ខេត្តព្រះសីហនុ ៖ នៅព្រឹកថ្ងៃទី១ មេសា ២០១៤ គណៈប្រតិភូមួយក្រុមដឹកនាំដោយលោកជំទាវប្រាក់ ច័ន្ទសុខា អភិបាលរងខេត្តព្រះសីហនុ លោកជំទាវជ្រា ពៅ លូ គឹមឈន់ អនុប្រធានកិត្តិយសសមាគមនារីកម្ពុជាដើម្បីសន្តិភាព និងការអភិវឌ្ឍន៍ខេត្តព្រះសីហនុ រួមជាមួយគណៈប្រតិភូជាច្រើនរូបបានចុះសួរសុខទុក្ខយុវជនបន្សាបសារធាតុញៀនចំនួន២៦នាក់ នៅក្នុងមូលដ្ឋានកងរាជអាវុធហត្ថក្រុងព្រះសីហនុ។
លោកវរសេនីយ៍ត្រីហ៊ត សីហា មេបញ្ជាការកងរាជអាវុធហត្ថក្រុងព្រះសីហនុបានឡើងធ្វើរបាយការណ៍ជូនថ្នាក់ដឹកនាំ ដោយបានបញ្ជាក់ថា មណ្ឌលបន្សាបសារធាតុនេះត្រូវបានបង្កើតឡើងនៅឆ្នាំ២០៨ ក្នុងស្ថានភាពមួយដ៏លំបាក ហើយមណ្ឌលកែប្រែបន្សាបសារធាតុញៀន គឺជាមណ្ឌលកូនពៅគេក្នុងចំណោមមណ្ឌលបន្សាបសារធាតុញៀនទាំង៣កន្លែងក្នុងព្រះរាជាណាចក្រកម្ពុជា។ មណ្ឌលនេះថ្វីដ្បិតតែមានទ្រង់ទ្រាយតូចជាងគេយ៉ាងណាក្តីក៏មណ្ឌលមួយនេះបានទទួលការសរសើរពីថ្នាក់ដឹកនាំគ្រប់គ្រងសារធាតុញៀននៃព្រះរាជាណាចក្រកម្ពុជាផងដែរ។
លោកមេបញ្ជាការកងរាជអាវុធហត្ថក្រុងព្រះសីហនុបានបន្តថា មណ្ឌលបន្សាបសារធាតុញៀនកងរាជអាវុធហត្ថក្រុងព្រះសីហនុធ្លាប់ធ្វើការបន្សាបសារធាតុញៀនដល់យុវជនបានចំនួន២៦៣នាក់ និងបានត្រឡប់ទៅកាន់លំនៅឋានវិញចំនួន២៣៧នាក់ បច្ចុប្បន្នស្នាក់នៅចំនួន២៦នាក់។
សូមបញ្ជាក់ផងដែរថា ក្នុងឱកាសចុះសួរសុខទុក្ខប្អូនៗក្មួយៗដែលកំពុងអប់រំកែប្រែបន្សាបសារធាតុញៀន លោកជំទាវប្រាក់ ច័ន្ទសុខា អភិបាលរងខេត្តព្រះសីហនុ និងគណៈប្រតិភូសមាគមនារីដើម្បីសន្តិភាព និងអភិវឌ្ឍខេត្តព្រះសីហនុបាននាំយកអំណោយមួយចំនួនទៅចែកជូនក្មួយៗទាំង២៦នាក់ក្នុងមណ្ឌលបន្សាយសារធាតុញៀន ក្នុងនោះមានគ្រឿងឧបភោគ បរិភោគ ក្រមា និងថវិកាមួយចំនួនផងដែរ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