រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា (FFC) កាលពីថ្ងៃទី៣ មេសា ឆ្នាំ២០១៤ បានចេញសេចក្តីជូនដំណឹងដល់បណ្តាក្លិបបាល់ទាត់ទាំងអស់ស្តីពីការកែសម្រួលកម្មវិធីប្រកួតដណ្តើមពានរង្វាន់ Metfone Cambodian League ២០១៤ នេះ ។ សេចក្តីជូនដំណឹងដែលចុះហត្ថលេខាដោយលោកគល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជាបានឱ្យដឹងថា ក្រោមជំនួយរបស់សហព័ន្ធកីឡាបាល់ទាត់អន្តរជាតិ (FIFA) សហព័ន្ធកីឡាបាល់ទាត់កម្ពុជានឹងរៀបចំស្ថាបនាទីលានបាល់ទាត់ក្នុងពហុកីឡដ្ឋានជាតិ ដែលកំពុងតែប្រើប្រាស់សព្វថ្ងៃនេះទៅជាទីលានប្រកួតដែលប្រើប្រាស់ស្មៅសិប្បនិម្មិតវិញ ។
ដើម្បីអាចឱ្យដំណើរការរៀបចំស្ថាបនាទីលានខាងលើនេះប្រព្រឹត្តទៅបានតាមការគ្រោងទុក សហព័ន្ធកីឡាបាល់ទាត់កម្ពុជាបានកែសម្រួលកម្មវិធីប្រកួតមិត្តហ្វូនខេមបូឌានលីកឆ្នាំ២០១៤ ឱ្យបញ្ចប់ជាស្ថាពរនៅខែកក្កដា ឆ្នាំ២០១៤ ខាងមុខនេះ ។ យោងតាមកម្មវិធីប្រកួតថ្មីដែលសហព័ន្ធកីឡាបាល់ទាត់កម្ពុជាផ្តល់ជូននោះ គឺការប្រកួតចាប់ផ្តើមនៅរសៀលថ្ងៃទី៥ មេសានេះ ដែលមាន៤ប្រកួត លេងលើ២ទីលាន ។ សម្រាប់ទីលានស្តាតចាស់ ការប្រកួតចាប់ផ្តើមនៅម៉ោង១៣និង៣០នាទីតទៅ ដែលជាការប្រកួតរវាងក្រុមសាកលវិទ្យាល័យអាស៊ីអឺរុ៉ប និងក្រុម Albirex Niigata Phnom Penh ។ មួយប្រកួតទៀត ក្រុមខេត្តស្វាយរៀងប្រកួតជាមួយក្រុមណាហ្គាខប ។
ចំពោះទីលានពហុកីឡដ្ឋានជាតិវិញ ការប្រកួតចាប់ផ្តើមនៅម៉ោង១៥និង៣០នាទីតទៅ រវាងក្រុមគីរីវង់សុខសែនជ័យ ប្រកួតជាមួយក្រុមបៀលប្រាយយូណាយធីត ។ មួយប្រកួតទៀត ក្រុមអគ្គស្នងការដ្ឋាននគរបាលជាតិ ប្រកួតជាមួយក្រុមភ្នំពេញក្រោន ៕
ចែករំលែកព័តមាននេះ