រាជធានីភ្នំពេញ ៖ ទីលានបាល់ទាត់ហ្វូតសាល មីងហួរ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន មានទំហំ១៧ម៉ែត្រx៣២ម៉ែត្រ ស្មើនឹង៣តារាង ក្រាលស្មៅសិប្បនិម្មិត ត្រូវបានសម្ពោធដាក់ឱ្យប្រើប្រាស់ជាផ្លូវការហើយ កាលពីព្រឹកថ្ងៃទី២៩ មីនា កន្លងទៅ ក្រោមវត្តមានលោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា លោក ឈួរ ឈុនហួត ម្ចាស់ទីលានបាល់ទាត់ ហ្វូតសាលមីងហួរ និងភ្ញៀវកិត្តិយសជាច្រើននាក់ ។
លោក ឈួរ ឈុនហួត បានឱ្យដឹងថា ទីលានបាល់ទាត់មីងហួរ សង់ឡើងទៅតាមស្តង់ដាទីលានបាល់ទាត់ហ្វូតសាលអន្តរជាតិ ដែលក្រាលស្មៅសិប្បនិម្មិត បាតតារាងមាន៦ស្រទាប់ ក្នុងនោះស្រទាប់ទី១ គឺចាក់សាប ទី២ ក្រួសមិច ទី៣ ផេះមិច ទី៤ គឺស្មៅសិប្បនិម្មិត ទី៥ គឺខ្សាច់ និងទី៦ គឺគ្រាប់ជ័រ ។ លោកបន្តទៀតថា នៅក្នុងរយៈពេល៣ខែខាងមុខទៀត លោកនឹងសម្ពោធទីលានមីងហួរ២ មានទំហំធំជាងនេះ មានទាំងក្លិបហាត់ប្រាណ អាងហែលទឹក រត់ម៉ាស៊ីន ធាក់កង់ កីឡាវាយប៉េងប៉ុង រាំយូហ្គា ត្រាំទឹកក្តៅ ស្ទីម ដែលសុទ្ធសឹងជាការហាត់ប្រាណដើម្បីសុខភាពទាំងអស់ផងដែរ ។
លោកជំទាវ គឹម សេដ្ឋានី មានប្រសាសន៍ថា បើយុវជនទទួលបានការអប់រំ ហើយពុំទទួលបានការលេងកីឡានោះ យុវជនពុំសូវមានសុខភាពរឹងមាំទេ ដូចគ្នានេះដែរប្រសិនបើយុវជនលេងតែកីឡា ពុំបានទទួលការអប់រំនោះ ក៏មានតែកាយសម្បទារឹងមាំ តែខ្វះចំណេះដឹង ។ លោកជំទាវបន្តទៀត ដូច្នេះយុវជនត្រូវតែទទួលបានការអប់រំផង និងលេងកីឡាផង នោះទើបយុវជនអាចក្លាយជាទំពាំងស្នងឫស្សីបាន ។ កីឡាមិនត្រឹមតែអាចជួយឱ្យរាងកាយមាំមួន សុខភាពល្អប៉ុណ្ណោះទេ វាថែមទាំងនាំមកនូវការរឹតចំណងសាមគ្គីភាព មិត្តភាពរវាងគ្នានិងគ្នាផងដែរ ។
បន្ទាប់ពីមានប្រសាសន៍ចប់ លោកជំទាវបានអញ្ជើញកាត់ខ្សែបូសម្ពោធដាក់ឱ្យដំណើរការជាផ្លូវការនូវទីលានបាល់ទាត់នេះ ស្របពេលជាមួយគ្នានេះដែរ ក៏មានការប្រកួតបាល់ទាត់ជាលក្ខណៈមិត្តភាពរវាងក្រុមបាល់ទាត់សហភាពសហព័ន្ធយុវជនកម្ពុជា ជាមួយក្រុមក្រសួងព័ត៌មាន និងក្រុមសហភាពសហព័ន្ធយុវជនកម្ពុជា ជាមួយក្រុមក្រសួងសុខាភិបាល ៕
ចែករំលែកព័តមាននេះ