ខេត្តកំពង់ឆ្នាំង ៖ បើទោះបីជាក្រុមគណៈកម្មការចម្រុះមានសមាសភាព១៥រូប ដែលមានលោកជំទាវដោក សុទ្ធា អភិបាលរងខេត្ត ជាប្រធានគណៈកម្មការ ដែលប្រឹងប្រែងរៀបចំដោះស្រាយវិវាទដីធ្លីរវាងប្រជាពលរដ្ឋជាមួយក្រុមហ៊ុន ខេ.ឌី.ស៊ី កាលពីព្រឹកថ្ងៃទី២៧ មីនា កន្លងទៅ ហាក់ទទួលនូវបរាជ័យខ្លះៗ
ខេត្តកំពង់ឆ្នាំង ៖ បើទោះបីជាក្រុមគណៈកម្មការចម្រុះមានសមាសភាព១៥រូប ដែលមានលោកជំទាវដោក សុទ្ធា អភិបាលរងខេត្ត ជាប្រធានគណៈកម្មការ ដែលប្រឹងប្រែងរៀបចំដោះស្រាយវិវាទដីធ្លីរវាងប្រជាពលរដ្ឋជាមួយក្រុមហ៊ុន ខេ.ឌី.ស៊ី កាលពីព្រឹកថ្ងៃទី២៧ មីនា កន្លងទៅ ហាក់ទទួលនូវបរាជ័យខ្លះៗ ព្រោះតែមានអ្នកនៅពីក្រោយខ្នងនៃកិច្ចដំណោះស្រាយនេះ បានពន្យុះឱ្យប្រជាពលរដ្ឋងើបចេញពីកិច្ចប្រជុំនេះមិនព្រមស្តាប់ការបកស្រាយរបស់មេធាវីក្រុមហុ៊នយ៉ាងណាក៏ដោយ បុ៉ន្តែស្រាប់តែនៅព្រឹកថ្ងៃទី២៨ កុម្ភៈ ប្រជាពលរដ្ឋទាំងនោះបានព្រមត្រឡប់មករកកិច្ចពិភាក្សាវិញ ហើយដំណោះស្រាយបានឈានទៅយ៉ាងរលូនតាមការគ្រោងទុក ខណៈដែលមេខ្យល់២នាក់អវត្តមាននៅព្រឹកនោះ ។
គួររំឭកថា តាមការគ្រោងទុក គណៈកម្មការចម្រុះនឹងហៅប្រជាពលរដ្ឋទាំង៥២នាក់ដែលបានអះអាងថា មានដីធ្លីវិវាទជាមួយក្រុមហ៊ុនមកសាកសួរម្នាក់ម្តងៗ ដោយនៅព្រឹកថ្ងៃទី២៧ មីនា ចំនួន១២នាក់ ។ ហើយរសៀលថ្ងៃដដែលចំនួន២០នាក់ និងនៅព្រឹកថ្ងៃទី២៨ មីនា ចំនួន២០នាក់ទៀត ។ បុ៉ន្តែនៅម៉ោង១២ថ្ងៃត្រង់ ក្រោយពេលប្រជាពលរដ្ឋទាំង១២នាក់បានបំភ្លឺជូនគណៈកម្មការ ហើយដល់ពេលមេធាវីក្រុមហ៊ុន គឺលោកផាត់ ពៅសៀង បកស្រាយជូនគណៈកម្មការវិញម្តង ស្រាប់តែប្រជាពលរដ្ឋទាំងនោះស្ទុះងើបចេញ ព្រោះមេខ្យល់មកដេញឱ្យចេញទាំងបង្ខំ គឺឈ្មោះ រាជ សីម៉ា ជាជនកំឡៅធ្វើឱ្យបរិយាកាសដែលសង្ឃឹមថា នឹងមានដំណោះស្រាយបានប្រែជាអាប់អួរតែមួយពព្រិចភ្នែក ។ ពួកគាត់នាំគ្នាដើរចេញ ហើយបានស្រែកឡូឡាពេញមុខសាលាឃុំតាចេស ធ្វើឱ្យទាំងភាគីក្រុមហ៊ុន និងគណៈកម្មការមានការអស់សង្ឃឹមជាខ្លាំង ។ បុ៉ន្តែទោះបីបែបនេះក្តី ក៏គណៈកម្មការបានបន្តការងាររបស់ខ្លួនរហូតដល់រសៀលថ្ងៃដដែល ។
