រាជធានីភ្នំពេញ ៖ កាលពីថ្ងៃអាទិត្យ ទី៣០ មីនា កីឡាករឯម វិចិត្រ ជើងខ្លាំងប្រចាំក្លិបឫទ្ធិពោធិសែនជ័យ បានបំបាក់កីឡាកររឿម វណ្ណៈ ជើងខ្លាំងមកពីសមាគមកីឡាប្រដាល់ក្រសួងការពារជាតិយ៉ាងគួរឱ្យភ្ញាក់ផ្អើលនៅលើរេញទូរទស្សន៍បាយ័នបឹងស្នោ ។ ការប្រកួតរវាងគូនេះ មុនឈានដល់លទ្ធផលមានសម្រែកហ៊ោកញ្ជ្រៀវយ៉ាងខ្លាំងដោយសារតែ រឿម វណ្ណៈ ក៏មិនអន់នៅមុនពេលសន្លប់ ។
រាជធានីភ្នំពេញ ៖ កាលពីថ្ងៃអាទិត្យ ទី៣០ មីនា កីឡាករឯម វិចិត្រ ជើងខ្លាំងប្រចាំក្លិបឫទ្ធិពោធិសែនជ័យ បានបំបាក់កីឡាកររឿម វណ្ណៈ ជើងខ្លាំងមកពីសមាគមកីឡាប្រដាល់ក្រសួងការពារជាតិយ៉ាងគួរឱ្យភ្ញាក់ផ្អើលនៅលើរេញទូរទស្សន៍បាយ័នបឹងស្នោ ។ ការប្រកួតរវាងគូនេះ មុនឈានដល់លទ្ធផលមានសម្រែកហ៊ោកញ្ជ្រៀវយ៉ាងខ្លាំងដោយសារតែ រឿម វណ្ណៈ ក៏មិនអន់នៅមុនពេលសន្លប់ ។
ដ្បិតតែទឹកទី១ កីឡាករទាំងពីរហាក់ចំណាយពេលខ្លះដើម្បីស្ទាបស្ទង់សមត្ថភាពគ្នា បុ៉ន្តែនៅទឹកទី២ និងទី៣ អ្នកណាក៏ឃើញដូចគ្នាថា កីឡាករទាំងសងខាងស្ទុះស្ទាប្រឹងប្រែងយ៉ាងខ្លាំងដើម្បីទាក់ទាញនូវការគាំទ្រ ។ ក្នុង២ទឹកចុងក្រោយមុនកំណត់ចាញ់ឈ្នះ កីឡាករបង្គោលក្រហម ឯម វិចិត្រ បានវាយសម្រុកយ៉ាងខ្លាំង បន្ទាប់ពីឃើញកីឡាករបង្គោលខៀវ រឿម វណ្ណៈ បង្កើនថាមពលប្រយុទ្ធដោយមិនព្រមចុះញ៉ម ។ ទាំងដៃទាំងជើង និងកែងបក កីឡាកររឿម វណ្ណៈ មិនទុកឱ្យទំនេរចោលឡើយ ពោលគឺឱ្យតែមានឱកាសវាយចេញទាំងអស់ ដោយបានទាំងធ្វើឱ្យបង្គោលក្រហម ឯម វិចិត្រ បុកពោះម្តងជាពីរដង និងឈានដល់ទ័លស្នៀតជាច្រើនអន្លើទៀតផង ។ យ៉ាងណាក៏ដោយ កីឡាករឯម វិចិត្រ នៅតែមានសំណាងវាយត្រូវកន្លែងសំខាន់ ហើយទទួលបានជោគជ័យដដែល បន្ទាប់ពីក្នុងទឹកទី៣ គេបានប្តូរស្នៀតវាយធ្វើឱ្យកីឡាករបង្គោលខៀវ រឿម វណ្ណៈ អស់ស្នៀតតវ៉ា ។ កីឡាកររឿម វណ្ណៈ ត្រូវគេឃើញអង្គុយដួលអុកគូទភ្លាមៗ បន្ទាប់ពីត្រូវបុ៉ន្មានដៃយ៉ាងសន្ធាប់ពីកីឡាករឯម វិចិត្រ ។
