លោកហ្វ្រេតឌី រ៉ូច ដែលជាគ្រូបង្ហាត់បាននិយាយថា សិស្សគុនរបស់ខ្លួនម៉ានី ប៉ាក់គីអាវ អាចនឹងជួបប្រកួតជាមួយកីឡាករអាមេរិក ហ្វ្លយ មេវេដឌ័រ ក្នុងថ្ងៃណាមួយជាមិនខាននាពេលអនាគត ។ ប៉ុន្តែនៅចំពោះមុខគ្រូបង្ហាត់វ័យ៥៤ឆ្នាំរូបនេះបានឱ្យដឹងថា កិច្ចការសំខាន់ៗដែលសិស្សរបស់ខ្លួនត្រូវធ្វើគឺប្រកួតសងសឹកដើម្បីលុបលាងភាពអាម៉ាស់ជាមួយកីឡាករ ធីម៉ូធី ប្រែ៊តលី និងកីឡាករម៉ានូអែល ម៉ាកហ្គេស ។
ថ្លែងនៅឯក្លឹបហ្វឹកហាត់ Wild Card ក្នុងទីក្រុង Los Angeles កាលពីថ្ងៃពុធសប្តាហ៍នេះ លោករ៉ូចបញ្ជាក់ថា ៖«នៅក្នុងបណ្តាសៀវភៅប្រវត្តិសាស្ត្រគឺនិយាយថា អ្នកត្រូវតែសងសឹកនឹងការបរាជ័យ គឺត្រូវតែសងសឹកនឹងការបរាជ័យក្នុងជីវិត» ។លោកបន្តថា ភាពល្បីល្បាញរបស់ប៉ាក់គីអាវ នៅពេលនេះគឺអាស្រ័យខ្លាំងបំផុតលើការយកឈ្នះប្រែ៊តលី និងម៉ាកហ្គេស ដែលរូបគេបានចាញ់កាលឆ្នាំ២០១២ ។ វាជាការប្រកួតពីរដាច់ពីគ្នាដែលប៉ាក់គីអាវ ត្រូវតែរួសរាន់ធ្វើឱ្យបានឆាប់មុនការជួបជាមួយ មេវេដឌ័រ ។
សូមបញ្ជាក់ថា នៅរាត្រីថ្ងៃសៅរ៍ទី១២ ខែមេសានេះ ប៉ាក់គីអាវនឹងឡើងសង្វៀនប្រកួតដណ្តើមខ្សែក្រវាត់ស្ថាប័ន WBO ក្នុងប្រភេទទម្ងន់ Welterweight ពីកីឡាករប្រែ៊តលី ។ ការប្រកួតនេះនឹងរៀបចំនៅសង្វៀន MGM Grand ស្ថិតក្នុងទីក្រុងឡាសវេហ្គាស រដ្ឋនេវ៉ាដា សហរដ្ឋអាមេរិក ។ ការជួបគ្នាលើកទី១ កាលពីខែមិថុនា ឆ្នាំ២០១២ ប៉ាក់គីអាវ ត្រូវចៅក្រមកាត់សេចក្តីឱ្យចាញ់ពិន្ទុប្រែ៊តលី ហើយលទ្ធផលនាពេលនោះបាននាំឱ្យអ្នកទស្សនាក៏ដូចជាបណ្តាអ្នកគាំទ្រប៉ាក់គីអាវមានប្រតិកម្ម ។ ចំណែកប៉ាក់គីអាវ ខ្លួនគេផ្ទាល់ក៏យល់ថា នោះជាការសម្រេចយ៉ាងអយុត្តិធម៌ ។
កីឡាករវ័យ៣៥ឆ្នាំរូបនេះបានថ្លែងថា ៖«យើងគិតថា លទ្ធផលការប្រកួតចុងក្រោយរបស់យើងត្រូវបានគេប្លន់យក ។ ក្នុងខណៈ នេះ យើងចាំបាច់ត្រូវតែធានាថា យើងដណ្តើមបានជ័យជម្នះ ។ ចំពោះការប្រកួតបន្ទាប់ទៀត ខ្ញុំមិនទាន់គិតទេ ។ អ្វីដែលខ្ញុំគិតគឺការប្រកួតនៅខែនេះ»៕
ចែករំលែកព័តមាននេះ