ប្រទេសវៀតណាម ៖ គ្រោះមហន្តរាយធម្មជាតិជាបន្តបន្ទាប់ និងធ្ងន់ធ្ងរ បានវាយប្រហារប្រទេសវៀតណាម ចាប់តាំងពីដើមឆ្នាំនេះ បណ្តាលឱ្យមនុស្ស ៤០៩ នាក់ស្លាប់ ឬបាត់ខ្លួន…
ប្រទេសវៀតណាម ៖ គ្រោះមហន្តរាយធម្មជាតិជាបន្តបន្ទាប់ និងធ្ងន់ធ្ងរ បានវាយប្រហារប្រទេសវៀតណាម ចាប់តាំងពីដើមឆ្នាំនេះ បណ្តាលឱ្យមនុស្ស ៤០៩ នាក់ស្លាប់ ឬបាត់ខ្លួន និង ៧២៧ នាក់ផ្សេងទៀតរងរបួស ជាមួយទំហំនៃការខាតបង់សេដ្ឋកិច្ចប្រមាណជាង ៨៥ ទ្រីលានដុង ឬ ៣,២ ពាន់លានដុល្លារអាមេរិក។
គ្រោះទាំងនោះ បានបណ្តាលឱ្យផ្ទះចំនួន ៣៣៧,២៩៧ ខ្នងដួលរលំ និងខូចខាត។ រីឯដំណាំស្រូវ និងដំណាំផ្សេងៗទៀតចំនួន ៥៥៣,៤១៧ ហិកតា រួមជាមួយរុក្ខជាតិដទៃទៀតចំនួន ៣៧៦,៧៩២ ហិកតា ត្រូវបានជន់លិច និងខូចខាត។
នៅក្នុងវេទិកាស្តីពីការអនុវត្តវិទ្យាសាស្ត្រ និងបច្ចេកវិទ្យាក្នុងការព្យាករណ៍គ្រោះមហន្តរាយ និងការព្រមានជាមុន ដែលរៀបចំដោយក្រសួងកសិកម្ម និងបរិស្ថានវៀតណាម កាលពីថ្ងៃទី ២៥ ខែវិច្ឆិកា ឆ្នាំ២០២៥ លោក ង្វៀន តន់ ក្វាន់ (Nguyen Ton Quan) អនុប្រធាននាយកដ្ឋានគ្រប់គ្រងហានិភ័យគ្រោះមហន្តរាយ និងទំនាក់ទំនងសហគមន៍ ក្រោមអាជ្ញាធរគ្រប់គ្រងគ្រោះមហន្តរាយ និងទំនប់ បានរាយការណ៍ពីការខូចខាតពីព្យុះចំនួន ១៤ និងសម្ពាធទាបត្រូពិចចំនួន ៥ ដែលបានកើតឡើងនៅសមុទ្រខាងកើតរហូតមកដល់ពេលនេះ សម្រាប់ឆ្នាំ ២០២៥។
ព្យុះ Koto ដែលបានកើតឡើងនៅយប់ថ្ងៃទី២៥ ខែវិច្ឆិកា ថ្មីៗនេះ បានរំកិលខ្លួនចូលទៅក្នុងសមុទ្រភាគខាងកើត ដែលធ្វើឱ្យចំនួនសរុបនៃព្យុះ និងសម្ពាធទាបត្រូពិចនៅឆ្នាំនេះកើនដល់ ២០ ស្មើនឹងកំណត់ត្រា ដែលត្រូវបានកំណត់ក្នុងឆ្នាំ ២០១៧។
លោក Quan ក៏បានកត់សម្គាល់ថា ថ្មីៗនេះ ភ្លៀងធ្លាក់ខ្លាំង និងទឹកជំនន់ដែលមិនធ្លាប់មានពីមុនមកនៅទូទាំងអាងទន្លេចំនួន ១៣ នៅតំបន់ភាគខាងជើង និងកណ្តាល បានបង្កឱ្យមានទឹកជំនន់ធ្ងន់ធ្ងរនៅក្នុងតំបន់ទីក្រុង និងតំបន់ទំនាប រួមទាំងទីក្រុងទេសចរណ៍សំខាន់ៗដូចជា ទីក្រុងហាណូយ ទីក្រុងហ្វេ (Hue) ដាណាង និងញ៉ាត្រាង។
