រាជធានីភ្នំពេញ ៖ ថវិកាជាង២ម៉ឺនដុល្លារដែលប្រមូលបានពីការរៀបចំព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរនៅក្នុងទឹកដីខេត្តសៀមរាបកាលពីឆ្នាំ២០១៣ កន្លងទៅ ត្រូវបានប្រគល់ជូនដល់អង្គការមនុស្សធម៌ក្នុងស្រុកមួយចំនួននៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីរសៀលថ្ងៃទី១ មេសា ។
រាជធានីភ្នំពេញ ៖ ថវិកាជាង២ម៉ឺនដុល្លារដែលប្រមូលបានពីការរៀបចំព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរនៅក្នុងទឹកដីខេត្តសៀមរាបកាលពីឆ្នាំ២០១៣ កន្លងទៅ ត្រូវបានប្រគល់ជូនដល់អង្គការមនុស្សធម៌ក្នុងស្រុកមួយចំនួននៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីរសៀលថ្ងៃទី១ មេសា ។
ពិធីប្រគល់-ទទួលថវិកានេះស្ថិតក្រោមអធិបតីភាពលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ដោយមានការចូលរួមពីលោកសែម ផល្លា មន្ត្រីរៀបចំព្រឹត្តិការណ៍ម៉ារ៉ាតុង និងបណ្តាអង្គការដែលមកទទួលយកថវិកាផងដែរ ។ លោកវ៉ាត់ ចំរើន អគ្គលេខាធិការ NOCC បានឱ្យដឹងថា ថវិកាដែលត្រូវផ្តល់ជូននេះមានចំនួន២៣.៤០០ដុល្លារសហរដ្ឋអាមេរិក គឺជាថវិកាបានមកពីព្រឹតិ្តការណ៍រត់ពាក់កណ្តាលម៉ារ៉ាតុងអន្តរជាតិនៅខេត្តសៀមរាបក្នុងឆ្នាំ២០១៣ កន្លងមក ។ ថវិកាចំនួន២៣.៤០០ដុល្លារនេះត្រូវផ្តល់ជូនអង្គការ Cambodia Trust ដែលធ្វើការភាគច្រើនផ្តោតទៅលើជនរងគ្រោះដោយសារគ្រាប់មីនចំនួន២.៦០០ដុល្លារ ។
អង្គការ Sport for Disabled ផ្នែកអត្តពលិកកម្មជនពិការចំនួន២.៤០០ដុល្លារ, អង្គការ Handicap International ចំនួន២.០០០ដុល្លារ ។ អង្គការ Hearts of Gold ដែលជាដៃគូធំបំផុតរបស់គណៈកម្មាធិការជាតិអូឡាំពិកកម្ពុជា ក្នុងការរៀបចំព្រឹត្តិការណ៍រត់ម៉ារ៉ាតុងចំនួន៨.៤០០ដុល្លារ ដែលថវិកាទាំងអស់នេះអង្គការនេះត្រូវយកទៅបែងចែកបន្តដល់៤គម្រោងទៀតរួមមាន កីឡាជនពិការ២.៤០០ដុល្លារ, គម្រោងអភិវឌ្ឍន៍កីឡាសម្រាប់យុវជន២.០០០ដុល្លារ ជួយដល់វិទ្យាស្ថានជាតិអប់រំកាយ និងកីឡា២.០០០ដុល្លារ និងជួយដល់កុមារកំព្រា២.០០០ដុល្លារ ។ លោកវ៉ាត់ ចំរើន បន្តថា ថវិកាដែលយើងបានផ្តល់ជូនខាងលើនេះ គឺសម្រាប់អ្នកដែលបានមកទទួលផ្ទាល់ ចំណែកថវិកាដែលត្រូវប្រគល់ជូនកាកបាទក្រហមកម្ពុជា ដែលមានចំនួន៨.០០០ដុល្លាររយៈពេល២ឆ្នាំនោះ យើងនឹងយកទៅប្រគល់ជូនដោយផ្ទាល់នៅពេលឆាប់ៗខាងមុខនេះ ដោយរង់ចាំសុំការអនុញ្ញាតពីសម្តេចកិត្តិព្រឹទ្ធបណ្ឌិតជាមុនសិន ។
លោកបញ្ជាក់ថា រាល់ការរៀបចំកម្មវិធីរត់ពាក់កណ្តាលម៉ារ៉ាតុងនៅសៀមរាបចាប់ពីឆ្នាំនេះតទៅ ថវិកាដែលទទួលបាននឹងបន្តប្រគល់ជូនទៅអង្គការទាំងអស់នេះតាមធនធានចំណូលដែលទទួលបានជារៀងរាល់ឆ្នាំ ៕
ចែករំលែកព័តមាននេះ