ខេត្តកំពង់ចាម ៖ រថយន្តកាមរីបាឡែន១គ្រឿង ពាក់ស្លាកលេខសៀមរាប២A៧១៦៤ ដឹកឈើគ្រញូងបើកគេចពីការតាមប្រម៉ាញ់របស់សមត្ថកិច្ចអាវុធហត្ថ ស្រុកខ្សាច់កណ្តាល បែរជាមកអស់លក្ខណ៍ត្រង់ភូមិក្តីថ្ម ឃុំប្រាំយ៉ាម ស្រុកស្រីសន្ធរ កាលពីវេលាម៉ោង៤ និង៣០នាទីរសៀល ថ្ងៃទី៣០ មីនា ២០១៤ ដកហូតបានឈើគ្រញូងចំនួន៧៩ដុំស្មើនឹង៤៦២គីឡូក្រាម ចំណែកមនុស្សប្រុស៥នាក់ជិះលើរថយន្តបានរត់គេចខ្លួនបាត់។
លោកវរសេនីយ៍ត្រី ខេង ស្រេង អធិការនគរបាលស្រុកស្រីសន្ធរបានឱ្យដឹងថា ប្រជាពលរដ្ឋនៅមូលដ្ឋានបានរាយការណ៍មករូបលោកថា មានរថយន្តកាមរីបាឡែន១គ្រឿងដឹកឈើគ្រញូងបានបើករត់គេចពីសមត្ថកិច្ចនៅស្រុកខ្សាច់កណ្តាលចូលមកស្រុកស្រីសន្ធរដែលមានព្រំប្រទល់នៅជាប់គ្នា ហើយឈើទាំងនោះទំនងត្រូវដឹកយកទៅលក់នៅប្រទេសវៀតណាម។ ក្រោយពីទទួលបានព័ត៌មាននេះរូបលោកបានសុំគោលការណ៍ពី លោកអភិបាលស្រុកស្រីសន្ធរ និងលោកឧត្តមសេនីយ៍បែន រ័ត្ន ស្នងការនគរបាលខេត្តរៀបចំកម្លាំងតាមប្រម៉ាញ់ស្ទាក់ចាប់បានតែម្តង។
លោកវរសេនីយ៍ត្រី ខេង ស្រេង បានបញ្ជាក់ថា រហូតដល់ព្រឹកថ្ងៃទី៣១ មីនា ២០១៤ នេះរថយន្ត និងឈើគ្រញូងត្រូវបានប្រគល់ឱ្យទៅជំនាញរដ្ឋបាលព្រៃឈើសង្កាត់ស្រីសន្ធរយកទៅចាត់ការតាមនីតិវិធីច្បាប់៕
ចែករំលែកព័តមាននេះ