ប្រទេសរុស្សុី កាលពីថ្ងៃទី២៩ មីនា បានបញ្ចេញពីលទ្ធភាពរកច្រកចេញមួយនៃវិបត្តិអ៊ុយក្រែនតាមរយៈ ការចរចាជាមួយពួកលោកខាងលិចដោយលើកឡើងពីការបង្កើតរដ្ឋសហព័ន្ធមួយ សម្រាប់អ៊ុយក្រែន និងការបដិសេធរាល់អន្តរាគមន៍ថ្មីរបស់រុស្សុី បន្ទាប់ពីដណ្តើមកាន់កាប់តំបន់គ្រីមេ ។
កាលពីយប់ថ្ងៃទី២៩ មីនា ប្រធានាធិបតីរុស្សុីលោកវ្ល៉ាឌីមៀរ ពូទីន បានទាក់ទងតាមទូរស័ព្ទជាមួយសមភាគីអាមេរិក លោក បារ៉ាក់ អូបាម៉ា ។ លោក ពូទីន អំពាវនាវដល់លោកអូបាម៉ា ឱ្យសិក្សាពីវិធានការនានាដែលសហគមន៍អន្តរជាតិអាចប្រកាន់យកដើម្បីរួមសហការសំដៅធ្វើឱ្យមានសេ្ថរភាពនៅអ៊ុយក្រែន ។
មហាអំណាចទាំង២មានបំណងបញ្ចេញប្រតិកម្មដោយឆាប់រហ័ស ។ រដ្ឋមន្ត្រីការបរទេសសហរដ្ឋអាមេរិក លោក ចន គ័ររី ដែលត្រឡប់ពីបំពេញទស្សនកិច្ចនៅមជ្ឈិមបូព៌ានោះ មិនទៅកាន់ក្រុងវ៉ាសីុនតោនទេ តែលោកទៅកាន់ក្រុងបារីសដើម្បីជួបសន្ទនានៅទីនោះជាមួយសមភាគីរុស្សុី លោក ស័រ ហ្គេយឡាវរ៉ូវ ។ ការជួបគ្នានោះត្រូវធ្វើនាយប់ថ្ងៃទី៣០ មីនា ។
ប្រទេសអ៊ុយក្រែន ក្រោយបាត់បង់គ្រីមេខ្លាចរុស្សុីពុំស្ថិតនៅត្រឹមទីនោះ ហើយធ្វើអន្តរាគមន៍ចូលប៉ែកខាងកើតអ៊ុយក្រែន ដែលមានប្រជាជនភាគច្រើននិយាយភាសារុស្សុីទៀត ព្រោះរយៈពេលប៉ុន្មានសប្តាហ៍ចុងក្រោយនេះមានបាតុកម្មទាមទារការបំបែកខ្លួនជាច្រើននៅទីនោះ ។
កាលពីថ្ងៃទី២៩ មីនា លោក ឡាវរ៉ូវ បានបដិសេធយ៉ាងមឹុងម៉ាត់រាល់គម្រោងការបែបនោះ ។ លោកមានប្រសាសន៍ថា យើងគ្មានចេតនាណាមួយឬក៏គ្មានប្រយោជន៍អ្វីដែលត្រូវលើកទ័ពឆ្លងកាត់ព្រំដែនអ៊ុយក្រែនឡើយ ។ ផ្ទុយទៅវិញលោកស្នើឱ្យមានការងាររួមមួយ ដើម្បីអាចរកច្រកចេញពីវិបត្តិ ។
ពេលសួរពីការរកច្រកចេញនោះ លោកឡាវរ៉ូវ បានលើកឡើងពីការបង្កើតរដ្ឋសហព័ន្ធអ៊ុយក្រែនមួយដូចការទាមទាររបស់បណ្តាតំបន់ភាគខាងត្បូង និងផាគខាងកើតប្រទេស ៕
ចែករំលែកព័តមាននេះ