ប្រទេសបង់ក្លាដែស ៖ ការកើនឡើងតម្លៃប្រេងដែលបណ្តាលមកពីជម្លោះនៅមជ្ឈិមបូព៌ាបានបង្កឱ្យមានភាពចលាចលយ៉ាងខ្លាំងនៅក្នុងប្រទេសបង់ក្លាដែស បង្កើតទៅជាការខឹងសម្បារ និងឈានដល់ការប្រើប្រាស់អំពើហិង្សានៅតាមបណ្តាស្ថានីយប្រេងឥន្ធនៈ រហូតដល់មានអ្នកស្លាប់បាត់បង់ជីវិតទៀតផង។
នៅក្នុងប្រទេសបង់ក្លាដែសដែលនាំចូលប្រេងឆៅ និងប្រេងសាំង ៩៥% បច្ចុប្បន្នកំពុងរឹតបន្តឹងសន្តិសុខយ៉ាងខ្លាំងក្លាបំផុត ដោយទាហានត្រូវបានដាក់ពង្រាយនៅតាមឃ្លាំងស្តុកប្រេងសំខាន់ៗ ខណៈប៉ូលិសកំពុងល្បាតនៅក្នុង និងជុំវិញស្ថានីយប្រេងឥន្ធនៈនានា។
បុគ្គលិកស្ថានីយ៍ប្រេងឥន្ធនៈម្នាក់ បានប្រាប់ AFP ដោយរៀបរាប់អំពីអំពើហិង្សាមួយកើតឡើងនៅថ្ងៃទី៨ ខែមីនា ថា «យើងមិនទាន់ទទួលបានការផ្គត់ផ្គង់ពីឃ្លាំងប្រេងឥន្ធនៈនៅឡើយទេ ប៉ុន្តែអ្នកបើកបរម៉ូតូមួយចំនួនមិនស្តាប់ ហើយបានវាយបំផ្លាញស្ថានីយ៍តែម្តង។លុះនៅថ្ងៃទី១០ ខែមីនា ស្ថានីយ៍ដដែលនោះ ដែលស្ថានីយ៍ចំណាស់ជាងគេមួយក្នុងរដ្ឋធានីដាកា (Dhaka) បានព្យួរបដាសុំទោស ព្រោះអស់ប្រេងឥន្ធនៈលក់ឱ្យអតិថិជន។
ប្រទេសអាស៊ីខាងត្បូងដែលមានប្រជាជន ១៧០ លាននាក់មួយនេះ បានចាប់ផ្តើមកាត់បន្ថយការប្រើប្រាស់ប្រេងឥន្ធនៈ តាមរយៈវិធានការជាច្រើន រួមទាំងលុបចោលការតាំងពិព័រណ៍ភ្លើងអបអរសាទរ ដោយសារតែកង្វះថាមពល។
រឿងដ៏ភ្ញាក់ផ្អើលមួយកើតឡើង បន្ទាប់ពីបុរសម្នាក់ត្រូវបានសម្លាប់នៅយប់ថ្ងៃទី៧ ខែមីនា នៅក្នុងស្រុក Jhenaidah ភាគខាងត្បូងប្រទេសបង់ក្លាដែស បន្ទាប់ពីមានជម្លោះជាមួយនឹងបុគ្គលិករឿងចាក់សាំង។ ក្រោយមក ប៉ូលិសបានអះអាងថា បន្ទាប់ពីការស្លាប់របស់បុរសវ័យ២៥ឆ្នាំរូបនេះ ហ្វូងមនុស្សដែលមានកំហឹងបានដុតឡានក្រុងចំនួន ៣ គ្រឿង និងវាយបំផ្លាញស្ថានីយ៍ប្រេងឥន្ធនៈមួយកន្លែងផងដែរ។
រហូតដល់ថ្ងៃទី១០ ខែមីនា ឆ្នាំ២០២៦ គេនៅតែសង្កេតឃើញយានយន្តជាច្រើនតម្រង់ជួរចាំចាក់សាំងនៅតាមស្ថានីយប្រេងឥន្ធនៈនានា ជាពិសេសយានយន្តតម្រង់ជួរចាំលាតសន្ធឹងប្រវែង ១,៥ គីឡូម៉ែត្រឆ្លងកាត់កណ្តាលទីក្រុងដាកា៕ ប្រភព ៖ AFP និង The Star
ចែករំលែកព័តមាននេះ