ផ្ទុយពីក្តីអស់សង្ឃឹមរបស់ក្រុមគណៈកម្មការ ក៏ដូចជាប្រជាពលរដ្ឋមួយចំនួនដែលចង់បានការដោះស្រាយសន្តិវិធី នៅព្រឹកថ្ងៃទី២៨ មីនា ប្រជាពលរដ្ឋទាំងនោះបានសុខចិត្តវិលត្រឡប់មករកដំណោះស្រាយរបស់គណៈកម្មការវិញ មិនខុសពីដុំពពកខ្មៅបានរសាត់ទៅ មេឃក៏ស្រឡះដែរនោះទេ ។ នៅព្រឹកថ្ងៃនោះ ប្រជាពលរដ្ឋបានបំភ្លឺជូនគណៈកម្មការគ្រប់ទាំង៥០នាក់ អវត្តមាន២នាក់ ព្រោះទៅធ្វើការនៅប្រទេសថៃ។ នៅព្រឹកនោះផងដែរ ឈ្មោះ រាជ សីម៉ា ដែលគេចាត់ទុកជាអ្នកតំណាងក្រៅខោឱ្យអ្នកតវ៉ា និងជាមេខ្យល់ មិនវត្តមានទៀតទេ ព្រោះអស់ឥទ្ធិពលជាមេខ្យល់ដែលធ្វើឱ្យប្រជាពលរដ្ឋមានភាពទន់ឥរិយាបទបំភ្លឺជាមួយគណៈកម្មការរហូតគ្រប់៥០នាក់ ។ អ្វីដែលធ្វើឱ្យកាន់តែប្រសើរឡើងនោះទៀត គឺលោកជំទាវនាយិកាក្រុមហ៊ុនបានបង្កើនភាពជិតស្និទ្ធជាមួយប្រជាពលរដ្ឋ ដោយបានចែកនំបុ័ងជូនប្រជាពលរដ្ឋគ្រប់គ្នាដែលនឿយហត់ និងនៅថ្ងៃត្រង់បានចែកបាយម្នាក់មួយកញ្ចប់ និងទឹកម្នាក់មួយដបផងដែរ ។
ជាមួយនឹងកាយវិការសប្បុរសធម៌ក្នុងនាមជាអ្នកគោរពច្បាប់ ដែលពីមុនធ្លាប់តែពាក់មុខយក្សដាក់គ្នា ព្រោះមានអ្នកនៅពីក្រោយខ្នងញុះញង់ ធ្វើឱ្យភាគីទាំងពីរហាក់កាន់តែឃ្លាតឆ្ងាយពីគ្នានោះ បានក្លាយជាភាពល្អូកល្អើនដាក់គ្នាខុសប្រក្រតី ។ លោកជំទាវនាយិកាក្រុមហ៊ុនមានប្រសាសន៍យ៉ាងខ្លីថា សូមបងប្អូនកុំស្តាប់ការញុះញង់របស់មនុស្សទី៣ គឺពេលនេះយើងជួបគ្នា ជជែកគ្នាដោយផ្ទាល់ដើម្បីបញ្ចប់វិវាទ ហើយពីពេលនេះទៅ សូមកុំស្តាប់អ្នកណាឱ្យសោះក្រៅពីគណៈកម្មការដែលនៅចំពោះមុខបងប្អូននៅពេលនេះ។ លោកជំទាវ ដោក សុទ្ធា អភិបាលរងខេត្ត និងជាប្រធានគណៈកម្មការ មានប្រសាសន៍ថា ឃើញទេ ព្រឹកនេះយើងមានការជជែកគ្នា យល់ចិត្តគ្នា ព្រោះគ្មានមនុស្សទី៣ ដែលជាមនុស្សអគតិ សូមកុំស្តាប់ការញុះញង់របស់គេ ហើយពេលនេះបងប្អូនចំនួន៥០នាក់បានបំភ្លឺជូនគណៈកម្មការអស់ហើយ ចំណែកក្រុមហ៊ុនក៏បានបំភ្លឺជូនគណៈកម្មការដែរ ។
