រាជធានីភ្នំពេញ ៖ ក្រុមប្រឹក្សាជាតិប្រាក់ឈ្នួលអប្បរមាអាណត្តិទី១ បានសម្រេចបញ្ចប់ការពិភាក្សាប្រាក់ឈ្នួលអប្បរមាកម្មករនិយោជិកសម្រាប់ឆ្នាំ២០២០ នៅថ្ងៃទី២០ ខែកញ្ញានេះហើយ ។ នេះបើតាមលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បរមាអាណត្តិទី១ ។
លោកអ៊ិត សំហេង បានលើកឡើងក្នុងកិច្ចប្រជុំពិភាក្សាប្រាក់ឈ្នួលអប្បរមាកម្មករនិយោជិកសម្រាប់ឆ្នាំ២០២០នៅថ្ងៃទី២០ ខែកញ្ញា នានៅទីស្តីការក្រសួងបានលើកឡើងថា ភាគីពាក់ព័ន្ធបានបើកកិច្ចប្រជុំការងាររបស់ខ្លួនជាច្រើនលើកឡើងមកហើយ ។ កិច្ចប្រជុំបានទទួលទ្ធផលល្អប្រសើរដោយសារភាគីទាំងអស់មានភាពចាស់ទុំក្នុងកា រពិភាក្សាគា្ន ។ លោករដ្ឋមន្ត្រីបានបានបញ្ជាក់ថា ៖«ខ្ញុំសូមជម្រាបថា កិច្ចប្រជុំថ្ងៃនេះ គឺជាកិច្ចប្រជុំចុងក្រោយ ដើម្បីបញ្ចប់ការពិភាក្សាប្រាក់ឈ្នួលអប្បរមាកម្មករឆ្នាំ២០២០ ។ ប្រសិនបើយើងពិភាក្សាឯកភាពគ្នាទទួលបានតួលេខមួយ អាហ្នឹងយើងមិនចាំបាច់បោះឆ្នោតនោះទេ ។ ប៉ុន្តែប្រសិនបើពិភាក្សាមិនឯកភាពគ្នាលើតួលេខណាមួយនោះទេ យើងនឹងធ្វើនីតិវិធីបោះឆ្នោត» ។
លោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា សម្រាប់ការចរចាប្រាក់ឈ្នួលអប្បរមាកម្មករនិយោជិកឆ្នាំ២០២០ ភាគីនិយោជកមានចំនួន១៧រូប ភាគីសហជីព១៧រូប និងរាជរដ្ឋាភិបាល១៧រូប ។ កាលពីថ្ងៃទី១៩ ខែកញ្ញា ភាគីទាំងបីមានភាគីសហជីព ភាគីរាជរដ្ឋាភិបាល និងភាគីនិយោជកបានដាក់តួលេខមូលរួមហើយ ដោយភាគីនិយោជកបានដាក់តួលេខ១៨៦ដុល្លារ ភាគីសហជីព១៩៥ដុល្លារ និងភាគីរាជរដ្ឋាភិបាល១៨៧ដុល្លារ ។ ខាងភាគីសហជីពបានឲ្យដឹងថា ការពិភាក្សាគ្នាក៏បានឯកភាពគ្នាក៏សំណើចំនួន មួយចំនុចទៀតដូចជា ៖ ស្នើសុំផ្តល់អាហារថ្ងៃត្រង់ ឬប្រាក់ថ្លៃអាហារ ១ដុល្លារ ។ ផ្តល់ការមធ្យោបាយដឹកជញ្ជូនកម្មករប្រកបដោយសុវត្ថិភាព និងជាបន្ទុករបស់និយោជក ។
ពង្រីកវិសាលភាព ប្រាក់ឈ្នួលអប្បបរមាវិស័យមួយចំនួនដូចជា វិស័យទេសចរណ៍ សេវាកម្ម និងសំណង់ ។ ស្នើសុំរក្សាថ្ងៃឈប់សម្រាកមួយចំនួនមកវិញ ។ អន្តរាគមន៍ឲ្យតំណាងសហជីពដែលក្រុមហ៊ុនបញ្ឈប់បានចូលធ្វើការវិញ ។ ពិនិត្យការចុះបញ្ជីកាសហជីពឡើងវិញ (មានការរាំងខ្ទប់ការចុះបញ្ជី) និងចំនុចមួយចំនួនទៀត ។
គួរឮកថា ក្រសួងការងារបានកំណត់ប្រាក់ឈ្នួលឲ្យកម្មករសម្រាប់ឆ្នាំ២០១៩ គឺ១៧៧ដុល្លារ ហើយសម្តេចតេជោ ហ៊ុន សែន យកថវិកាជាតិបន្ថែមទៀត៥ដុល្លារទៀត ។ ដូច្នេះប្រាក់ឈ្នួលកម្មករសម្រាប់ឆ្នាំ២០១៩ គឺ១៨២ដុល្លារ និងត្រូវបើកជា២ដងក្នុងមួយខែ ។ ប្រាក់ឈ្នួលអប្បបរមាក្នុងឆ្នាំ២០១៨នេះ គឺ១៧០ដុល្លារក្នុងមួយខែ ៕ កែសម្រួលដោយ ៖ សុឃាក់
ចែករំលែកព័តមាននេះ