ខេត្តកំពង់ឆ្នាំង ៖ នគរបាលក្រុងកំពង់ឆ្នាំង កាលពីព្រឹកថ្ងៃទី៣០ មីនា ២០១៤ បានចុះត្រួតពិនិត្យ និងកសាងសំណុំរឿងស្វែងតាមរកចាប់ខ្លួនបុរសម្នាក់តាមពាក្យបណ្តឹងរបស់ម្ចាស់រថយន្តពីបទជេរប្រមាថ គប់បំបែកកញ្ចក់រថយន្ត និងបានវាយមកលើម្ចាស់រថយន្តកាលពីវេលាម៉ោង១១ និង៣០នាទីយប់ ថ្ងៃទី ២៩ មីនា ២០១៤ ខណៈរថយន្តកំពុងតែបត់ចូលផ្ទះស្ថិតនៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង។
នគរបាលបានឱ្យដឹងថា បុរសរូបនោះឈ្មោះម៉ក់ រ៉ាវី ហៅជ្រូក អាយុ២៣ឆ្នាំ មានប្រពន្ធ កូនរស់នៅក្នុងភូមិ-សង្កាត់កើតហេតុខាងលើ ចំណែកបុរសរងគ្រោះឈ្មោះផល សានិត អាយុ៣៦ឆ្នាំ មានប្រពន្ធឈ្មោះសេង សុវណ្ណសាគរ អាយុ២៥ឆ្នាំ រស់នៅសង្កាត់ទួលសង្កែ ខណ្ឌប្ញស្សីកែវ រាជធានីភ្នំពេញ។
ប្រភពបានឱ្យដឹងថា មុនពេលកើតហេតុជនរងគ្រោះ និងក្រុមគ្រួសារមានគ្នា៥នាក់បានធ្វើដំណើរតាមរថយន្តផ្ទាល់ខ្លួនម៉ាកស្តារិច ពណ៌ខ្មៅ ពាក់ស្លាកលេខភ្នំពេញ២W៩៦៤៨ពីក្រុងភ្នំពេញមកមើលឪពុកក្មេកឈឺនៅកំពង់ឆ្នាំង។ លុះមកដល់មុខផ្ទះឪពុកក្មេកជាចំណុចកើតហេតុ មុនពេលបត់រថយន្តអ្នកបើកបរបានមើលតាមកញ្ចក់ក្រោយឃើញម៉ូតូជនទំនើងជិះមកពីក្រោយនៅដាច់ឆ្ងាយពីគ្នាដែរ ខណៈនោះអ្នកបើករថយន្តបានស៊ីញ៉ូបត់ឆ្វេងចូលផ្ទះ ស្រាប់តែបុរសម្នាក់ និងបក្សពួកគេ៥នាក់ជិះម៉ូតូ២គ្រឿងមកដល់បានជេរប្រមាថគាត់ថាបត់រថយន្តមិនមើលមុខក្រោយ។
បន្ទាប់មកបុរសនោះក៏បានរើសដុំថ្មធំៗ៣ដុំគប់សំដៅរថយន្តបណ្តាលឱ្យបែកកញ្ចក់ក្រោយ ហើយស្ទុះទៅទាញទ្វារខាងស្តាំបើក(កន្លែងប្រពន្ធគាត់អង្គុយ) ពេលនោះអ្នកបើកបររថយន្តបានចុះពីលើរថយន្តបម្រុងសួរនាំក៏ត្រូវជនទំនើងឈ្មោះម៉ក់ រ៉ាវី ហៅជ្រូកនោះយកដំបងដេញវាយគាត់បន្ថែមទៀតទាំងកំហឹង។
ដោយមើលឃើញសកម្មភាពជនទំនើងធ្វើបែបនេះអ្នកជិះក្នុងរថយន្តបាននាំគ្នាចុះមកជួយ ហើយជនទំនើងឃើញសភាពមិនស្រួលក៏នាំគ្នាគេចខ្លួនចេញពីទីនោះយ៉ាងស្លន់ស្លោដោយទុកម៉ូតូវីវ៉ា ពណ៌ខ្មៅ១គ្រឿងរបស់គេចោលនៅទីនោះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