ខេត្តសៀមរាប ៖ មន្ត្រីអាជ្ញាធរខេត្តបានអះអាងសាជាថ្មីថា «គម្រោងស្ថាបនាស្ពានថ្មថ្មីនិងពង្រីកផ្លូវចេញពីរង្វង់មូលព្រះរាជដំណាក់ទៅកាន់ស្ដុបតុលាការចាស់» មិនបានប៉ះពាល់ដល់ដើមឈើធំៗទាំងស្រុងទេ គឺមានតែបួនដើមប៉ុណ្ណោះ ដែលត្រូវពិចារណាកា.ប់ចោលឬបែបណា ?
ខេត្តសៀមរាប ៖ មន្ត្រីអាជ្ញាធរខេត្តបានអះអាងសាជាថ្មីថា «គម្រោងស្ថាបនាស្ពានថ្មថ្មីនិងពង្រីកផ្លូវចេញពីរង្វង់មូលព្រះរាជដំណាក់ទៅកាន់ស្ដុបតុលាការចាស់» មិនបានប៉ះពាល់ដល់ដើមឈើធំៗទាំងស្រុងទេ គឺមានតែបួនដើមប៉ុណ្ណោះ ដែលត្រូវពិចារណាកាប់ចោលឬបែបណា ?ការបកស្រាយសាជាថ្មីនេះ ធ្វើឡើងនៅក្នុងសន្និសីទសារព័ត៌មានរួមគ្នាមួយរវាងមន្ត្រីសាលាខេត្តសៀមរាបជាមួយមន្ត្រីមន្ទីរសាធារណការនិងដឹកជញ្ជូនខេត្ត កាលពីល្ងាចថ្ងៃទី២៨ មីនា នៅសាលប្រជុំលេខ២ នៃអគារសាលាខេត្ត បន្ទាប់ពីសារព័ត៌មានកោះសន្ដិភាពនិងគេហទំព័របានចេញផ្សាយអត្ថបទមួយមានចំណងជើងថា «ដើមឈើទាលធំៗរាប់សិបដើមនៅអមសងខាងផ្លូវអាស្រមព្រះអង្គចេកព្រះអង្គចម កំពុងប្រឈមនឹងការកាប់បំផ្លាញក្រោមហេតុផលពង្រីកផ្លូវ»។
អត្ថបទចុះផ្សាយប្រកបទៅដោយវិជ្ជាជីវៈ និងក្រមសីលធម៌ បានផ្អែកទៅតាមខ្លឹមសារនៃបទសម្ភាសន៍មួយដែលមានទាំងថតជាសំឡេងត្រឹមត្រូវជាមួយប្រធានមន្ទីរសាធារណការ និងដឹកជញ្ជូនខេត្តគឺលោក គឹម ប៉ុណ្ណា ទាក់ទិននឹងផែនការអភិវឌ្ឍន៍ហេដ្ឋារចនាសម្ព័ន្ធស្ពានថ្នល់ខាងលើ ។ ក្នុងបទសម្ភាសន៍នោះមានការបង្ហើបថា ដើមឈើមួយចំនួនក្នុងចំណោមដើមឈើទាំងអស់ដុះនៅលើគម្រោងផ្លូវនោះទាមទារការកាប់ចោល ។ ការផ្សាយដូចបាននាំពាក្យនេះវាបានក្លាយទៅជាដំណឹងដ៏ក្ដៅគគុកនិងរសើបបំផុតមួយនៅតាមបណ្ដាញផ្សព្វផ្សាយសង្គម(ហ្វេសប៊ុក)ខណៈគេបានឃើញដើមឈើជាច្រើនដើមនៅមុខអូតែលសុខាបានបាត់ស្រមោលរួចទៅហើយនោះ ។ ថ្លែងនៅក្នុងសន្និសីទសារព័ត៌មាននោះប្រធានមន្ទីរសាធារណការ និងដឹកជញ្ជូនខេត្តលោក គឹម ប៉ុណ្ណាបានអះអាងថា អត្ថបទចុះផ្សាយរួចមកហើយនោះមានឥទ្ធិពលខ្លាំងណាស់និងអាចនាំទៅដល់ការយល់ច្រឡំថាមានការកាប់ដើមឈើធំៗទាំងនោះចោលដើម្បីយកដីស្ថាបនាផ្លូវ ។ តាមពិតគម្រោងនោះមិនបានប៉ះពាល់ដើមឈើទាំងអស់ទេ គឺមានតែបួនដើមប៉ុណ្ណោះដែលត្រូវប្រឈមនឹងការកាប់ ព្រោះដុះនៅលើទីតាំងដែលត្រូវពង្រីកផ្លូវ ។ លោកបន្តថា ដើមឈើទាំង៤ដើមនោះ ពីរដើមជាប្រភេទដើមអម្ពិលបារាំងដុះនៅជាប់ស្ដុបតុលាការចាស់ និងពីរដើមទៀតជាប្រភេទដើមដូង និងដើមធ្នង់ នៅម្ដុំមណ្ឌលផ្ដល់ព័ត៌មានទេសចរណ៍ ។