អុីចឹងហើយទើបធ្វើឱ្យម្នាក់ៗភ្ញាក់ផ្អើលនៅពេលដឹងថា រឿម វណ្ណៈ ដែលជាកីឡាករកំពុងឡើងកូដ មានសមត្ថភាពខ្ពស់ និងមានឈ្មោះបោះសំឡេងនៅក្នុងពិភពប្រដាល់ បែរជាត្រូវសន្លប់ដោយស្មានមិនដល់ក្រោមដៃរបស់កីឡាករឯម វិចិត្រ ។ លទ្ធផលដែល រឿម វណ្ណៈ ទទួលបាននេះត្រូវគេគិតដូចគ្នាថា ជារឿងភ្លាត់ស្នៀត បុ៉ន្តែក៏ជួយឱ្យ ឯម វិចិត្រ ដែលកាន់តែមានវ័យច្រើន និងធ្លាប់ធ្វើឱ្យបាត់ទំនុកចិត្តមួយប្រាវមុនរំកិលខ្លួនមកកាន់តំណែងដែលធ្វើឱ្យអ្នកគាំទ្រភាគច្រើនជឿទុកចិត្តពីសមត្ថភាពកាន់តែខ្ពស់ជាងមុនផងដែរ ។ កីឡាករឯម វិចិត្រ បានបង្ហាញអារម្មណ៍រីករាយយ៉ាងខ្លាំងបន្ទាប់ពីបានយកឈ្នះកីឡាករជាដៃគូ ខណៈដែល រឿម វណ្ណៈ វិញ ដ្បិតថាបានសន្លប់មួយសន្ទុះរហូតបណ្តាលឱ្យរាប់ដល់១០ ក៏គេប្រឹងក្រោកឈរដើម្បីគេចចេញពីការតម្រង់ថតរបស់កាមេរ៉ាដើម្បីការពារមុខមាត់ ។
រឿម វណ្ណៈ មិននិយាយស្តីអ្វីមួយម៉ាត់ឡើយ បើទោះជាមានការសាកសួរពីមិត្តអ្នកគាំទ្រ ពីរឿងភ្លាត់ស្នៀតដែលនឹកស្មានមិនដល់នោះ ។ គាប់ជួនជាមានការស្តីបន្ទោសតិចតួចពីអ្នកហែហម រឿងគេចំហល្វែងលើបណ្តាលឱ្យ ឯម វិចិត្រ វាយចូលនោះផង ទើបរឹតតែធ្វើឱ្យគេមិនមាត់កសូម្បីមួយម៉ាត់ ។ សភាពដែលផ្ទុយពីចរិតរួសរាយរាក់ទាក់របស់គេនាពេលនោះ ត្រូវគេឃើញដូចគ្នាថា កើតចេញពីការហួសចិត្តដែលរុញឱ្យគេសន្លប់នៅក្រោមដៃកីឡាករឯម វិចិត្រ ដោយនឹកស្មានមិនដល់ ។ ភាពមិនអស់ចិត្តរបស់ រឿម វណ្ណៈ នឹងត្រូវគណៈកម្មការរៀបចំឱ្យគេមានឱកាសឡើងប្រកួតសងសឹកឆាប់ៗដើម្បីចង់ដឹងថា ប៉ះកីឡាករឯម វិចិត្រ លើកក្រោយនៅតែទទួលលទ្ធផលដដែល ឬប្រែប្រួល ។
នៅលើសង្វៀននោះដែរ កីឡាករទី ចាក់ក្រី មកពីក្លិបបញ្ជាការដ្ឋានកងទ័ពជើងទឹក ចាញ់កីឡាករព្រឿង សុជាតិ មកពីក្លិបខេមរៈភូមិន្ទ ក្នុងទឹកទី៣ ។ កីឡាករវីវ៉ា សាវ៉េត មកពីក្លិបមហិទ្ធិឫទ្ធិតាដំបងដែក វាយឈ្នះកីឡាករហេង វាសនា មកពីក្លិបព្រៃទទឹងបង្ក្រាបគ្រឿងញៀនខេត្តបាត់ដំបងដោយពិន្ទុ ។ កីឡាករស្រម៉ៃ សួន មកពីក្លិបកងរាជអាវុធហត្ថរាជធានីភ្នំពេញ វាយកីឡាករពេជ្រ ធារ៉ា មកពីក្លិបអារុណរះកីឡាឱ្យសន្លប់ក្នុងទឹកទី២ និងកីឡាករសល់ អាម៉ា មកពីក្លិបកុសលកីឡា វាយឈ្នះកីឡាករសុខ វិរៈ មកពីក្លិបសំរោងកោងកីឡាខេត្តបាត់ដំបង ដោយពិន្ទុ៕
ចែករំលែកព័តមាននេះ