ខេត្ដកំពង់ឆ្នាំង ៖ ឈើប្រណីតប្រភេទនាងនួនចំនួន៣០ដុំធំៗ ត្រូវបានកងរាជអាវុធហត្ថខេត្ដប៉ុស្ដិ៍សន្ដិសុខលេខ៥០០ ស្ទាក់ចាប់បានកាលពីវេលាម៉ោង១០និង៣០នាទីព្រឹកថ្ងៃទី៣ មេសា នៅលើកំណាត់ផ្លូវជាតិលេខ៥ ក្នុងភូមិចម្ការស្វាយ ឃុំស្វាយ ស្រុកសាមគ្គីមានជ័យ ខណៈឈើទាំងនោះត្រូវបានគេលួចដឹកតាមរថយន្ដហ៊ីយ៉ាន់ដាយពណ៌ស មួយគ្រឿងបង្កប់ក្រោមបាវអង្កាម២០បាវបន្លំភ្នែកសមត្ថកិច្ច ។
មន្ដ្រីកងរាជាអាវុធហត្ថប៉ុស្ដិ៍សន្ដិសុខលេខ៥០០ បានឱ្យដឹងថា តាមផែនការរបស់លោកមេបញ្ជាការកងរាជអាវុធហត្ថខេត្ដ ក្នុងកិច្ចការពារសណ្ដាប់ធ្នាប់ សន្ដិសុខ ទប់ស្កាត់ការបះបោរធ្វើបាតុកម្ម នៅព្រឹកថ្ងៃទី៣ មីនា មន្ដ្រីកងរាជអាវុធហត្ថប៉ុស្ដិ៍សន្ដិសុខលេខ៥០០ បានចេញល្បាតនៅក្នុងភូមិសាស្រ្ដរបស់ខ្លួន ។ នៅវេលាម៉ោងជាង១០ព្រឹកថ្ងៃនោះ បានឃើញរថយន្ដហ៊ីយ៉ាន់ដាយ ពណ៌ស មួយគ្រឿង គ្មានស្លាកលេខ បើកបរពីជើងទៅត្បូងគួរឱ្យសង្ស័យក៏រាយការណ៍ជូនលោកមេបញ្ជាការ និងលោកព្រះរាជអាជ្ញាខេត្ដ សុំស្ទាក់ឃាត់ដើម្បីត្រួតពិនិត្យ ។ ពេលស្ទាក់ជាប់ អ្នកបើកបររថយន្ដ និងព្រូបានឈប់ហើយចុះរត់គេចខ្លួនបាត់ លុះសមត្ថកិច្ចឆែកឆេរនៅក្រោមបាវអង្កាម២០បាវរកឃើញឈើប្រណីតចំនួន៣០ដុំ ។
តាមបញ្ជារបស់ថ្នាក់លើ ឈើប្រណីតនិងរថយន្ដមួយគ្រឿងនេះត្រូវបានបញ្ជូនទៅផ្នែករដ្ឋបាលព្រៃឈើកំពង់ត្រឡាច ដើម្បីកសាងសំណុំរឿងចាត់ការតាមច្បាប់ ។ ក្រោយពីត្រួតពិនិត្យនិងវាស់វែងរួមគ្នាជាមួយសមត្ថកិច្ចក្នុងការស្នាក់ការផ្នែករដ្ឋបាលព្រៃឈើកំពង់ត្រឡាច សមត្ថកិច្ចឱ្យដឹងថា ឈើប្រណីតប្រភេទនាងនួនទាំង៣០ដុំនេះ មានចំនួនស្មើនឹង១,៤៣៨ម៉ែត្រគូប ។
សូមបញ្ជាក់ថា បទល្មើសដឹកឈើប្រណីតឆ្លងកាត់ពីខេត្ដមួយទៅខេត្ដមួយមានគ្រប់រូបភាព ដែលករណីនេះប្រជាពលរដ្ឋក៏ដូចជាអាជ្ញាធរខេត្ដ ស្នើសុំឱ្យគណៈកម្មការចម្រុះបង្ក្រាបបទល្មើសថ្នាក់ខេត្ដបង្កើនសកម្មភាពបង្ក្រាបឱ្យបានយ៉ាងសកម្មផងកុំឱ្យឃុបឃិតជាមួយបទល្មើស ដើម្បីទប់ស្កាត់បទល្មើសនេះឱ្យបាន សំដៅចូលរួមចំណែកការពារធនធានព្រៃឈើរបស់ជាតិឱ្យបានគង់វង្សទុកឱ្យកូនចៅជំនាន់ក្រោយ ។