លោកជំទាវអភិបាលរងខេត្តថ្លែងទៀតថា ពេលនេះគណៈកម្មការនឹងប្រមូលយកនូវព័ត៌មានដែលយើងធ្វើពីរថ្ងៃនេះទៅដាក់ជូនលោកអភិបាលខេត្ត ដើម្បីប្រជុំបូកសរុបជាមួយគណៈកម្មការ និងវាយតម្លៃយកលទ្ធផលបែបណាមកជម្រាបជូនបងប្អូនវិញនៅពេលក្រោយ ។ សូមបញ្ចាក់ថា មេខ្យល់ទាំង២នាក់សុទ្ធតែជាមនុស្សគ្មានដីនៅទីនោះទេ ដែលគេសង្ស័យមានបំណងកេងយកចំណេញពីប្រជាពលរដ្ឋ ។ លោកថៃ ហុី តំណាងឱ្យក្រុមហ៊ុន ខេ.ឌី.ស៊ី បានបង្ហើបប្រាប់អ្នកសារព័ត៌មានថា ប្រជាពលរដ្ឋគ្មានឯកសារណាច្បាស់បញ្ជាក់ដាក់ជូនគណៈកម្មការនោះទេ តែពេលនេះក្រុមហ៊ុនបានយោគយល់ចង់បញ្ចប់វិវាទនេះឱ្យបានឆាប់ ។ ដោយហេតុនេះហើយទើបក្រុមហ៊ុនបានធ្វើសម្បទានឱ្យប្រជាពលរដ្ឋ ដូចជាពាក្យប្តឹងទៅតុលាការរបស់ប្រជាពលរដ្ឋដែលទាមទារដីពីក្រុមហ៊ុនមាន២២គ្រួសារ តែពេលមកដោះស្រាយវិវាទបានកើនឡើងដល់៥២គ្រួសារ ក្រុមហ៊ុនក៏មិនថាដែរ ហើយមកបំភ្លឺជូនគណៈកម្មការ គ្មានឯកសារអីទាំងអស់ ក៏ក្រុមហ៊ុនមិនថា ។ តាមការប៉ាន់ស្មានរឿងវិវាទនេះ បើគ្មានអ្នកនៅពីក្រោយខ្នងកាងទេ ការដោះស្រាយនឹងបានបញ្ចប់ក្នុងពេលឆាប់ៗ ព្រោះក្រុមហ៊ុននឹងអាចធ្វើសម្បទានគោលនយោបាយខ្លះតាមដែលអាចធ្វើទៅបាន។
ជុំវិញករណីខាងលើនេះត្រូវបានមតិភាគច្រើនលើកឡើងថា មកដល់ពេលនេះមិនខុសអំពី ល្បិចកលមនុស្សខូចដែលធ្វើនយោបាយឈ្នះបានដី ចាញ់បានប្រាក់នោះទេ ។ តែទោះយ៉ាងណាក៏ដោយចុះ សូមកុំចង់បានអ្វីដែលហួសហេតុពេក ព្រោះដោយសារតែការចង់បានហួសហេតុបែបនេះហើយ ទើបការដោះស្រាយកន្លងទៅ៣លើកនៅតែទទួលការបរាជ័យ ។ បរាជ័យគួរឱ្យស្តាយនេះដោយសារមានអ្នកនៅពីក្រោយខ្នង ដែលមានឈ្មោះ រាជ សីម៉ា ជាមេខ្លោង បានតាំងខ្លួនជាតំណាងឱ្យប្រជាពលរដ្ឋ និងបានការញុះញង់ពីតំណាងម្នាក់ទៀតយកឈ្មោះអង្គការមកពាក់មុខ កុំស្មានថា គេមិនស្គាល់ក្រយៅខូចរបស់គាត់ ។ អ្វីដែលជាចំណាប់អារម្មណ៍ដែរនោះ គឺលោកសំ ចាន់គា ប្រធានការិយាល័យសិទ្ធិមនុស្សអាដហុក ដែលជាអ្នកជ្រោមជ្រែងអ្នកតវ៉ាតាំងពីដើមមក