រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរភ្នំពេញ ក្នុងប្រភេទទម្ងន់៥៤គីឡូក្រាម បានប្តូរទីតាំងមកប្រកួតនៅលើរេញស្តាតចាស់ នាថ្ងៃព្រហស្បតិ៍ ទី៣ មេសាខាងមុខនេះ ។ កែវ សុផានិត មកពីក្លិបសំរោងកោងកីឡាខេត្តបាត់ដំបង ជួបជាមួយជន សាវុធ មកពីក្លិបពោធិជ័យកីឡា ចំណែកអាន មុន្នី មកពីក្លិបយុវជនកម្ពុជា ខណ្ឌមានជ័យ ជួបជាមួយ ខុន សីហា មកពីក្លិបកងពលធំអន្តរាគមន៍លេខ៣ ព្រះវិហារ។
កែវ សុផានិត មកដល់ពេលនេះប្រកួតបាន៣លើករួចមកហើយ ក្នុងនោះឈ្នះ១ ចាញ់២ ។ ការមកប៉ះ ជន សាវុធ លើកនេះមិនទាន់ដឹងថា គេអាចទៅរួច ឬយ៉ាងណានោះឡើយ ។ រីឯ ជន សាវុធ វិញប្រកួតបាន៣លើកដូចគ្នា ឈ្នះ២ ចាញ់១ បើប្រសិនជាលើកនេះឈ្នះគេមានសង្ឃឹមច្រើនក្នុងការឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀត ឯ កែវ សុផានិត វិញ បើឈ្នះជាការល្អ បុ៉ន្តែបើចាញ់ទំនងជាអស់ផ្លូវអ៊ុតហើយ ។ សម្រាប់អ្នកនិយមតាមដានការប្រកួតភាគច្រើនគេមានជំនឿចិត្តលើ ជន សាវុធ ច្រើនជាងដោយសារ ជន សាវុធ មានល្បិចប្រយុទ្ធនៅលើសង្វៀនល្អជាង ពោលគឺទាំងផ្លែកែង និងជង្គង់ គេអាចវាយចេញបានរហ័ស និងចំគោលដៅបានល្អទៀតផង ។
អាន មុន្នី និងខុន សីហា ក៏ប្រកួតបាន៣លើកដូចគ្នា តែលទ្ធផលមិនដូចគ្នាទេ ដោយអាន មុន្នី ឈ្នះ១ ចាញ់២ ឯ ខុន សីហា ឈ្នះ២ ចាញ់១ ។ រវាងគូនេះ បើនិយាយពីល្បិចប្រយុទ្ធនៅលើសង្វៀន គឺមិនលើសខ្វះគ្នាបុ៉ន្មានឡើយ គ្រាន់តែខុន សីហា មានចិត្តសឿងជាងបុ៉ណ្ណោះ ជាហេតុធ្វើឱ្យអ្នកមើលភាគច្រើនមានជំនឿចិត្តលើ ខុន សីហា ថានឹងឈ្នះការប្រកួតលើកនេះ ៕
ចែករំលែកព័តមាននេះ