃទី៣ មេសា ឆ្នាំ២០១៤ ឱ្យដឹងថា ដើម្បីជាការរំលឹកដល់ទិវាយល់ដឹងអំពីគ្រាប់មីនអន្តរជាតិ និងជំនួយក្នុងសកម្មភាពមីន លោក William E. Todd ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា បានប្រគល់បរិក្ខារដោះមីនក្រោមទឹកដល់មជ្ឈមណ្ឌលសកម្មភាពកម្ចាត់មីនកម្ពុជា (CMAC) ហើយបានសម្ពោធឃ្លាំងមួយដែលត្រូវបានជួសជុលសម្រាប់អង្គភាពដោះមីនក្រោមទឹករបស់ CMAC នៅក្នុងពិធីមួយនៅក្នុងខេត្តកំពង់ឆ្នាំងកាលពីថ្ងៃទី៣ មេសា ២០១៤ ។
ក្រសួងការពារប្រទេសសហរដ្ឋអាមេរិក បានផ្តល់បរិក្ខារសម្រាប់ដោះមីនក្រោមទឹក ដែលរួមមានទូកខ្យល់ ស្នប់ខ្យល់ ថង់ម៉ាស៊ីនបូម និងបរិក្ខារមុជទឹកដទៃទៀត ។ ក្រសួងការពារប្រទេសសហរដ្ឋអាមេរិកបានផ្តល់ថវិកាសម្រាប់ការជួសជុលឃ្លាំង ។ អំណោយនោះបញ្ជាក់ពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិកចំពោះការពង្រឹងសមត្ថភាពរបស់រាជរដ្ឋាភិបាលកម្ពុជា ក្នុងការលុបបំបាត់គ្រាប់មីន សំណល់ គ្រាប់ផ្ទុះពីសង្គ្រាម និងយុទ្ធភណ្ឌមិនទាន់ផ្ទុះនៅក្នុងទន្លេមេគង្គ និងនៅទូទាំងប្រទេស ។ លោកឃឹម សោភ័ណ្ឌ ទីប្រឹក្សាអាជ្ញាធរសកម្មភាពកម្ចាត់មីនកម្ពុជា និងលោកហេង រតនា អគ្គនាយក CMAC ក៏បានចូលរួមក្នុងពិធីនោះដែរ។
លោកឯកអគ្គរដ្ឋទូត William E. Todd មានប្រសាសន៍ថា «វាជាការគួរឱ្យស្តាយដែលគ្រាប់មីន និងយុទ្ធភណ្ឌមិនទាន់ផ្ទុះគឺជាស្ថានភាពសោកនាដកម្មមួយនៅកម្ពុជា ។ នៅពេលយើងធ្វើការលុបបំបាត់កេរដំណែលដ៏គ្រោះថ្នាក់នៃសង្គ្រាម យើងកំពុងតែធ្វើការដើម្បីធ្វើឱ្យភពផែនដីក្លាយជាកន្លែងមួយមានសុវត្ថិភាពដោយការពារជីវិតជនស្លូតត្រង់ និងបង្កើនឱកាសសេដ្ឋកិច្ច និងសង្គមដល់ប្រជាជនមួយចំនួនដែលស្ថិតនៅក្នុងស្ថានភាពដ៏ពិបាកខ្លាំងនៅលើពិភពលោក»។
ក្នុងរយៈពេល២០ឆ្នាំកន្លងទៅ សហរដ្ឋអាមេរិកបានចំណាយថវិកាចំនួនជាង៦១លានដុល្លារអាមេរិកក្នុងការដោះមីន និងបោសសម្អាតយុទ្ធភណ្ឌមិនទាន់ផ្ទុះនៅកម្ពុជា តាមយៈជំនាញបច្ចេកទេសរបស់ CMAC ក្រុមប្រឹក្សាសកម្មភាពមីន អង្គការ Hazardous Areas Life-Support Organization Trust, Golden West Foundation និងអង្គការ Norwegian People’s Aid ។ នៅក្នុងសកម្មភាពនាថ្ងៃនោះ អង្គការទាំងនេះបានបង្ហាញសមត្ថភាពដោះមីនរបស់គេ ដោយបានធ្វើការបង្ហាញនូវសកម្មភាពរបស់ឆ្កែហិតមីន ការស្ទង់រកមើលគ្រាប់បែកចង្កោម ការដោះមីនដោយប្រើគ្រឿងចក្រ ការរាវរកលោហធាតុ និងការប្រមូលយកគ្រឿងផ្ទុះ៕
ចែករំលែកព័តមាននេះ