លោកប្រធានមន្ទីរបានបញ្ជាក់ដូចនៅក្នុងបទសម្ភាសន៍នៅមុនពេលចុះផ្សាយថា «គម្រោងហ្នឹងគឺជាយុទ្ធសាស្ត្របញ្ចៀសការកកស្ទះចរាចរណ៍ដែលកំពុងកើតមាននៅលើកំណាត់ផ្លូវសំខាន់ៗចំនួនពីររួមមាន កំណាត់ផ្លូវជាតិលេខ៦ ចាប់ពីស្ដុបកោះកេរិ៍្ត ដល់ស្ពានថ្មចាស់មុខព្រះរាជដំណាក់ និងកំណាត់ផ្លូវវត្តបូព៌ ។ បើតាមគំនូសប្លង់ស្ពានថ្មីគឺត្រូវបានសង់នៅប៉ែកខាងជើងស្ពានថ្មព្រះរាជដំណាក់ចាស់ ដោយទាមទារឱ្យមានការពង្រីកផ្លូវឆ្លងកាត់អាស្រមព្រះអង្គចេក ព្រះអង្គចម ឆ្ពោះទៅកាន់ស្ដុបសុខាអូតែល(ស្ដុបតុលាការចាស់ ) ។ សូមបញ្ជាក់ថា កំណាត់ផ្លូវដែលមានគម្រោងពង្រីកនេះមានប្រវែងប្រមាណ៤០០ម៉ែត្រ ចាប់ពីរង្វង់មូលព្រះរាជដំណាក់ ឆ្លងកាត់អាស្រមលោកយាយទេព និងព្រះអង្គចេក ព្រះអង្គចម រហូតទៅដល់ស្ដុបតុលាការចាស់ដែលមានដើមឈើដុះអមសងខាងផ្លូវយ៉ាងតិច៣៥ដើម បន្សល់ទុកតាំងពីសម័យអាណានិគមបារាំងមកម្លេ៉ះដោយបានផ្ដល់ម្លប់ត្រឈឹងត្រឈៃនិងកា្លាយទៅជាគម្របពណ៌បៃតងសម្រាប់ទីក្រុងទេសចរណ៍ដ៏បុរាណនេះ ។
លោកប្រធានមន្ទីរបានបញ្ជាក់ពីគម្រោងផ្លូវនោះយ៉ាងដូច្នេះថា «ផ្លូវដែលត្រូវពង្រីកត្រូវបានអនុវត្តជាពីរដំណាក់កាល ដោយដំណាក់កាលទី១ចាប់ពីរង្វង់មូលព្រះរាជដំណាក់ទៅដល់ផ្លូវកាត់ទទឹងក្បែរមណ្ឌលផ្ដល់ព័ត៌មានទេសចរណ៍ គឺយកផ្នែកខ្លះនៃសួនច្បារស្ថាបនាផ្លូវទទឹង៤ម៉ែត្រ ដោយយកដើមឈើធំៗដុះជាជួរទាំងនោះធ្វើជាចំណុចកណ្ដាល ។ ដំណាក់កាលទី២ ចាប់ពីផ្លូវកាត់ទទឹងទៅដល់ស្ដុបតុលាការចាស់ ជាការពង្រីកផ្លូវតូចធំទៅតាមស្ថានភាពដើមឈើ ។ ទោះជាយ៉ាងនេះក្ដី ប្រជាពលរដ្ឋមួយចំនួនបានអះអាងថា ការស្ថាបនានិងពង្រីកផ្លូវនោះមិនអាចដំណើរការគម្រោងដោយកាប់ដើមឈើត្រឹមតែបួនដើមដូចការបកស្រាយខាងលើបានទេ ។ ដោយមានមុខរបរជាអ្នកបើករថយន្តដឹកភ្ញៀវ បុរសឈ្មោះឃឹម តៃ អាយុ៣៥ឆ្នាំ បានឈរសម្លឹងទៅកាន់កំណាត់ផ្លូវចាប់ពីមណ្ឌលផ្ដល់ព័ត៌មានទេសចរណ៍ទៅកាន់ស្ដុបតុលាការចាស់ដែលមានដើមឈើទាលយ៉ាងតិច១៨ដើម ដុះនៅសងខាងផ្លូវ ឆ្លើយទៅកាន់អ្នកយកព័ត៌មានថា ផ្លូវនេះមិនអាចពង្រីកឱ្យធំជាងនេះដោយគ្មានការកាប់ដើមឈើធំៗទាំងនេះទេ ព្រោះដើមឈើទាំងនោះវាដុះកៀកជាប់នឹងថ្នល់ស្រាប់ទៅហើយ ។ ដោយឡែកចំពោះផែនការស្ថាបនាផ្លូវថ្មីពីរង្វល់មូលព្រះរាជដំណាក់មកកាន់មណ្ឌលព័ត៌មានទេសចរណ៍ អាចធ្វើទៅបានដោយគ្រាន់តែកាប់ដើមឈើប្រមាណបីបួនដើមបានហើយ ប៉ុន្តែកៀកនឹងអាស្រមព្រះអង្គចេកព្រះអង្គចមពេក ។
