ប្រទេសប៉ាគីស្ថាន ៖ ការរញ្ជួយដីកម្លាំង៥,២រីស្ទ័រមួយបណ្ដាលឲ្យមនុស្សស្លាប់យ៉ាងតិច២២នាក់និងរបួសជាង៣០០នាក់ កាលពីថ្ងៃទី២៤កញ្ញាក្នុងផ្នែកកាស្មៀរត្រួតត្រាដោយប៉ាគីស្ថាន។ ការរញ្ជួយដីនេះក៏បណ្ដាយឲ្យផ្ទះសម្បែងនិងហេដ្ឋារចនាសម្ព័ន្ធជាច្រើនរងការខូចខាតផងដែរ ក្នុងតំបន់នោះនៃជួរភ្នំហ៊ីម៉ាឡៃយ៉ា។
យោងតាមវិទ្យាស្ថានភូគម្ភសាស្ត្រ អាមេរិកUSGSថា ចំណុចកណ្ដាលនៃការរញ្ជួយដីនោះស្ថិតនៅចម្ងាយ២២,៣គីឡូម៉ែត្រខាងជើងទីក្រុងJHELUM ចន្លោះរវាងខេត្តPENDJABនិងតំបន់កាស្មៀរក្រោមការកាន់កាប់របស់ប៉ាគីស្ថាន។ ការរញ្ជួយដីនេះកើតមានក្នុងជម្រៅ១០គីឡូម៉ែត្រនាំឲ្យមានការញ័ររញ្ជួយ ក្នុងផ្នែកមួយដ៏ធំនៃខេត្តPENDJAB និងក្នុងផ្នែកមួយចំនួននៃខេត្តKHYBER PAKHTUNKHWA ភាគពាយ័ព្យប៉ាគីស្ថាន។
ការរញ្ជួយដីនេះប៉ះពាល់ខ្លាំងដល់ទីក្រុងMIRPUR ជាទីក្រុងមួយនៃតំបន់កាស្មៀរប៉ាគីស្ថាន ស្ថិតនៅក្បែរចំណុចកណ្ដាលនៃការរញ្ជួយដីនោះ។ ប្រមុខប៉ូលិសក្រុង MIRPURម្នាក់ថ្លែងថា មនុស្សយ៉ាងតិច២២នាក់បានត្រូវស្លាប់និងជាង៣០០នាក់ទៀតរងរបួស។ ចំណែកអ្នកទទួលខុសត្រូវម្នាក់នៃតំបន់កាស្មៀរប៉ាគីស្ថានរៀបរាប់ពីមនុស្សស្លាប់ជាង២០នាក់និងរបួសជាង៣០០នាក់។ ផ្ទះចំនួន៤០០ខ្នងនៃភូមិSAHANKIKRIជាយក្រុងMIRPURរងការខូចខាតឬរងការបំផ្លាញទាំងស្រុង។
កាលពីថ្ងៃទី៨តុលាឆ្នាំ២០០៥តំបន់កាស្មៀរក្រោមការត្រួតត្រារបស់ប៉ាគីស្ថាន ធ្លាប់រងគ្រោះរួចហើយដោយការរញ្ជួយដីខ្លាំងមួយ មានកម្លាំង៧,៦រីស្ទ័រ បណ្ដាលឲ្យមនុស្សស្លាប់ដល់ជាង៧៣.០០០នាក់ហើយមនុស្សប្រមាណជា៣,៥លាននាក់បាត់បង់ទីជម្រក។
ការញ្ជួយដីថ្មីនេះក៏បណ្ដាលឲ្យផ្លូវថ្នល់និងស្ដានរងការខូចខាត បង្កោលភ្លើងនានាដូលរលំ។ បណ្ដាសារព័ត៌មានប៉ាគីស្ថានបានបង្ហាញបណ្ដារូបភាពនៃរថយន្តធ្លាក់ជាប់ក្នុងជង្ហុកផ្លូវដែលប្រេះបែក ព្រមទាំងរថយន្តបឺសដែលក្រឡាប់។ ពួកអ្នកជួយសង្គ្រោះបានត្រូវដាក់ពង្រាយ ហើយសភាពការណ៏ពេលនេះអាចគ្រប់គ្រងបាន៕ (កែសម្រួលដោយ ៖ បុប្ផា)
ចែករំលែកព័តមាននេះ