មុននេះ ឈើប្រណីតប្រភេទធ្នង់និងនាងនួនត្រូវបានគេមើលឃើញថា ធ្វើចរាចរណ៍លើផ្លូវជាតិលេខ៥ ជារៀងរាល់យប់ ខណៈការបង្ក្រាបរបស់សមត្ថកិច្ចគ្រប់ផ្នែកនៅតាមដងផ្លូវនៅមានកម្រិត ទើបធ្វើឱ្យមានការសង្ស័យថា មានការបើកដៃឱ្យឈ្មួញដឹកជញ្ជូនតាមអំពើចិត្ដ លុះយូរៗម្ដងទើបមានការបង្ក្រាបយកស្នាដៃ ឬអាចនិយាយបានថា លោតឆត្រមិនបានបង់លុយ ។
ជាក់ស្ដែង កាលពីវេលាម៉ោង៤និង៤០នាទីទៀបភ្លឺថ្ងៃទី២ មេសា សមត្ថកិច្ចចម្រុះបានស្ទាក់ចាប់រថយន្ដទួរីស មួយគ្រឿងដឹកឈើប្រណីតប្រភេទនាងនួន មានមុខកាត់ធំៗនៅលើផ្លូវជាតិលេខ៥ ស្ថិតក្នុងភូមិពោធិ៍រិទ្ធក្រៃ ឃុំស្វាយ ស្រុកទឹកផុស ។
មន្ដ្រីរដ្ឋបាលព្រៃឈើបានឱ្យដឹងថា រថយន្ដទួរីសដឹកឈើប្រណីតខុសច្បាប់នេះ ពណ៌ខៀវ ពាក់ស្លាកលេខ ភ្នំពេញ 2Q-0129 ធ្វើដំណើរក្នុងទិសដៅពីជើងមកត្បូងឆ្លងកាត់ទីរួមខេត្ដ ។ ដោយមានការសង្ស័យរួមផ្សំនឹងការផ្ដល់ព័ត៌មានពីបណ្ដាញផង ទើបសមត្ថកិច្ចចម្រុះដឹកនាំដោយលោក ថោង វីរ៉ាវុឌ្ឍី នាយរងខណ្ឌរដ្ឋបាលព្រៃឈើកំពង់ឆ្នាំង បានចែកគ្នាជា២ក្រុម គឺមួយក្រុមជាអ្នកដេញពីក្រោយ និងមួយក្រុមទៀតជាអ្នកចាំស្ទាក់ចាប់នៅខាងមុខ ហើយក៏ស្ទាក់ចាប់បានរថយន្ដល្មើសនោះនៅចំណុចខាងលើ ប៉ុន្ដែពេលស្ទាក់ចាប់បាននោះ អ្នកបើកបរនិងព្រូបានគេចខ្លួនបាត់ ។
ឮក្រោយពេលចាប់បានរថយន្ដដឹកឈើនេះ មន្ដ្រីជំនាញបាននាំយកទៅផ្នែករដ្ឋបាលព្រៃឈើកំពង់ត្រឡាច ដើម្បីវាស់វែងនិងមានចំនួន២៦ដុំ ប្រវែងចាប់ពី១ទៅ២ម៉ែត្រ ស្មើនឹង១,៣៧៧ម៉ែត្រគូប ។ ឈើទាំងនេះរួមជាមួយរថយន្ដ ត្រូវបានរក្សាទុកនៅផ្នែករដ្ឋបាលព្រៃឈើកំពង់ត្រឡាច ដើម្បីចាត់ការតាមនីតិវិធី ៕
ចែករំលែកព័តមាននេះ