ហើយត្រូវបានជ្រើសតាំងក្នុងជួរគណៈកម្មការដែរនោះ នៅព្រឹកថ្ងៃទី២៧ មីនា បានឃើញទៅដល់សាលាឃុំតាជេស យឺតយ៉ាវ ហើយនៅពេលដែលប្រជាពលរដ្ឋជ្រួលច្របល់ងើបចេញមិនព្រមស្តាប់ការបកស្រាយរបស់មេធាវីក្រុមហ៊ុននោះ គេឃើញម្នាក់នេះបានដើរចេញពីក្រុមគណៈកម្មការដែរ ។ ទង្វើនេះតើចាត់ទុកជាជនជំពូកណា ។ ព្រឹកនោះប្រធានគណៈកម្មការបានប្រកាស និងបន្តការងាររបស់ខ្លួនដល់ពេលរសៀលដោយគ្មានេមសិទ្ធិមនុស្សខេត្តក៏បានដែរ។ ដោយឃើញអាកប្បកិរិយាខុសគេបែបនេះ អ្នកកាសែត និងទូរទស្សន៍បានតាមសម្ភាសយ៉ាងប្រកិត ។ ចំណុចនេះលោកចាន់ គា បានបកស្រាយប្រាប់ទូរទស្សន៍ក្នុងស្រុកមួយថា លោកបានឮថា គណៈកម្មការនឹងមកបូកសរុបការងារនេះនៅខេត្ត ទើបលោកត្រឡប់មកមុនបែបនេះ ។ ដែលការបកស្រាយនេះគេសង្ស័យថា ជាជនមិនល្អ ។
អ្វីដែលជាការកត់សម្គាល់ខ្លាំងនោះ ប្រជាពលរដ្ឋទាំងនោះមានទឹកមុខស្រស់ស្រាយ និងសប្បាយរីករាយក្រៃលែង ខណៈដែលលោកជំទាវនាយិកាក្រុមហ៊ុនបានរួសរាយរាក់ទាក់ជាមួយពួកគាត់ ធ្វើឱ្យបរិយាកាសកាន់តែមានភាពជិតស្និទ្ធក្រៃលែង ដែលនាំឱ្យពួកគាត់សប្បាយចិត្តពេកបានសុំដាក់ធុងបាស់ជប់លៀងថ្ងៃចូលឆ្នាំខាងមុខនេះ ហើយលោកជំទាវក៏បានប្រកាសជាសាធារណៈឱ្យធុងបាស់ចាក់រាំសប្បាយ និងបន្ថែមពីលើនេះ គឺស្រាបៀរមួយគ្រប់ក្នុងពេលនោះទៀតផង ដែលការងារនេះប្រគល់ឱ្យលោកថៃ ហុី តំណាងក្រុមហ៊ុនជាអ្នកចាត់ការ ។ អ្នកភូមិឡពាងប្រាប់កោះសន្តិភាពថា ចាប់ពីពេលនេះទៅ ពួកគេលែងស្តាប់ លែងត្រូវការមេខ្យល់ទាំងពីរនាក់ដ៏ល្ហេមល្ហាមនេះទៀតហើយ ។ ពួកគេនិយាយថា មេខ្យល់ទាំងពីរជាមនុស្សអត់មានដីទេ ប្រហែលជាចាំស៊ីកំមីស្យុងអ្នកភូមិហើយមើលទៅ បានជាប្រឹងញុះញង់ពួកគេឱ្យបាត់បង់អស់ផលប្រយោជន៍រាប់ឆ្នាំមកនេះ ។
ទោះជាយ៉ាងណាក៏ដោយ មិនខុសពីក្រោយភ្លៀង មេឃស្រឡះឡើយ ។ អ្នកស្រុកខ្លះបានបដិសេធ ឆ្មោះ រាជ សីម៉ា ឱ្យឈប់ជ្រៀតជ្រែក ព្រោះឈ្មោះនេះជាប់សង្ស័យដុតផ្ទះអ្នកយាមដី ដែលសាលាដំបូងកំពុងកោះហៅ ៕
ចែករំលែកព័តមាននេះ