ប្រទេសអារ៉ាប៊ីសាអ៊ូឌីត ៖ រដ្ឋមន្ត្រីការបរទេសអាមេរិកលោកMIKE POMPEO ដែលកំពុងបំពេញដំណើរទស្សនកិច្ច ក្នុងតំបន់ឈូងសមុទ្រពែរ្ស៍ ក្រោយការវាយប្រហារប្រឆាំងបណ្ដាទីតាំងប្រេងកាតអារ៉ាប៊ីសាអូឌីត អះអាងកាលពីថ្ងៃទី១៩កញ្ញា នៅទីក្រុងអាប៊ូដាប៊ីថា សហរដ្ឋអាមេរិកផ្ដោតលើដំណោះស្រាយដោយសន្តិវិធីមួយ ជាមួយអ៊ីរ៉ង់ដែលលោកចោទថា ជាប្រភពនៃការវាយប្រហារទីតាំងប្រេងកាតទាំងនេះ។
លោក POMPEOបានជួបជាមួយព្រះអង្គ ម្ចាស់MOHAMMED BEN ZAYED AL NAHYANE រជ្ជទាយាទអាប៊ូដាប៊ី។ បន្ទាប់ពីការជួបគ្នានោះ នៅមុខបណ្ដាអ្នកកាសែតលោកបានថ្លែងថា មានកុងសង់ស៊ុសមួយក្នុងតំបន់ឈូងសមុទ្រ លើការទទួលខុសត្រូវរបស់អីុរ៉ង់ ក្នុងការវាយប្រហារទាំងនេះ។ យើងមកកាន់ទីនេះដើម្បីកសាងក្រុមចម្រុះមួយសំដៅធ្វើឲ្យសម្រេចបាន សន្តិភាពនិងដំណោះស្រាយដោយសនិ្តវិធីមួយ។ មុនឡើងយន្តហោះមកកាន់ក្រុងវ៉ាស៊ិនតោនវិញ លោក POMPEOនិយាយពីក្ដីសង្ឃឹមថា អ៊ីរ៉ងនឹងពិនិត្យរឿងទាំងឡាយរបៀបដូចគ្នានោះដែរ។
ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៧កញ្ញាបានបញ្ជូនលោកPOMPEOមកកាន់ទីក្រុងJEDDAH ដើម្បីពិភាក្សាពីចម្លើយតបមួយចំពោះការវាយប្រហារ ប្រឆាំងអារ៉ាប៊ីសាអូឌីត។ ឆ្លើយតបនឹងសំនួរមួយរបស់ទូរទស្សន៍អាមេរិកCNN ប្រមុខការទូតអ៊ីរ៉ង់លោកMOHAMMAD JAVAD ZARIF ថ្លែងថា ការវាយប្រហារមួយរបស់អាមេរិកឬអារ៉ាប៊ីសាអូឌីត នឹងនាំឲ្យផ្ទុះសង្គ្រាមទាំងស្រុងមួយ។ លោកបន្តថាប្រទេសរបស់លោកពុំចង់បានសង្គ្រាមឡើយ តែក៏មិនខ្លាចវាដែរប្រសិនបើនោះជាកិច្ចការពារខ្លួន។
ក្នុងឱកាសនៃទស្សនកិច្ចរបស់លោកនៅអារ៉ាប៊ីសាអូឌីត លោកPOMPEOអះអាងថា ភាគីទាំង២បានព្រមព្រៀងគ្នាថា របបអ៊ីរ៉ង់ត្រូវតែជាអ្នកទទួលខុសត្រូវ ចំពោះឥរិយាបថឈ្លានពានខ្វះការប្រុងប្រយ័ត្ននិងគំរាមកំហែងរបស់ខ្លួន។
មេបញ្ជាការកងឆ្មាំបដិវត្តន៍អ៊ីរ៉ង់ឧត្ដមសេនីយហូសាំងសាឡាមី កាលពីថ្ងៃទី១៩កញ្ញាបានលើកឡើងថា អាមេរិកចេះតែចោទប្រកាន់ទាំងទទឹងទិសថា អីុរ៉ង់នៅពីក្រោយរាល់ឧប្បត្តិហេតុក្នុងតំបន់៕ (កែសម្រួលដោយ ៖ បុប្ផា)
ចែករំលែកព័តមាននេះ