រាជធានីភ្នំពេញ៖ ទុនវិនិយោគក្នុងវិស័យសំណង់ នៅទូទាំងប្រទេស មានទំហំទឹកប្រាក់សរុបប្រមាណជិត ៦លានដុល្លារអាមេរិកមានគម្រោងវិនិយោគប្រមាណជាង ៣ពាន់គម្រោង នៅលើផ្ទៃក្រឡាប្រមាណជាង ១២លានមែត្រការ៉េ ។ នេះបើយោងតាមរបាយការណ៍នាយកដ្ឋានស្ថិតិ និងវិភាគសេដ្ឋកិច្ច នៃក្រសួងសេដ្ឋកិច្ច និងហិរញ្ញវត្ថុចេញផ្សាយថ្មីៗនេះ ។
របាយការណ៍ដដែលបានបង្ហាញថា គម្រោងវិនិយោគលើវិស័យសំណង់ គិតមកដល់ត្រឹម ខែសីហា ឆ្នាំ២០១៩ នេះ ក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតលើសំណើសុំសាងសង់សរុបទូទាំងប្រទេស មានចំនួនប្រមាណ ៣.១៧៥ គម្រោង ក្នុងនោះមានតម្លៃនៃទំហំវិនិយោគនៅលើវិស័យនេះសរុប ៥.៩៨៦ លានដុល្លារអាមេរិក ដោយវិនិយោគនៅលើផ្ទៃក្រឡាប្រមាណជាង ១២ លានម៉ែត្រការ៉េ ។
បើតាមរបាយការណ៍ ក្នុងនោះសំណើរសុំសាងសង់មាន៖ សំណង់សាធារណៈមានប្រមាណ ៥៦ គម្រោង, ការប្រើប្រាស់ថវិការរាជរដ្ឋាភិបាលមាន ១៨ គម្រោង, ថវិការវិស័យឯកជន ៣៦ គម្រោង, ការសាងសង់លំនៅឋាន និងភូមិគ្រឹះជាង ២ ពាន់គម្រោង, សំណង់ឧស្សាហកម្ម ១៣៨ គម្រោង, សំណង់ពាណិជ្ជកម្ម ១៧៦ គម្រោង, សំណង់ទេសចរ ៨២ គម្រោង និងសំណង់ផ្សេងៗទៀតមានចំនួន ១៨គម្រោង ។ ចំណែកពាក់ព័ន្ធផ្ទៃក្រឡា ដែលផ្តល់ការអនុម័តដោយមន្ទីរ មានចំនួន ជាង ១លាន ៧សែនម៉ែត្រការ៉េ និងការផ្តល់ដោយក្រសួងមានចំនួនជាង ១០លានម៉ែត្រការ៉េ ។
លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ថ្មីៗនេះថាពីឆ្នាំ ២០០០ ដល់ឆ្នាំ២០០៧ គម្រោងវិនិយោគនៅក្នុងប្រទេសកម្ពុជាយើងនៅលើវិស័យសំណង់មានតែ៣.២០០លានដុល្លារអាមេ
រិក តែចាប់ពីឆ្នាំ២០០៨ ដល់២០១១ ឡើងដល់១.២២៦លានុដល្លារអាមេរិក ។ រហូតដល់ឆ្នាំ ២០១២ដល់២០១៨ ចាប់ផ្តើមឡើងកំហុកឡើងរហូតដល់៥.៧៥៥លានដុល្លារអាមេរិក។
លោកឧបនាយករដ្ឋមន្ត្រីបានគូសបញ្ជាក់ថា «នៅក្នុងវិស័យសំណង់ក្រុមហ៊ុនចិនបោះទុនវិនិយោគមាន ២.៨៦៥លានដុល្លារឈរនៅលំដាប់ទី១, លេខ២ប្រទេសកូរ៉េមាន១.៦៥០លានដុល្លារ និងជប៉ុនមាន៣៨២លានដុល្លារអាមេរិក។ ការវិនិយោគលើវិស័យសំណង់នៅកម្ពុជានេះ គឺយើងបានបើកច្រកឱ្យក្រុមហ៊ុនបរទេសចូលមកវិនិយោគទាំំងអស់ដែលបានចូលមកវិនិយោគជាង១៣ប្រទេស»។
ទន្ទឹមនឹងវិស័យសំណង់មានការីកចម្រើននិងចៀសវាងកុំហុសឆ្គងធ្លាប់កើតមានឡើងនៅខេត្តព្រះសីហនុនាពេលកន្លងមក លោក ជាសុផារ៉ា មានប្រសាសន៍ថា គ្រប់ការសាងសង់ ប្រជាពលរដ្ឋក៏ដូចជាវិនិយោគិន ត្រូវរកក្រុមហ៊ុនដៃគូសាងសង់ត្រូវមានវិជ្ជាជីវៈលើវិស័យសំណង់, ត្រូវមានក្រុមហ៊ុនបានចុះបញ្ជីនៅក្រសួងរៀបចំដែនដី នគរូបនីយកម្មនិងសំណង់ ដើម្បីធានាឱ្យសំណង់នេះបានអនុវត្តទៅតាមបទដ្ឋានបច្ចេកទេសសំណង់។ជាមួយគ្នានេះពលរដ្ឋទាំងអស់សាងសង់ត្រូវតែមានក្រុមហ៊ុនត្រួតពិនិត្យដឹកនាំការសាងសង់ពីដើមដល់ចប់ មានក្រុមហ៊ុនធំ ក្រុមហ៊ុនធម្យម និងក្រុមហ៊ុនតូចត្រូវតែមាន។ នេះគឺជាលក្ខខណ្ឌនៃការគ្រប់សំណង់៕ កែសម្រួលដោយ ៖ សុឃាក់
ចែករំលែកព័តមាននេះ