រាជធានីភ្នំពេញ ៖ សហព័ន្ធកីឡាចំបាប់កម្ពុជា សហការជាមួយនាយកដ្ឋានអប់រំកាយ និងកីឡា បានប្រកាសពីការរៀបចំការប្រកួតកីឡាចំបាប់ជ្រើសរើសជើងឯកថ្នាក់ជាតិប្រចាំឆ្នាំ២០១៤ ដែលមានរយៈពេល៥ថ្ងៃ គឺចាប់ពីថ្ងៃទី៥ រហូតដល់ថ្ងៃទី៩ ខែមេសានេះ ក្នុងសាលប្រកួតកីឡាចំបាប់នៃពហុកីឡដ្ឋានជាតិ ។
រាជធានីភ្នំពេញ ៖ សហព័ន្ធកីឡាចំបាប់កម្ពុជា សហការជាមួយនាយកដ្ឋានអប់រំកាយ និងកីឡា បានប្រកាសពីការរៀបចំការប្រកួតកីឡាចំបាប់ជ្រើសរើសជើងឯកថ្នាក់ជាតិប្រចាំឆ្នាំ២០១៤ ដែលមានរយៈពេល៥ថ្ងៃ គឺចាប់ពីថ្ងៃទី៥ រហូតដល់ថ្ងៃទី៩ ខែមេសានេះ ក្នុងសាលប្រកួតកីឡាចំបាប់នៃពហុកីឡដ្ឋានជាតិ ។
សម្រាប់ការប្រកួតឆ្នាំនេះមានសមាគម និងក្លិបចូលរួមចំនួន១០ រួមមាន សមាគមកីឡាចំបាប់ក្រសួងមហាផ្ទៃ, សមាគមកីឡាចំបាប់រិទ្ធិសែន, សមាគមកីឡាចំបាប់យាយព្រីងមានរិទ្ធ, សមាគមកីឡាចំបាប់ឃ្លាំងមឿង, សមាគមកីឡាចំបាប់បារមីម៉ឺនឯក, សមាគមកីឡាចំបាប់វិហារសួគ៌, សមាគមកីឡាចំបាប់ស្វាយពោធិ៍, ក្លិបកីឡាចំបាប់ CICI, ក្លិបកីឡាចំបាប់ល័ក្ខរ៉ៃយុ៉ង និង Phnom Penh Wrestling Club សរុបកីឡាករ-កីឡាការិនីមានចំនួន២៧០នាក់ ។
លោកធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជាបានប្រាប់ឱ្យដឹងថា ការរៀបចំព្រឹត្តិការណ៍នេះឡើង គឺពិតជាបាននាំមកនូវឱកាសក្នុងការស្វែងរកកីឡាករ-កីឡាការិនីដែលមានសមត្ថភាពពិតប្រាកដដើម្បីបន្តវេនពីក្រុមជម្រើសជាតិ និងជាថ្នាលសម្រាប់ដំណើរឆ្ពោះទៅប្រកួតកីឡា SEA Games ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ ។ លោកបន្តថា ក្រៅពីរៀបចំព្រឹតិ្តការណ៍ប្រកួតថ្នាក់ជាតិ សហព័ន្ធកីឡាចំបាប់កម្ពុជា សហការជាមួយក្លិបកីឡាចំបាប់ភ្នំពេញ (Phnom Penh Wrestling Club) ដែលមានលោក Casey Barnett ជាម្ចាស់ក្លិបមានទទួលបើកបង្ហាត់ចំបាប់សម្រាប់កីឡាករ-កីឡាការិនីវ័យក្មេងដែលមានចិត្តស្រឡាញ់វិស័យកីឡា ។ ចំពោះការហ្វឹកហាត់គឺនៅរៀងរាល់ថ្ងៃសៅរ៍ និងថ្ងៃអាទិត្យ ដោយមាន២ពេល គឺពេលព្រឹកចាប់ពីម៉ោង៨ដល់ម៉ោង១០ និងពេលរសៀលចាប់ពីម៉ោង៣ ដល់ម៉ោង៥ល្ងាច នៅពហុកីឡដ្ឋានជាតិអូឡាំពិក ។
គួរបញ្ជាក់ថា សហព័ន្ធកីឡាចំបាប់កម្ពុជា តែងតែរៀបចំការប្រកួតថ្នាក់ជាតិជារៀងរាល់ឆ្នាំ ដើម្បីជ្រើសរើសរកកីឡាករ-កីឡាការិនីដែលមានសមត្ថភាពពិតប្រាកដ ត្រៀមប្រកួតក្នុងព្រឹត្តិការណ៍ថ្នាក់ជាតិធំៗ និងការប្រកួតលើឆាកអន្តរជាតិជាដើម ។ កាលពីចុងឆ្នាំ២០១៣ កន្លងទៅនេះ ប្រភេទកីឡាចំបាប់កម្ពុជាដណ្តើមបានមេដាយចំនួន១០គ្រឿងពីព្រឹត្តិការណ៍ SEA Games លើកទី២៧ នៅប្រទេសមីយ៉ាន់ម៉ា ក្នុងនោះមេដាយមាស៤គ្រឿង ប្រាក់២គ្រឿង និងសំរឹទ្ធ៤គ្រឿង ៕
ចែករំលែកព័តមាននេះ