រាជធានីភ្នំពេញ ៖ សមាសភាពគូប្រកួតប្រដាល់ដណ្តើមខ្សែក្រវាត់ស្រាបៀរលីអូ ក្នុងប្រភេទទម្ងន់៦០គីឡូក្រាមនៅលើសង្វៀនទូរទស្សន៍ CTN នារសៀលថ្ងៃសៅរ៍ ទី៥ មេសា ស្អែកនេះ ជ័យ ប៊ុនសង់ មកពីក្លិបខេមរិន្ទមានឫទ្ធិ ត្រូវបានអ្នកនិយមទស្សនាកីឡាប្រដាល់ភាគច្រើនគិតថា អាចបន្តសន្លប់នៅក្រោមកណ្តាប់ដៃ ឡៅ ចន្ទ្រា មកពីក្លិបទ័ពពិសេសឆត្រយោង៩១១ មិនខានឡើយ ខណៈខុន ស៊ីចាន់ មកពីក្លិបកងពលធំអន្តរាគមន៍លេខ៣ ព្រះវិហារ និងយស់ សំអាល់ មកពីក្លិបឃ្លាំងមឿងកីឡាខេត្តពោធិ៍សាត់ ជួបគ្នាលើកនេះអត់មានខាងណាហ៊ានអួតទុកមុនពីលទ្ធផលចាញ់ឈ្នះឡើយ ។
ជ័យ ប៊ុនសង់ ស្ថិតក្នុងសភាពវេទនាបំផុត ដោយប្រកួតបាន៣លើកត្រូវគូប្រកួតវាយឱ្យសន្លប់ទាំង៣លើក ។ លើកទី១ ត្រូវ យស់ សំអាល់ ទាត់ឱ្យខូចជើងមិនអាចប្រកួតកើតនៅត្រឹមទឹកទី១ លើកទី២ ត្រូវ ឆាយ មាស មកពីក្លិបសំរោងកោងខេត្តបាត់ដំបង វាយឱ្យសន្លប់នៅទឹកទី៤ និងលើកចុងក្រោយចាញ់សន្លប់ទឹកទី៣ ក្រោមផ្លែជង្គង់របស់ សុខ សុវណ្ណ មកពីក្លិបកងពលតូចលេខ៣១ ។ ចំណែកលើកនេះមានការវាយតម្លៃជាទូទៅថា ជ័យ ប៊ុនសង់ មិនអាចគេចផុតពីចាញ់សន្លប់ក្រោមផ្លែកែង និងជង្គង់របស់ ឡៅ ចន្ទ្រា បានឡើយ ដោយសារតែគេដឹងថា ទាំងល្បិចប្រយុទ្ធ និងកម្លាំង គឺមិនអាចទៅរួចជាមួយឡៅ ចន្ទ្រា ទេ ។ ឡៅ ចន្ទ្រា ពេលនេះគេកំពុងតែមានពិន្ទុនាំមុខគេនៅក្នុងតារាងដាច់តែម្តង បន្ទាប់ពីប្រកួតឈ្នះ៣លើកជាប់គ្នា ។ មិនតែបុ៉ណ្ណោះ នៅក្នុងចំណោមកីឡាករជើងខ្លាំងទាំង៨រូប ឡៅ ចន្ទ្រា ត្រូវបានគេចាត់ទុកថាខ្លាំងលើសគេ ធ្វើឱ្យគេជឿជាក់ថា កីឡាកររូបនេះនឹងបន្តឈ្នះលើកនេះទៀតមិនខាន ។
ខុន ស៊ីចាន់ និងយស់ សំអាល់ ជួបគ្នាលើកនេះទាំងសងខាងស្ថិតក្នុងភាពមន្ទិលរៀងខ្លួន ដោយមិនហ៊ានអះអាងទុកមុនពីលទ្ធផលចាញ់-ឈ្នះឡើយ ដោយសារពួកគេមានសមត្ថភាពប្រហែលគ្នា ។ ៣ប្រកួតកន្លងមក ខុន ស៊ីចាន់ ឈ្នះ១ប្រកួត ចាញ់២ប្រកួត ឯយស់ សំអាល់ ឈ្នះ២ប្រកួត ចាញ់១ប្រកួត ។ ដូច្នេះ ខុន ស៊ីចាន់ បើលើកនេះចាញ់ទៀត គឺអស់ផ្លូវអ៊ុតហើយ ឯយស់ សំអាល់ ស្ថិតនៅក្នុងភាពប្រទាញប្រទង់នៅឡើយ បើសិនជាចាញ់ ក៏យ៉ាប់បន្តិចដែរ តែបើសិនជាឈ្នះគឺមានសង្ឃឹមច្រើនក្នុងការឡើងទៅប្រកួតនៅវគ្គបន្ត ៕
ចែករំលែកព័តមាននេះ