ខេត្តរតនគីរី ៖ គ្រោះថ្នាក់ចរាចរណ៍ដ៏រន្ធត់បំផុត ខណៈស្ត្រីជាម្តាយនិងកូនជិះម៉ូតូចេញពីមណ្ឌលសុខភាពបម្រុងឆ្លងថ្នល់ ត្រូវរថយន្តសណ្តោងដឹកគ្រាប់ស្វាយចន្ទីចំណុះរាប់សិបតោន គេចមិនទាន់កិនខ្ទេចសាច់ទាំង២នាក់ដូចសាច់ចិញ្ច្រាំគួរឱ្យតក់ស្លុត កាលពីវេលាម៉ោង១២និង១០នាទីថ្ងៃត្រង់ ថ្ងៃទី៣ មេសា នៅភូមិ១ ឃុំទ្បាមិញ ស្រុកបរកែវ តាមបណ្តោយផ្លូវជាតិលេខ៧៨ ពីក្រុងបានលុងទៅស្រុកអូរយ៉ាដាវ ត្រង់ចំណុចផ្លូវភ្លោះ មុខមន្ទីរពេទ្យបង្អែកស្រុកបរកែវ ។
តាមសាក្សីដែលបានឃើញហេតុការណ៍នេះផ្ទាល់ភ្នែកបានឱ្យដឹងថា មុនពេលកើតហេតុ គេឃើញរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ ៣B-៣៣៤៤ សណ្តោងរ៉ឺម៉កដឹកគ្រាប់ស្វាយចន្ទីពេញ ហើយការបើកបរមិនលឿនប៉ុន្មានទេ ក្នុងទិសដៅពីលិចទៅកើត ខណៈមកដល់កន្លែងកើតហេតុ ស្រាប់តែមានម៉ូតូឌ្រីម ពណ៌ខ្មៅ ស៊េរីចាស់អត់ស្លាកលេខមួយគ្រឿង បើកបរដោយបុរសម្នាក់ ដែលគេសង្ស័យថាជាអ្នករត់ម៉ូតូឌុប បានដឹកស្ត្រីម្នាក់ ដែលចងក្រមាស្ពាយកូនពីមុខជិះចេញពីមន្ទីរពេទ្យបង្អែកស្រុកបរកែវ ឆ្លងកាត់មុខរថយន្ត ធ្វើឱ្យអ្នកបើកបររថយន្តស្រទ្បាំងកាំងជាន់ហ្វ្រាំងមិនទាន់ ក៏បុកម៉ូតូខ្ទាតម្តាយនិងកូន ដែលអង្គុយខាងក្រោយចូលក្រោមរថយន្តកិនបែកសាច់ខ្ទេចទាំង២នាក់គួរឱ្យរន្ធត់បំផុត ដែលជាហេតុការណ៍កម្រនឹងកើតមាន ។
ចំណែកបុរសជាអ្នកបើកបរម៉ូតូសំណាងណាស់ខ្ទាតចេញពីកង់រថយន្តទៅចិញ្ចើមផ្លូវរួចពីសេចក្តីស្លាប់ ហើយបានរត់គេចខ្លួនបាត់ ។ ស្ត្រីរងគ្រោះដែលស្លាប់នេះ ឈ្មោះ ក្វាស់ ស្កាន់ អាយុ៣៥ឆ្នាំ និងកូនឈ្មោះ ក្វាស់ សារ៉ាន់ ភេទស្រី អាយុ៥ឆ្នាំ ជាជនជាតិទំពួន មានលំនៅភូមិចែត្រ ឃុំស៊ើង ស្រុកបរកែវ រីឯអ្នកបើករថយន្តដឹកគ្រាប់ចន្ទី បានបើករថយន្តហួសកន្លែងកើតហេតុប្រហែលជា១០០ម៉ែត្រ ក៏បើកទ្វាររថយន្តចុះរត់គេចខ្លួនបាត់ដែរ ។ រថយន្តនិងម៉ូតូ ត្រូវនគរបាលយកមករក្សាទុកនៅអធិការដ្ឋាននគរបាលស្រុកបរកែវ ដើម្បីដោះស្រាយតាមនីតិវិធី ។ សពស្ត្រីនិងកូនប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។
គួរបញ្ជាក់ថា បំណែកសពម្តាយនិងកូន ត្រូវសាច់ញាតិប្រមូលកើបដាក់ចូលក្នុងការុងបញ្ចូលគ្នា ព្រោះមិនដឹងថា ជាសាច់ឆ្អឹងនរណាជាម្តាយនរណាជាកូននោះទេ ដូចគេកើបសាច់ចិញ្ច្រាំដាក់ស្បោងអុីចឹងដែរ ។ លោកអនុសេនីយ៍ឯក រស់ វឌ្ឍនា អធិការរងស្រុកបរកែវ បានឱ្យដឹងថា ជារឿយៗប្រជាពលរដ្ឋ ដែលរស់នៅក្នុងតំបន់នេះ ភាគច្រើនជាជនជាតិដើមភាគតិច ការបើកបរពុំសូវយល់ដឹងពីច្បាប់ចរាចរណ៍ប៉ុន្មានទេ ដោយគេបើកបរម៉ូតូពាសវាលពាសកាល ពុំដឹងបញ្ច្រាសឬបណ្តោយទ្បើយ ដែលប្រការនេះ ទាមទារឱ្យមានការអប់រំណែនាំពីច្បាប់ចរាចរណ៍ឱ្យបានស៊ីជម្រៅបន្ថែមទៀត ហើយក៏សូមអំពាវនាវដល់អ្នកបើកបរគ្រប់រូប ពិសេសយានធំៗត្រូវប្រុងប្រយ័ត្នឱ្យបានខ្ពស់ពេលបើកចូលមកតំបន់នេះ ៕
ចែករំលែកព័តមាននេះ