នាយករដ្ឋបាលសាលាខេត្តសៀមរាបលោក លី សំរិទ្ធ ដែលបានមកបកស្រាយនៅក្នុងសន្និសីទសារព័ត៌មាននោះដែរ បានថ្លែងទទួលស្គាល់ថា ដើមហេតុដែលនាំឱ្យអត្ថបទចុះផ្សាយចុងក្រោយនេះមានឥទ្ធិពលខ្លាំងទៅលើស្រទាប់មហាជន ដោយផ្ដើមចេញពីការកាប់ឈើមួយចំនួននៅអមសងខាងផ្លូវសុខាអូតែល នាពេលកន្លងមក ជាមួយនឹងការបារម្ភយ៉ាងខ្លាំងអំពីការកាប់ដើមឈើបន្តទៀត ។ ទោះបីជាយ៉ាងណា លោកបានអះអាងថា តាមការណែនាំរបស់លោក ឃឹម ប៊ុនសុង អភិបាលខេត្ត ក៏ដូចជាការជជីកសួរទៅក្រុមអ្នកជំនាញផ្លូវថ្នល់ឃើញថា យើងពុំមានផែនការបន្តកាប់ដើមឈើផ្សេងទៀតទេ ដូច្នេះសូមឱ្យមហាជនកុំមានការព្រួយបារម្ភអ្វីទៀតឱ្យសោះ ។ ដូចអ្វីដែលបានចុះផ្សាយក្នុងអត្ថបទកន្លងទៅ មន្ត្រីបម្រើការងារនៅក្នុងមន្ទីរអង្គភាពរដ្ឋមួយរបស់ខេត្តសៀមរាបដែលបានឃើញហេតុការណ៍កាប់បំផ្លាញដើមឈើនៅមុខសណ្ឋាគារសុខាកន្លងទៅនិយាយថា ក្នុងនាមជាពលរដ្ឋខ្មែរមួយរូបលោកសប្បាយចិត្តនៅពេលដែលឃើញទីក្រុងមានការអភិវឌ្ឍទៅលើហេដ្ឋារចនាសម្ព័ន្ធផ្លូវថ្នល់ ក៏ប៉ុន្តែការអភិវឌ្ឍដោយការកាប់បំផ្លាញដើមឈើជាកេរដំណែលរបស់មនុស្សជំនាន់មុនបែបនេះមិនគួរគប្បីទាល់តែសោះ ។
ជាច្រើនឆ្នាំមកនេះ គេឃើញដើមគគីរនិងដើមឈើទាលធំៗរាប់សិបដើមដុះនៅតាមចិញ្ចើមផ្លូវមួយចំនួនដូចជា ផ្លូវទៅអង្គរ ផ្លូវជាតិលេខ៦ និងផ្លូវអមសងខាងមាត់ស្ទឹងបានងាប់ជាបន្តបន្ទាប់ ក្នុងនោះមួយចំនួនងាប់ក្រោមហេតុផលអាយុកាលចាស់និងកង្វះការថែទាំ ។ ខ្លះទៀតត្រូវបានអ្នកជំនាញព្រៃឈើសង្ស័យថា ងាប់ដោយសារការថប់ខ្យល់នៅផ្នែកគល់របស់វាដោយសារការក្រាលការ៉ូឡា និងចាក់បេតុង ព្រមទាំងខ្លះសង្ស័យថាមានលួចចាក់ថ្នាំសម្លាប់ជាដើម ។ ប៉ុន្តែជារៀងរហូតមក គេមិនធ្លាប់ឃើញក្រុមមន្រ្តីណាម្នាក់ចេញមុខដាំដើមឈើទាំងនោះឡើងវិញទេ ក្រៅពីឃើញមានការកាប់បំផ្លាញ ក្រោមរូបភាពពង្រីកផ្លូវ ឬទើសផ្លូវចូលមុខផ្ទះ សណ្ឋាគារ របស់ក្រុមអ្នកមានលុយមានអំណាចមួយចំនួននោះ ។ កោះសន្ដិភាព មានក្ដីរំភើបរីករាយកាលបើបានដំណឹងច្បាស់ថា ការព្រួយបារម្ភជុំវិញផែនការពង្រីកផ្លូវហើយអាចនឹងមានការកាប់ដើមឈើធំៗតាមបណ្ដោយផ្លូវមុខព្រះរាជដំណាក់នោះគឺមិនមានទេ ។ អាជ្ញាធរបានប្រកាសច្បាស់លាស់បំផុតថា មិនមានការកាប់តទៅទៀតដូចកាប់លើកមុនៗនោះឡើយ ៕
ចែករំលែកព័តមាននេះ