ទីក្រុងកាប៊ុល៖ ត្រឹមតែរយៈពេល២៤ម៉ោងប៉ុណ្ណោះ មនុស្សយ៉ាងតិច១៧នាក់ស្លាប់ និង២៦នាក់រងរបួសនៅប្រទេសអាហ្វហ្កានីស្ថានដោយសារគ្រោះធម្មជាតិ។ ក្នុងនោះ អ្នកខ្លះស្លាប់ដោយសារគ្រោះទឹកជំនន់, ខ្លះស្លាប់ដោយសារការបាក់ដី និងខ្លះទៀតស្លាប់ដោយសាររន្ទះបាញ់។ នេះបើយោងតាមការអះអាងរបស់អាជ្ញាធរ ហើយនេះក៏ជារបាយការណ៍ស្លាប់ចុងក្រោយគេដោយសារការប្រែប្រួលអាកាសធាតុធ្ងន់ធ្ងរនៅរដូវកាលនេះនៅអាហ្វហ្កានីស្ថានផងដែរ។
គេគិតថាចំនួនអ្នកស្លាប់អាចនឹងកើនឡើងបន្ថែមទៀតនៅពេលក្រុមការងាររបស់អាជ្ញាធរជាតិគ្រប់គ្រងគ្រោះមហន្តរាយដើរប្រមូលទិន្នន័យពីតំបន់រងគ្រោះ។ នេះបើយោងតាមការអះអាងរបស់អ្នកនាំពាក្យអាជ្ញាធរខាងលើ។ ខេត្តចំនួន១៣នៅក្នុងប្រទេសនេះរងផលប៉ះពាល់ពីគ្រោះធម្មជាតិ ភាគច្រើននៅភាគខាងលិច ភាគកណ្ដាល និងភាគពាយព្យ។ គ្រោះធម្មជាតិនេះបណ្ដាលឱ្យផ្ទះរបស់ប្រជាជន១៤៧ខ្នងខូចខាតមួយផ្នែក ឬខូចខាតទាំងស្រុង។
ផ្លូវចម្ងាយ៨០គីឡូម៉ែត្រត្រូវកាត់ផ្ដាច់, ដីបង្កបង្កើនផលកសិកម្ម និងព្រែកសម្រាប់បង្ហូរទឹកជាច្រើនខ្សែត្រូវបានបំផ្លាញ។ កាលពីដើមឆ្នាំនេះ មានការធ្លាក់ទឹកកក និងជំនន់ទឹកភ្លៀងដ៏ធ្ងន់ធ្ងរបណ្ដាលឱ្យមនុស្សរាប់សិបនាក់ស្លាប់នៅទូទាំងប្រទេសអាហ្វហ្កានីស្ថាន។ ប្រទេសនេះងាយនឹងរងគ្រោះដោយសារអាកាសធាតុប្រែប្រួលឆាប់រហ័ស។ បើត្រូវធ្លាក់ទឹកកកគឺធ្លាក់ខ្លាំង ហើយបើត្រូវធ្លាក់ភ្លៀងគឺធ្លាក់ខ្លាំង និងបង្កជាគ្រោះទឹកជំនន់។
ជាទូទៅ នៅពេលករណីនេះកើតឡើងម្ដងៗតែងតែឆក់យកជីវិតមនុស្សរាប់សិបនាក់ ឬពេលខ្លះដល់រាប់រយនាក់ក៏មាន។ កាលពីឆ្នាំ២០២៤ មនុស្សជាង៣រយនាក់ស្លាប់ដោយសារជំនន់ទឹកភ្លៀង។ សង្គ្រាមស៊ីវិលរាប់សិបឆ្នាំ គួបផ្សំនឹងហេដ្ឋារចនាសម្ព័ន្ធមិនរឹងមាំ សេដ្ឋកិច្ចទន់ខ្សោយ ការកាប់បំផ្លាញព្រៃឈើ និងការជះឥទ្ធិពលពីបម្រែបម្រួលអាកាសធាតុជាសាកលធ្វើឱ្យគ្រោះធម្មជាតិនៅប្រទេសនេះរឹតតែមានសភាពធ្ងន់ធ្ងរ។ ជាពិសេស នៅតំបន់ឆ្ងាយដាច់ស្រយាលដែលអ្នកស្រុកច្រើនសាងសង់ផ្ទះអំពីដីភក់៕ ប្រភព៖ អារ៉ាប់ ញូស៍ (Arab News) និងប្រភពដទៃទៀត
ចែករំលែកព័តមាននេះ