ប្រទេសឥណ្ឌូណេស៊ី ៖ យោងតាមការស្រាវជ្រាវថ្មីរបស់អង្គការសហប្រជាជាតិ (UN) បានបង្ហាញថា ទីក្រុងហ្សាការតារបស់ប្រទេសឥណ្ឌូណេស៊ី បានវ៉ាដាច់ទីក្រុងតូក្យូរបស់ប្រទេសជប៉ុន ដើម្បីក្លាយជាទីក្រុងដែលមានប្រជាជនរស់នៅច្រើនជាងគេបំផុតលើពិភពលោក ពោលជិត ៤២…
ប្រទេសឥណ្ឌូណេស៊ី ៖ យោងតាមការស្រាវជ្រាវថ្មីរបស់អង្គការសហប្រជាជាតិ (UN) បានបង្ហាញថា ទីក្រុងហ្សាការតារបស់ប្រទេសឥណ្ឌូណេស៊ី បានវ៉ាដាច់ទីក្រុងតូក្យូរបស់ប្រទេសជប៉ុន ដើម្បីក្លាយជាទីក្រុងដែលមានប្រជាជនរស់នៅច្រើនជាងគេបំផុតលើពិភពលោក ពោលជិត ៤២ លាននាក់។
ទីក្រុងតូក្យូ ដែលធ្លាប់ជាទីក្រុងធំមានប្រជាជនរស់នៅច្រើនជាងគេលើពិភពលោកតាំងពីឆ្នាំ ២០០០ នោះ បានឃើញកំណើនប្រជាជនយឺត រហូតបាត់បង់តំណែងដ៏សំខាន់នេះ ដោយបានធ្លាក់ទៅលើទីក្រុងហ្សាកាតា (ឥណ្ឌូណេស៊ី) និងទីក្រុងដាការបស់ប្រទេសបង់ក្លាដែស។ UN បានរកឃើញថា ឥឡូវនេះ ប្រជាជនរស់នៅទីក្រុងហ្សាកាតាបានកើនឡើងដល់ជិត ៤២ លាននាក់ តាមពីក្រោយទីក្រុងដាកា ដែលមានប្រជាជនជិត ៣៧ លាននាក់ ខណៈដែលទីក្រុងតូក្យូធ្លាក់ទៅលំដាប់ទី ៣ ដែលមានប្រជាជនជិត ៣៣ លាននាក់។
របាយការណ៍ដដែលបានបន្ថែមថា ទីក្រុងដាកាត្រូវបានរំពឹងថានឹងក្លាយជាទីក្រុងមានប្រជាជនរស់នៅច្រើនជាងគេលើពិភពលោកនៅឆ្នាំ ២០៥០។ ចំណែកចំនួនប្រជាជនទីក្រុងតូក្យូត្រូវបានព្យាករណ៍ថានឹងធ្លាក់ចុះក្នុងរយៈពេល ២៥ ឆ្នាំខាងមុខ ដែលត្រូវបានឆ្លុះបញ្ចាំងពីចំនួនប្រជាជនវ័យចំណាស់ដែលកំពុងថយចុះរបស់ប្រទេសនេះ។
ជាការកត់សម្គាល់ របាយការណ៍បង្ហាញថា ទីក្រុងចំនួន ៩ ក្នុងចំណោមទីក្រុងចំនួន ១០ ដែលមានប្រជាជនច្រើនជាងគេលើពិភពលោកស្ថិតក្នុងទ្វីបអាស៊ី ដោយទីក្រុងគែររបស់ប្រទេសអេហ្ស៊ីប គឺជាទីក្រុងតែមួយគត់មិនស្ថិតនៅអាស៊ី ដោយជាប់នៅក្នុងចំណាត់ថ្នាក់កំពូលទាំង ១០។
លោកស្រី Elisa Sutanudjaja នាយិកាមជ្ឈមណ្ឌលសិក្សា Rujak ដែលមានមូលដ្ឋាននៅទីក្រុងហ្សាការតា បានថ្លែងថា របាយការណ៍នេះ បានបញ្ជាក់ពីអ្វីដែលអ្នកទីក្រុងបានដឹងរួចហើយថា ចំនួនប្រជាជននៅទីក្រុងហ្សាការតាមានច្រើនជាងទីក្រុងតូក្យូអស់រយៈពេលជាច្រើនឆ្នាំមកហើយ។ លោកស្រីបន្ថែមថា ទំហំប្រជាជនដ៏ច្រើនសន្ធឹកសន្ធាប់នៅទីក្រុងហ្សាការតាបានបង្កបញ្ហាប្រឈមធំៗ ជាពិសេសដោយសារតែការសម្របសម្រួលមិនល្អរវាងរដ្ឋាភិបាលមូលដ្ឋាន។
ប្រជាជនទីក្រុងហ្សាការតាតែងតែជួបប្រទះនឹងការកកស្ទះចរាចរណ៍ខ្លាំង ការបំពុល និងគ្រោះទឹកជំនន់។ ជាការឆ្លើយតប រដ្ឋាភិបាលឥណ្ឌូណេស៊ីបានប្រកាសនៅឆ្នាំ ២០១៩ ថានឹងផ្លាស់ប្តូរទីក្រុងនេះចេញពីកោះជ្វា (Java) ដែលមានប្រជាជនរស់នៅច្រើនទៅកាន់កោះប័រណេអូ (Borneo)។ ប៉ុន្តែគម្រោងសាងសង់ទីក្រុងនូសាន់តារា (Nusantara) ដែលជារដ្ឋធានីថ្មី ស្ថិតក្នុងយឺតយ៉ាវ ហើយបានតស៊ូដើម្បីទាក់ទាញការវិនិយោគ៕ ប្រភព ៖ ABC Australia និង NBC News
ចែករំលែកព័តមាននេះ