Joaquin Rodriguez បានសម្តែងនូវក្តីរីករាយជាខ្លាំងបន្ទាប់ពីបានយកឈ្នះជើងឯកប្រណាំងកង់កម្មវិធី Tour of Catalonia នៅប្រទេសអេស្ប៉ាញ កាលពីថ្ងៃអាទិត្យ ទី៣០ខែមីនាកន្លងមកនេះ ។ ការប្រណាំងត្រូវបញ្ចប់ជាមួយនឹងដំណាក់ផ្តាច់ព្រ័ត្រដែលមានចម្ងាយផ្លូវ១២០,៧គីឡូម៉ែតនៅទីក្រុងបាសេឡូណាប្រទេសអេស្ប៉ាញ ។
Joaquin Rodriguez បានសម្តែងនូវក្តីរីករាយជាខ្លាំងបន្ទាប់ពីបានយកឈ្នះជើងឯកប្រណាំងកង់កម្មវិធី Tour of Catalonia នៅប្រទេសអេស្ប៉ាញ កាលពីថ្ងៃអាទិត្យ ទី៣០ខែមីនាកន្លងមកនេះ ។ ការប្រណាំងត្រូវបញ្ចប់ជាមួយនឹងដំណាក់ផ្តាច់ព្រ័ត្រដែលមានចម្ងាយផ្លូវ១២០,៧គីឡូម៉ែតនៅទីក្រុងបាសេឡូណាប្រទេសអេស្ប៉ាញ ។
បន្ទាប់ពីឆ្លងកាត់ការប្រណាំងអស់៧ដំណាក់លើចម្ងាយផ្លូវសរុប១១៧៧,៩គីឡូម៉ែត្ររួចមក Rodriguez ដែលជាអ្នកជិះកង់ឱ្យក្រុម Team Katusha បានយកឈ្នះជើងឯក បន្ទាប់ពីបានប្រើអស់ថិរវេលាសរុបតិចជាងគេបំផុត គឺ២៩ម៉ោង៤១នាទីនិង៣៤វិនាទីយកឈ្នះកីឡាករមិត្តរួមជាតិរបស់ខ្លួន Alberto Contador ជិះឱ្យក្រុម Tinkoff-Saxo ដែលបានប្រើអស់ថិរវេលាច្រើនជាង៤វិនាទី ។ ឯកីឡាករអាមេរិក Tejay van Garderen ស្ថិតនៅលំដាប់ទី៣ បន្ទាប់ពីប្រើថិរវេលាច្រើនជាង៧វិនាទី ។
ថ្លែងក្រោយពីការឈ្នះពានជើងឯក Rodriguez បានបញ្ជាក់ថា ៖ «ខ្ញុំនៅតែជឿថាខ្លួនឯងជាអ្នកឈ្នះគឺរហូតដល់ទទួលបានពាននៅក្នុងដៃ ។ នេះជាជ័យជម្នះយ៉ាងធំធេងបំផុត ។ វាក៏ជាសុបិនមួយដែលបានក្លាយមកជាការពិតផងដែរ ។ ក្រុមរបស់ខ្ញុំពិតជាមានការសាមគ្គីគ្នាបានយ៉ាងល្អអំឡុងការប្រណាំងពីដើមដល់ចប់ ។ យើងមិនបានជួបនឹងថ្ងៃស៊យនោះទេ» ។ កីឡាកររូបនេះបានបន្តថា ៖ «ការប្រណាំងនៅទីនេះមានថ្ងៃស៊យ និងមានថ្ងៃហេងផងដែរ ។ បើទោះជាឈ្នះជើងឯក តែការប្រណាំងនៅទីនេះពិតជាពិបាកខ្លាំង»។
ដោយឡែក ដំណាក់ទី៧ ដែលជាដំណាក់ផ្តាច់ព្រ័ត្រមានចម្ងាយផ្លូវ១២០,៧គីឡូម៉ែតជុំវិញទីក្រុងបាសេឡូណា ប្រទេសអេស្ប៉ាញ ជ័យជម្នះបានទៅលើកីឡាករហូឡង់ Lieuwe Westra ។Westra ដែលជាអ្នកជិះឱ្យក្រុម Astana Pro Team បានបញ្ចប់ដំណាក់នេះដោយប្រើអស់ថិរវេលា២ម៉ោង៣៦នាទី និង១៤វិនាទីយកឈ្នះកីឡាករបារាំង Marcus Burghardt ជិះឱ្យក្រុម BMC Racing Team ដែលបានប្រើអស់ថិរវេលាច្រើនជាង១នាទីនិង២២វិនាទី ស្មើគ្នាជាមួយកីឡាករបារាំង Thomas Voeckler របស់ក្រុម Team Europcar ។
សូមបញ្ជាក់ថា ការប្រណាំងកម្មវិធី Tour of Catalonia ឆ្នាំនេះចែកចេញជា៧ដំណាក់ និងមានចម្ងាយផ្លូវសរុប១១៧៧,៩គីឡូម៉ែត្រ ។ ដោយឡែក ដំណាក់ទី៧ ដែលជាដំណាក់ផ្តាច់ព្រ័ត្រមានចម្ងាយផ្លូវ១២០,៧គីឡូម៉ែត្រ ។ ការប្រណាំងបានចាប់ផ្តើមកាលពីថ្ងៃទី២៤ ខែមីនា ជាមួយនឹងដំណាក់បើកឆាកដែលចេញដំណើរជុំវិញទីក្រុង Calella Màgic ប្រទេសអេស្ប៉ាញ ៕
ចែករំលែកព័តមាននេះ