រាជធានីភ្នំពេញ ៖ ការប្រកួតបាល់ទាត់ Metfone Cambodian League ជើងទី១ រដូវកាល២០១៤ កាលពីរសៀលថ្ងៃអាទិត្យ ទី៣០ មីនា នៅពហុកីឡដ្ឋានជាតិអូឡាំពិក ដែលមាន២ប្រកួតនោះក្រុមខេត្តស្វាយរៀងយកឈ្នះក្រុមគីរីវង់សុខសែនជ័យ ៤ទល់១ ចំណែកក្រុម Albirex Niigata បានយកឈ្នះក្រុម Western Uni FC ២ទល់១ ជាលើកដំបូងរបស់ខ្លួន ។
រាជធានីភ្នំពេញ ៖ ការប្រកួតបាល់ទាត់ Metfone Cambodian League ជើងទី១ រដូវកាល២០១៤ កាលពីរសៀលថ្ងៃអាទិត្យ ទី៣០ មីនា នៅពហុកីឡដ្ឋានជាតិអូឡាំពិក ដែលមាន២ប្រកួតនោះក្រុមខេត្តស្វាយរៀងយកឈ្នះក្រុមគីរីវង់សុខសែនជ័យ ៤ទល់១ ចំណែកក្រុម Albirex Niigata បានយកឈ្នះក្រុម Western Uni FC ២ទល់១ ជាលើកដំបូងរបស់ខ្លួន ។
ទោះបីជាអាកាសធាតុមានសភាពក្តៅហែងយ៉ាងណាក៏ដោយ ក៏ការប្រកួតរវាងក្រុមខេត្តស្វាយរៀង និងក្រុមគីរីវង់សុខសែនជ័យ ដំណើរការទៅយ៉ាងរលូន ។ ក្រុមខេត្តស្វាយរៀងធ្វើបានយ៉ាងល្អក្នុងការគ្រប់គ្រងបាល់ និងមានឱកាសលេងសម្រុកទៅកាន់ទីគូប្រកួតច្រើន ។ ការប្រកួតទើបតែដំណើរការបាន៦នាទី កីឡាករពាក់អាវលេខ១២ របស់ក្រុមខេត្តស្វាយរៀង DZARMA BATA រកបាន១គ្រាប់ដំបូងឱ្យក្រុមរបស់ខ្លួន ហើយបន្តរកបាន១គ្រាប់ទៀតនៅនាទីទី៣២ ។ បន្ទាប់មកចូលដល់នាទីទី៤០ កីឡាករពាក់អាវលេខ១១ មួង មករា ដែលជាមិត្តរួមក្រុមរបស់គេ ក៏រកបានគ្រាប់បាល់១គ្រាប់ទៀតឱ្យក្រុមរបស់ខ្លួនផងដែរ ។
ចំណែកក្រុមគីរីវង់សុខសែនជ័យរកបាន១គ្រាប់ដោយកីឡាករពាក់អាវលេខ៣៩ SANTOS DEDES នៅនាទីទី១២ និង១គ្រាប់ទៀតគឺភ្លាត់ស្នៀតទាត់ចូលទីខ្លួនឯងដោយកីឡាករពាក់អាវលេខ៣ ទូច សុខហៀង ធ្វើឱ្យចប់ការប្រកួតក្រុមខេត្តស្វាយរៀងឈ្នះក្រុមគីរីវង់សុខសែនជ័យ ៤ទល់១ ។ ជ័យជម្នះនេះធ្វើឱ្យ៦ប្រកួតរបស់ក្រុមខេត្តស្វាយរៀងរកបាន១១ពិន្ទុ គឺឈ្នះ៣ប្រកួត ស្មើ២ប្រកួត និងចាញ់១ប្រកួត ឯក្រុមគីរីវង់សុខសែនជ័យ ៧ប្រកួតមិនដែលឈ្នះទាល់តែសោះ ដោយស្មើ៤ប្រកួត ចាញ់៣ប្រកួតរកបាន៤ពិន្ទុ ស្ថិតនៅលំដាប់ទី១១ ក្នុងចំណោម១២ក្រុម ។ មួយប្រកួតទៀត ក្រុមលំដាប់បាតតារាង Albirex Niigata មិនដែលស្គាល់ពាក្យថាឈ្នះ ៦ប្រកួតកន្លងមកនោះ ពេលនេះទទួលបានជ័យជម្នះជាលើកដំបូងរបស់ខ្លួនដោយបានយកឈ្នះក្រុម Western Uni FC ២ទល់១ ។
ជ័យជម្នះ១ប្រកួតនេះធ្វើឱ្យការប្រកួតរបស់ក្រុម Albirex Niigata រកបាន៣ពិន្ទុជាលើកដំបូង គឺឈ្នះ១ប្រកួត ចាញ់៦ប្រកួត ។ ចំណែកក្រុម Western Uni FC ៦ប្រកួតរកបាន៥ពិន្ទុ ដោយឈ្នះ១ប្រកួត ស្មើ២ប្រកួត ចាញ់៣ប្រកួត ។ សម្រាប់ការប្រកួតបន្តនឹងធ្វើឡើងនៅថ្ងៃទី២ មេសា វេលាម៉ោង១៥និង៣០នាទីតទៅ ដោយមានតែ១ប្រកួតបុ៉ណ្ណោះ គឺក្រុមខេត្តស្វាយរៀង ដែលកំពុងតែឈរនៅលំដាប់ទី៤ មាន១១ពិន្ទុនោះត្រូវជួបប្រកួតជាមួយក្រុមដែលឈរក្នុងលំដាប់ថ្នាក់ទី១០ ដែលទើបតែមាន៥ពិន្ទុ គឺក្រុម Western Uni FC ។ សូមរង់ចាំទស្សនាថា តើក្រុម Western Uni FC អាចដណ្តើមបានពិន្ទុបន្តទៀតដែរឬទេ ?
ចែករំលែកព័តមាននេះ