តំបន់ជាច្រើនត្រូវបានវាយប្រហារដោយគ្រោះមហន្តរាយធម្មជាតិគ្រប់ទម្រង់ក្នុងរយៈពេលខ្លី បណ្តាលឱ្យមានគំរូគ្រោះមហន្តរាយធម្មជាតិដ៏ស្មុគស្មាញ ដូចជា ព្យុះមួយកើតឡើងបន្ទាប់ពីព្យុះមួយ គ្រោះទឹកជំនន់មួយកើតឡើងបន្ទាប់ពីមួយ ទឹកជំនន់ភ្លាមៗ និងការរអិលបាក់ដី ពិសេសនៅតំបន់ភ្នំភាគខាងជើង និងតំបន់ដីគោក និងកណ្តាល។ គ្រោះមហន្តរាយទាំងនោះ បានបង្កការគំរាមកំហែងយ៉ាងធ្ងន់ធ្ងរដល់ហេដ្ឋារចនាសម្ព័ន្ធ ការងារសាធារណៈ និងប្រព័ន្ធទំនប់ទឹក ដែលបណ្តាលឱ្យមានការខាតបង់ទាំងអាយុជីវិត និងទ្រព្យសម្បត្តិ។
លោកបានព្យាករណ៍ថា នៅក្នុងខែសេសសល់នៃឆ្នាំនេះ នៅតែមានហានិភ័យទឹកជំនន់ធំក្នុងតំបន់កណ្តាល ដែលអាចបណ្តាលមកពីវត្តមានរបស់ព្យុះ Koto។ ដូច្នេះបណ្តាអាជ្ញាធរមូលដ្ឋានត្រូវផ្តោតលើការយកឈ្នះលើផលវិបាកនៃទឹកជំនន់ថ្មីៗនេះ ដើម្បីត្រៀមខ្លួនឆ្លើយតបទៅនឹងគ្រោះមហន្តរាយធម្មជាតិនាពេលខាងមុខ។
ជាមួយគ្នានោះ ក្រសួងកសិកម្ម និងបរិស្ថាន នឹងបន្តពង្រឹងសមត្ថភាព កែលម្អភាពជឿជាក់នៃប្រព័ន្ធព្យាករណ៍ និងព្រមានគ្រោះមហន្តរាយធម្មជាតិ ដោយសង្កត់ធ្ងន់ថា អាទិភាពចម្បង គឺការបង្កើនដង់ស៊ីតេនៃស្ថានីយ៍ត្រួតពិនិត្យទឹកភ្លៀង និងបង្កើនគុណភាពនៃការព្យាករណ៍ភ្លៀងធ្លាក់ខ្លាំង ដើម្បីគាំទ្រដល់ការព្រមានសម្រាប់ទឹកជំនន់ភ្លាមៗ ការបាក់ដី និងជំនន់ជន់លិច ព្រមទាំងការបង្កើតផែនទីព្រមានគ្រោះមហន្តរាយធម្មជាតិ ពិសេសផែនទីលម្អិតដែលកំណត់តំបន់មានហានិភ័យនៃទឹកជំនន់ភ្លាមៗ និងការបាក់ដីរហូតដល់កម្រិតតំបន់ និងភូមិ។
ក្រសួងក៏មានគម្រោងពិនិត្យ រៀបចំ និងផ្លាស់ប្តូរទីលំនៅប្រជាជនដែលរស់នៅក្នុងតំបន់ដមានហានិភ័យខ្ពស់ ជាពិសេសការបាក់ដី និងទឹកជំនន់ភ្លាមៗនៅក្នុងតំបន់ភ្នំ និងទំនាប។ លើសពីនេះ ក្រសួងនឹងកែសម្រួលរចនាសម្ព័ន្ធដំណាំ និងសត្វពាហនៈក្នុងតំបន់ និងមូលដ្ឋាននានាផងដែរ៕ ប្រភព ៖ VNA និង VnExpress
ចែករំលែកព័តមាននេះ